ޕާޓީގެ ކޯޅުން ބޮޑުވެ ކެނެޑާގެ ބޮޑުވަޒީރު އިސްތިއުފާ ދެއްވަނީ

ކެނެޑާގައި ވެރިކަން ކުރާ ލިބަރަލް ޕާޓީން އާ ލީޑަރަކު ކަނޑައެޅުމާ އެކު އިސްތިއުފާ ދެއްވާނެކަން ބޮޑުވަޒީރު ޖަސްޓިން ޓްރޫޑޯ އިއުލާނު ކުރައްވައިފި އެވެ.

ރައްޔިތުންގެ ތާއީދު ޓްރޫޑޯ އަށް ކުޑަވަމުންދާ ކަމަށް ވޯޓުތަކުގެ ނަތީޖާއިން ދައްކާއިރު ޕާޓީގެ ތެރޭގައި ވެސް މައްސަލަ އޮތީ ވަރަށް ބޮޑުވެފަ އެވެ.

"އަޅުގަނޑު ގަސްދުކުރަނީ ޕާޓީން އާ ލީޑަރަކު ކަނޑައެޅުމުން، ޕާޓީގެ ލީޑަރުގެ މަގާމުންނާއި، ބޮޑުވަޒީރުކަމުން އިސްތިއުފާ ދޭން،،" 2015 ވަނަ އަހަރުން ފެށިގެން ވެރިކަމުގައި ހުންނެވި ޓްރޫޑޯ އޮޓާވާގައި ނޫސްވެރިންނާ ބައްދަލުކުރައްވައި ވިދާޅުވި އެވެ.

ލިބަރަލްގެ އިސް ބައެއް މެންބަރުން ވެސް ގެންދަވަނީ ޓްރޫޑޯ އިސްތިއުފާ ދެއްވުމަށް ވިދާޅުވަމުންނެވެ.

ވަގުތީ ބޮޑުވަޒީރެއްގެ ގޮތުގައި ޓްރޫޑޯ މަގާމުގައި ހުންނަވާނެ މުއްދަތެއް އަދި ނޭނގެ އެވެ.

އޭނާ ވިދާޅުވީ ލިބަރަލް ޕާޓީގެ ލީޑާޝިޕް ރޭހަކީ "ހަރުދަނާ، މުޅި ގައުމުގައި ކުރިއަށްގެންދާ ވާދަވެރި ޕްރޮސެސްއަކަށް ވާނެ" ކަމަށެވެ.

އޭގެ މާނައަކީ އެމެރިކާގެ އާ ރައީސް ޑޮނަލްޑް ޓްރަމްޕް މި މަހު ވެރިކަމާ ހަވާލުވެވަޑައިގަންނަވާއިރު، ކެނެޑާގެ ލީޑަޝިޕްގައި ޓްރޫޑޯ ދެމި ހުންނެވުމެވެ. އެމެރިކާގެ އާ ސަރުކާރާއި ކެނެޑާއާ ދެމެދު ވިޔަފާރީގެ ހަނގުރާމަ ބާރުވާނެ ކަމަށް ވަނީ ބެލެވިފަ އެވެ.

ކެނެޑާގެ ހުރިހާ އިމްޕޯޓަކުން 25 ޕަސެންޓް ޓެރިފް ނަގާނެ ކަމަށް ޓްރަމްޕް ވިދާޅުވެފައި ވާއިރު، އެކަމުގެ ސަބަބުން ކެނެޑާގެ އިގްތިސާދަށް ގެއްލުން ވެދާނެ ކަމަށް ބެލެވާއިރު، ޓްރޫޑޯ ވަނީ ބަދަލު ހިފާނެ ކަމަށް ވައުދުވެވަޑައިގެންފަ އެވެ.

ލިބަރަލް ޕާޓީއާ 2013 ވަނަ އަހަރު ހަވާލުވެވަޑައިގަތުމުގެ ކުރިން، މިހާރު އުމުރުން 53 އަހަރުގެ ޓްރޫޑޯ އަކީ ސިޔާސީ މައިދާނުގައި އިސްކޮށް އުޅުއްވި ބޭފުޅެއް ނޫނެވެ. އޭރު ސިޔާސީ ގޮތުން އޭނާއާ އޮތް ގުޅުމެއްގެ ގޮތުގައި އޮތީ ބައްޕާފުޅު ޕިއޭ އެލިއަޓް ޓްރޫޑޯ އަކީ ކެނެޑާގެ އެންމެ މަޝްހޫރު އެއް ބޮޑުވަޒީރަށް ވުމެވެ.

ނަމަވެސް މޫސުމަށް އަންނަ ބަދަލުތަކުގެ އިތުރުން ކެނެޑާގެ ރައްޔިތުންނަށް ކުރިމަތިވަމުން އަންނަ އާ މައްސަލަތަކާ ދެކޮޅަށް ޓްރޫޑޯގެ ޒުވާން ހަކަތަ އިސްކުރުމުން، 2015 ވަނަ އަހަރު ވަނީ ކޮންޒަވޭޓިވް ބޮޑުވަޒީރު ސްޓެފަން ހާޕާ މަގާމުން ދުރުކުރުމަށް މަގުފަހިވެފަ އެވެ.

ނުވަ އަހަރަށް ވުރެ ގިނަ ދުވަހު ވެރިކަން ކުރައްވާފައި ވާއިރު ލިބަރަލް ޕާޓީގެ ތެރޭގައި ޓްރޫޑޯއަށް އޮތް ތާއީދު މިދިޔަ އަހަރުން ފެށިގެން ދަނީ ކުޑަވަމުންނެވެ.