މާދަމާ ރޭ އާތު އަވާ ފާހަގަކުރަނީ

ދުނިޔޭގެ ފެންވަރުގައި ފާހަގަކުރާ އާތު އަވާ، މާދަމާ ރޭ ރާއްޖޭގައި ފާހަގަކުރަން ނިންމައިފި އެވެ.

އެންވަޔަރަނަމަންޓް މިނިސްޓްރީން ކުރި އިއުލާނުގައި ވަނީ ރާއްޖޭގައި އާތު އަވާ ފާހަގަކުރުމުގައި އާންމުންނާއި ވިޔަފާރި ކުންފުނިތަކާއި އެކިއެކި މަދަނީ ޖަމިއްޔާތަކުން ބައިވެރިވުމަށް އެދިފަ އެވެ.

އާތު އަވާ ފާހަގަކުރާނީ މާދަމާ ރޭ 9:45 އިން 10:45 އަށެވެ. އެ ވަގުތު ކޮންމެހެން ބޭނުންކުރަންޖެހޭ ތަކެތި ފިޔަވައި އެހެން ހުރިހާ ތަކެތި ނިއްވާލަން މިނިސްޓްރީން އެދެ އެވެ.

މިނިސްޓްރީން ވަނީ ދެމެހެއްޓެނިވި ގޮތެއްގައި ތިމާވެށި ހިމާޔަތްކޮށް، ތިމާވެއްޓަށް އަންނަމުންދާ ބަދަލުތަކާއި އެ ބަދަލުތަކުގެ ސަބަބުން ނެތިގެންދާ ދިރުންތަކާއި މާހައުލީ ބަދަލުތަކަށް ހޭލުންތެރިކުރުވުމަށް ކުރާ އެ މަސައްކަތަށް އެއްބާރުލުންދިނުމުގެ ގޮތުން އެކަމުގައި ބައިވެރިވާން ހުރިހާ ފަރާތްތަކުގެ ކިބައިން އެދިފަ އެވެ.

އެ ހަރަކާތަކީ ދުނިޔެ ހޫނުވުމާއި ތިމާވެއްޓަށް އަންނަ ބަދަލުތަކަށް މީހުން ހޭލުންތެރިކުރަން ދުނިޔޭގެ ފެންވަރުގައި ބާއްވާ ހަރަކާތެކެވެ.

މިނިސްޓްރީން ބުނީ އެ ހަރަކާތުގެ މައިގަނޑު މަގްސަދަކީ މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ގުދުރަތީ ތަރިކަ ހިމާޔަތްކުރުމަށް އެއްބައިވަންތަކަމުގެ އަޒުމް ދައްކުވައިދިނުން ކަމަށެވެ.

އެހެންވެ، ދުނިޔޭގެ އެކި ކަންކޮޅުތަކުގައި ވެސް 60 މިނެޓުގެ ވަގުތަށް 'ލައިޓް އައުޓް' ޕީރިއަޑެއްގައި ބައިވެރިވެ، ތިމާވެއްޓަށް އަންނަމުންދާ ބަދަލުތަކާ ދެކޮޅަށް މަސައްކަތްކުރުމަށް ވަކި ވަކި ފަރުދުންނާއި އަމިއްލަ ކުންފުނިތަކާއި މަދަނީ ޖަމިއްޔާތަކުގެ ބައިވެރިވުމަށް ހިތްވަރު ދެ އެވެ.

މިނިސްޓްރީން ބުނި ގޮތުގައި ރާއްޖެއަކީ ވެސް މޫސުމީ ބަދަލުތަކުގެ ސަބަބުން އެންމެ ބޮޑަށް އަސަރުކުރާ ގައުމުތަކުގެ ތެރޭގައި ހިމެނޭ ގައުމެކެވެ. އެހެންވެ، ރާއްޖޭގެ ނާޒުކު ތިމާވެށި ހިމާޔަތްކުރުމަށް ދޭ އަހައްމިއްޔަތުކަން ދަމަހައްޓާ، ގައުމީ ފެންވަރުގައި ކާމިޔާބު ހަރަކާތަކަށް ހެދުމަށް އެންމެން ވެސް މަސައްކަތް ކުރުމަށް އެ މިނިސްޓްރީން ގޮވާލަ އެވެ.