މާލެ ފެނުއަޑީގައި 9 ގަޑިއިރު: އާއްމުންގެ މުދަލަށް ބޮޑެތި ގެއްލުންތަކެއް!

ގުގުރުމާ އެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް، މެޓު އޮފީހުން ވަނީ މިއަދަށް އޮރެންޖް އެލާޓް ނެރެފަ އެވެ. މިއަދު ހެނދު ވާރޭ ވެހެން ފެށިގޮތަށް ހަވީރާ ހަމައަށް މެދުނެކެނޑެ އެވެ. ވާރޭ ބޯކޮށްލީ ހަވީރު 5-6 އާ ދޭތެރޭގަ އެވެ. އެއާއެކު ވަރަށް ބޮޑަށް މާލޭގައި ފެންބޮޑުވެ "އަޑިއަށް" ދިޔައީ އެވެ.

މިއީ، މި ފަހުގެ ތާރީހެއްގައި މާލެއަށް ނުކުރާ ވަރުގެ ބޯވިއްސާރައެކެވެ.

މާލެއަށް މިއަދު ހެނދުނުން ފެށިގެން މެދުނުކެނޑި ވެހުނު ވާރޭގައި ގަޑިއިރެއްގެ ތެރޭގައި ރެކޯޑު އަދަދަކަށް ވާރޭވެހުނެވެ. މިއަދު ހަވީރު 5 އިން 6 އަށް އެންމެ ބޯކޮށް ވެހުނުއިރު 60 މިލިމީޓަރުގެ ވާރޭ ވެހުނު ކަމަށް މެޓުން ބުނެ އެވެ.

ހަވީރުއްސުރެ، މާލޭގެ މަގުތަކުގައި ހަރަކާތްތެރިވަމުން އަންނަ "މިހާރު"ގެ ފޮޓޯ ޖާނަލިސްޓުން ބުނި ގޮތުގައި އެންމެ ބޮޑު ގެއްލުމެއް ލިބުނީ ވާރޭގައި އަބަދުވެސް އެންމެ ބޮޑަށް ފެންބޮޑުވާ މާފަންނުކޮޅަށެވެ. މަޖީދީމަގާ އެކު އެ ސަރަހައްދުގައި ފެންބޮޑުވެ ގިނަ ގެތަކަށް ފެން ވަދެ ގޭތެރޭގައި ބޭނުންކުރާ ސާމާނަށް ގެއްލުންތަކެއް ވި އެވެ. ބައެއް ގެތަކުން ކަރަންޓް ކަނޑައިގެން ދިޔަ އެވެ. އަނެއް ބައި ގޭގެ ލިފްޓަށް ފެން ވަދެ ގެއްލުން ވި އެވެ.

"މެންދުރު ފަހު ތިނަކުން ފެށިގެން ބައެއް މަގުތަކުގައި ފެންބޮޑުވި. ހަވީރުކޮޅު މުޅި މާލޭގައި ފެންބޮޑުވި ގޮތަށް އަދިވެސް [މިރޭ 11 ޖެހިއިރު ވެސް] ބައެއް ސަރަހައްދުތަކުގައި ފެން ނުހިނދޭ،" ފޮޓޯ ޖާނަލިސްޓް ނިޝާން އަލީ ބުންޏެވެ.

"އާއްމުން ވަރަށް މަސައްކަތްކުރި ގެތަކާއި ފިހާރަތަކަށް ފެން ވަނުމުން ސަލާމަތްކުރަން. އެކަމަކު ބައެއް ފިހާރަތަކަށް ބޮޑެތި ގެއްލުންތަކެއް ލިބުނު. ވަރަށް ގިނަ ބައެއްގެ ސައިކަލްތައް ވެސް ހުއްޓި، ސްޓާޓް ވެސް ނުވެ އެބަހުރި."

މަޖީދީމަގުގެ ގިނަ ފިހާރަތަކަށް ފެން ވަދެ މުދަލަށް ގެއްލުން ލިބުނެވެ. އޭގެތެރޭގައި ބަންކާ މޯބައިލް ފިހާރަ އާއި މިލިއަން ބުކްޝޮޕު ހިމެނޭ ސަރަހައްދުގެ ހެދުން ފިހާރަތަކާއި ބޫޓު ފިހާރަތައް ވެސް ހިމެނެ އެވެ.

އެ ސަރަހައްދުގައި ފިހާރަ ހިންގާ ބައެއް މީހުން ބުނި ގޮތުގައި، ވިޔަފާރި ހުއްޓުމުގެ އިތުރަށް ހަރުތަކުގައި ހުރި މުދަލަށް ވަރަށް ބޮޑަށް ގެއްލުންވި އެވެ. ކަބަޑުތަކަށް ފެނުގެ އަސަރުކޮށް އެއްކޮށް ހަލާކުވެފައިވާ ކަމަށް ވެސް ބައެއް މީހުން ބުންޏެވެ.

"ބޯކޮށް ވާރޭވެހިއްޖެއްޔާ އަބަދުވެސް ފެންބޮޑުވެ، ފިހާރައަށް ގެއްލުންވޭ. ސިފައިންނަށް ރިޕޯޓުކޮށްގެން ވެލި ބަސްތާ ގެނެސްދިންއިރު މިރޭ 10 ޖަހާނެ. އޭރު ވާނެ އެއްޗެއްވެއްޖެ،" ލިބުނު ގެއްލުން ބޮޑުވުމުން ހިތްހަމަނުޖެހިފައި ހުރި ވިޔަފާރިވެރިއަކު ބުންޏެވެ.

މާފަންނުގެ ގިނަ ފިހާރަތަކަށް ފެން ނުވަންނާނެ ހެން އަމިއްލައަށް ވެލި ބަސްތާ ޖެހި އެވެ. އަދި ފިހާރަ މުވައްޒަފުން ތިބީ ހުއްޓާނުލައި ފިހާރަތަކުން ފެން ބޭރުކުރުމުގަ އެވެ.

ފިހާރަތަކުގެ އިތުރުން ގިނަ އަދަދެއްގެ ގެތަކަށް ފެނުގެ އަސަރުކޮށްފައިވެ އެވެ.

މޯލްޑިވްސް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެމްޑީއެމްއޭ) އިން ބުނީ މާލޭގައި ފެންބޮޑުވުމާ ގުޅިގެން ވެލިބަސްތާ ޖެހުމަށާއި އެކި ގޮތްގޮތުން އެހީތެރިކަން ބޭނުންވެގެން 400 އަށް ވުރެ ގިނަ ކޯލު އެ އިދާރާއަށް މިއަދު ލިބުނު ކަމަށެވެ.

އެންޑީއެމްއޭ އިން ބުނި ގޮތުގައި ރެޕިޑް އެސެސްމަންޓް ހެދުމަށް ފަހު ބޮޑަށް އެހީތެރިކަން ބޭނުންވާ 35 ގެއެއްގެ މީހުންނަށް އެހީވުމާއި އެހެން ތަންތަނަށް ބަދަލުކުރުމަށް ކުރަންޖެހޭ މަސައްކަތް ވެސް އަންނަނީ ކުރަމުންނެވެ.

މާލޭގެ ގިނަ މަގުތަކެއްގައި ފެން ބޮޑުވެ އާއްމު ދަތުރުތަކަށް ވެސް ވަނީ ހުރަސްއެޅިފަ އެވެ. އާންމުކޮށް ފެންބޮޑުނުވާ އަދި މިފަހުން ހަދާފައިވާ އަމީނީ މަގުގެ ބްރިޖާ ދިމާލުން ވެސް ވަރަށް ބޮޑަށް ފެންބޮޑުވި އެވެ. ކަކުލުން މައްޗަށް އެ ސަރަހައްދުގައި ފެންބޮޑުވެފައި އޮތްއިރު އާންމުކޮށް ވާރޭވެހިއްޖެ ނަމަ، ފެންބޮޑުވާ ހިސާބުތަކުގައި ވެސް އެވަރަށް ފެންބޮޑުވެފައި އެބަ އޮތެވެ.

ފެންބޮޑުވުމުގެ ސަބަބުން ސައިކަލުތައް ހުއްޓި އުޅަނދުތަކަށް ބޮޑެތި ގެއްލުންވަމުންދާ ކަމުގެ ޝަކުވާ ދަނީ ކުރަމުންނެވެ.

ވަރަށް ބޮޑަށް މަގުތަކުގައި ފެންބޮޑުވެފައިވާތީ އާންމު ހާލަތަށް ބަދަލުވަންދެން މަގުތަކުގައި ބަރު އުޅަނދު ނުދުއްވަން ފުލުހުން ވަނީ އިލްތިމާސްކޮށްފަ އެވެ.

މާލޭގެ އެކި ސަރަހައްދުތަކުން ޕަމްޕު ޖަހައިގެން ފެން ހިންދުމުގެ މަސައްކަތް މިހާރު ވެސް އެމްއެންޑީއެފުން ކުރަމުން އެބަދެ އެވެ. އެންމެ ފަހުން އެމްއެންޑީއެފުން ހިއްސާކުރި މައުލޫމާތުގައިވާ ގޮތުން މިރޭ 8:30 ގެ ނިޔަލަށް މުޅި މާލެއިން 9،917 ޓަނުގެ ފެން ބޭރުކޮށްފައިވެ އެވެ.

މާލޭގައި ފެންބޮޑުވެ ލިބުނު ގެއްލުންތަކާ ގުޅިގެން ކަންބޮޑުވުން ފާޅުކުރި ބައެއް މީހުން ބުނި ގޮތުގައި މިހާ ބޮޑަށް މޫސުން ގޯސްވާނެ ކަމަށް ދުރާލައި މެޓުން ލަފާކޮށްފައި އޮތްއިރު ވެސް އިދާރާތަކުން ތައްޔާރެއް ނުވެ އެވެ.

"ފެންބޮޑުވެ ކަރުތާފެނަށް އަރަން ދެން ޕަންޕު ނުޖަހާ މަޑުކޮއްގެން މި ތިބެނީ. މެޓުން އެބަ ބުނޭ ވިއްސާރަވާނެއޭ ވާރޭ ވެހޭނެއޭ އޮރެންޖް އެލާޓޭ،" ބޯވާރެއާ ގުޅިގެން "މިހާރު" ގައި ލިޔެފައިވާ ޚަބަރަކަށް ހިޔާލު ފާޅުކުރި މީހަކު ބުނެފައިވެ އެވެ.

މާލޭގެ އިތުރުން ބޯކޮށް ވާރޭހެހުމާއި އުދައިގެ ސަބަބުން ބައެއް ރަށްތަކަށް ވެސް ބޮޑެތި ގެއްލުންތަކެއް ވަނީ ލިބިފަ އެވެ.

ބޯވާރޭ އާއި އުދައިގެ ސަބަބުން ގެއްލުންވި ރަށްތައް:

- ށ. ނަރުދޫ

- ރ. އިނގުރައިދޫ

- ފ. ނިލަންދޫ

- ފ. މަގޫދޫ

ދ. ކުޑަހުވަދޫ

ދ. މީދޫ

އެ ރަށްތަކަށް ވެސް ސިފައިން އެހީތެރިވަމުން އެބަދެ އެވެ. މަގުތަކުގައި ފެންބޮޑުވެ، ގެތަކަށް ފެން ވަނުން ހުއްޓުވުމަށް ވެލިބަސްތާ ޖެހުމުގެ މަސައްކަތްކޮށްފައިވެ އެވެ.

މިއަދު ހަވީރު ދެ ފަހަރެއްގެ މަތިން އޮރެންޖް އެލާޓް ނެރުމަށް ފަހު މެޓުން މިރޭ ވަނީ ނ. އަތޮޅުން ފެށިގެން ލ. އަތޮޅަށް ޔެލޯ އެލާޓް ނެރެފަ އެވެ. ބޯކޮށް ވާރޭވެހުމާ އެކު ގުގުރުމާއި ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް ގަދަވާނެ ކަމަށް މެޓުން ލަފާކޮށްފައިވެ އެވެ.