އެމްބާޕޭގެ 57 މިލިއަން ޑޮލަރުގެ މައްސަލައިގައި ޕީއެސްޖީ ސަސްޕެންޑް ކޮށްފާނެ

ޕީއެސްޖީން ކީލިޔަން އެމްބާޕޭ އަށް ނުދީ އޮތް 57 މިލިއަން ޑޮލަރުގެ މައްސަލާގައި ޔޫއެފާގެ ސަސްޕެންޝަނެއް އެ ކްލަބަށް ކުރިމަތިވެދާނެކަމުގެ ބިރު ކުރިމަތިވެއްޖެ އެވެ.

އެމްބޭޕޭއާ އެކު ޕީއެސްޖީން 2021 ގައި ހެދި އެއްބަސްވުމުގެ ދަށުން އެ ކްލަބުން މިދިޔަ އަހަރު އޭނާ އަށް ދޭން ޖެހޭ ފައިސާ ނުދީ އޮތް ކަމަށް އޭނާ ބުނެ އެވެ.

އެއީ މެއި ޖޫން ޖުލައިގައި އޭނާ އަށް ދޭން ޖެހޭ ޖުމުލަ 55.4 މިލިއަން ޔޫރޯ (57 މިލިއަން ޑޮލަރު) އެވެ.

ހިލޭ ޓްރާންސްފާއެއްގައި އެމްބާޕޭ ރެއާލް މެޑްރިޑަށް ބަދަލުވީ މިދިޔަ ޖޫން މަހު އެވެ. ޕީއެސްޖީން ގަބޫލު ކުރަނީ ހިލޭ ޓްރާންސްފާގައި އޭނާ ކްލަބް ދޫކޮށްލަން ނިންމުމުން އެ ތިން މަހުގެ ފައިސާ އޭނާ އަށް ދޭން ނުޖެހޭނެ ކަމަށެވެ.

އެކަމަކު ފްރާންސް ލީގާއި އެ ލީގުގެ ޑިސިޕްލިނަރީ ކޮމިޓީން މައްސަލަ ބެލުމަށް ފަހު ނިންމީ އެމްބޭޕޭ އަށް އެ ފައިސާ ޕީއެސްޖީން ދޭން ޖެހޭނެ ކަމަށެވެ.

ޔޫރަޕްގެ ކްލަބް މުބާރާތްތަކުގައި ވާދަކުރާ ޓީމުތަކުން މިދިޔަ އަހަރުގެ މާލީ ރިޕޯޓް، މި މަހު 15 ގެ ކުރިން ޔޫއެފާ އަށް ހުށަހަޅަން ޖެހެ އެވެ. ކުޅުންތެރިޔަކަށް ދޭން ޖެހޭ ފައިސާ ނުދީ ދަރަންޏެއްގެ ގޮތުގައި އެކަން އޮވެއްޖެނަމަ، އެ ކްލަބެއް ޔޫއެފާގެ މުބާރާތުން ސަސްޕެންޑް ކުރާނެ އެވެ.

މީޑިއާ ރިޕޯޓްތައް ބުނާ ގޮތުން އެމްބާޕޭ އަށް އެ ފައިސާ އަދި ވެސް ޕީއެސްޖީން ދީފައެއް ނުވެ އެވެ.