ދަރިވަރުންގެ ގުރުއާން މުބާރާތް އަންގާރަ ދުވަހު ފަށަނީ

ސްކޫލު ދަރިވަރުންނަށް އަމާޒުކޮށްގެން ބާއްވާ ގުރުއާން މުބާރާތް އަންނަ އަންގާރަ ދުވަހު ފަށާނެ ކަމަށް އިސްލާމިކް ބުނެފި އެވެ.

އެ މިނިސްޓްރީން ބުނީ ތިން ގޮތްޕަަކަށް ބަހާލައިގެން ކުރިއަށްގެންދާ މި މުބާރާތުގައި 380 އަށް ވުރެ ގިނަ ދަރިވަރުން ބައިވެރިވެފައިވާ ކަމަށެވެ. އިސްލާމީ މަރުކަޒުގެ ހޯލުގައި އޮންނަ މި މުބާރާތުގެ ކިޔެވުން 10 ދުވަހަށް ދެމިގެންދާނެ އެވެ.

މި މުބާރާތުގައި ފ. އަތޮޅުގެ ސްކޫލުތަކުން ހަ ދަރިވަރުންނާއި، އެހެން ކޮންމެ އަތޮޅެއްގެ އަތޮޅު ސްކޫލުތަކުން ހޮވާ 12 ދަރިވަރުންނާއި އައްޑޫއިން ހޮވާ 18 ދަރިވަރުން އަދި މާލޭގެ ކޮންމެ ސްކޫލަކުން ހަ ދަރިވަރުން ބައިވެރިވާނެ އެވެ.

މިއީ މިފަދަ މުބާރާތެއް އިސްލާމިކް މިނިސްޓްރީން ބާއްވާ ފުރަތަމަ ފަހަރެވެ.

ތަޖުވީދުގެ ހަމަތަކާ އެއްގޮތަށް ރީތިކޮށް ގުރުއާން ކިޔެވުމުގެ ރޫހު އަށަގެންނެވުމާއި އެކަމަށް ހިތްވަރުދިނުމުގެ މަގުސަދުގައި ބާއްވާ މި މުބާރާތުގައި ބަލައިގެން ކިޔެވުމާއި ހިތުން ކިޔެވުމުގެ ކޮންމެ ބަޔަކުން އެންމެ މޮޅު ފަސް ދަރިވަރުންނާއި ހާފިޒުންގެ ބައިން އެންމެ މޮޅު ފަސް ދަރިވަރުން ހޮވާނެ އެވެ.