ނިލަންދޫގައި ފެން ނުވަންނަ ގެއެއް މަދު, ގެއްލުން ބޮޑު!

ރާއްޖެއަށް އިއްޔެ ކުރި ގަދަ ވިއްސާރާގައި އެންމެ ބޮޑުވަރުވި އެއް ރަށް ކަމަށްވާ ފ. ނިލަންދޫގައި ފެންބޮޑުވުމުގެ ސަބަބުން ފެނުގެ އަސަރު ނުކުރާ ގެއެއް މަދު ކަމަށް ކައުންސިލުން މިއަދު ބުނެފި އެވެ.

ކައުންސިލްގެ ރައީސް އަލީ އަހުމަދު، "މިހާރު" އަށް ވިދާޅުވީ އިއްޔެ ހެނދުނު 6 އިން ފެށިގެން މެންދުރު 2 އާ ހަމައަށް ހުއްޓާނުލައި ބޯކޮށް ވާރޭވެހުނު ކަމަށެވެ.

ނިލަންދޫގައި 286 ވަރަކަށް ގެ ހުންނައިރު ރަށުގެ 85 ޕަސެންޓް ގެއަށް ފެނުގެ އަސަރުކޮށްފައިވާ ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ގޭގޭގައި ހިފައި ގެންގުޅޭ ސާމާނަށް ވަރަށް ބޮޑަށް ވަނީ ގެއްލުންވެފަ އެވެ. ގޭގޭގައި ހުރި ވަރަށް ގިނަ ފަރުނީޗަރު ފެނުގެ ސަބަބުން ހަލާކުވެފައިވާ ކަމަށް އޭނާ ވިދާޅުވި އެވެ. ނިލަންދޫން އާންމުވެފައިވާ ވީޑިއޯތަކުން ފެންނަ ގޮތުގައި ވެސް ގެތަކުގެ ސިޓިންރޫމާއި ކޮޓަރިތަކަށް ފެން ވަދެގެން، ބާލިދީ ޖަހައިގެން ފެން ހިންދުމުގެ މަސައްކަތް ކުރާ މަންޒަރު ފެނެ އެވެ.

ރަށުގެ އެކި ސަރަހައްދުތަކުން ކޯރު ކަނޑައިގެން މިހާރު ވަނީ ރަށުން ފެން ހިންދައިފަ އެވެ.

ގޭގެއަށް ލިބިފައިވާ ގެއްލުން ވަޒަންކުރުމުގެ މަސައްކަތް މިހާރު ކުރަމުން އަންނަ ކަމަށް ވެސް ވިދާޅުވި އެވެ.

"ރަށުގެ އެކި މުއައްސަސާތަކުން ނުކުމެ ކޯރުކަނޑައިގެން ފެން ހިންދާފައި ވަނީ. މިއަދު މޫސުން އޮތީ ވަރަށް ރީއްޗަށް. އަޅުގަނޑުމެން މިހާރު މައުލޫމާތު އެއްކުރަން ނިކުމެގެން މިއުޅެނީ ގޭގެއަށް ސީދާ ލިބިފައި ހުރި ގެއްލުންތައް ސާފުކުރުމަށް،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި ރަށުގެ ނަރުދަމާގެ ނިޒާމު އޮތް ގޮތުގެ ސަބަބުން ވަނީ، ފެން ބޮޑުވުމާ އެކު މަގުތަކަށް ނަޖިސް ވެސް ބޭރުވެފަ އެވެ.

ނިލަންދޫގެ އިތުރުން އެ އަތޮޅު މަގޫދޫގައި ވެސް ވަރަށް ބޮޑަށް ފެންބޮޑުވި އެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ރޭ އާންމުކޮށްފައިވާ މައުލޫމާތުން ދައްކާ ގޮތުގައި މަގޫދޫގެ ނުވަ ގެއަކަށް ގެއްލުންވި އެވެ. އޭގެ ތެރެއިން އެއް ގެއިން މީހުން ބަދަލުކުރަން ޖެހުނު ކަމަށް ވެސް އެންޑީއެމްއޭ އިން ބުންޏެވެ.

ގެއްލުން ލިބުނު އިތުރު ރަށްރަށް:

- ދ. ކުޑަހުވަދޫ - 10 ގެއަކަށް ފެން ވަދެގެން ގެއްލުންވި.

- ދ. މީދޫ - 10 ވަރަަކަށް ގެއަށް ގެއްލުންވި.

- އދ. މާމިގިލި - 4 ގެއަކަށް ބޮޑެތި ގެއްލުންތަކެއް ލިބުނު.

- ކ. ގުރައިދޫ - 60 ގެއަކަށް އެކި ވަރުގެ ގެއްލުން ލިބުނު.

- ފ. ފީއަލި - ފެންބޮޑުވެ، އެއް ގެއަކުން މީހުން ބަދަލުކުރި.

- ކ. ހިންމަފުށި - 60 ޕަސެންޓް ގެތަކުގައި ފެންބޮޑުވި.

- ރ. އިނގުރައިދޫ އާއި ށ. މަރޮއްޓަށް އުދަ އަރައި އެކި ވަރުގެ ގެއްލުން ލިބުނު.

އެންޑީއެމްއޭއަށް ކުރި ރިޕޯޓުތައް:

- މާލޭގައި ފެންބޮޑުވެގެން 774 ތަނަކުން ރިޕޯޓްކުރި. އޭގެ ތެރެއިން 554 ތަނަކުން އެދުނީ ވެލި ބަސްދާ ޖަހައިދޭން

- ޒަރޫރީ ބޭނުންތަކަށް ހުރަސް އެޅިގެން 53 ގެއެއްގެ ރެޕިޑް އެސެސްމަންޓް، އެންޑީއެމްއޭ އާއި ދިވެހި ރެޑްކްރެސެންޓް އާއި ފުލުހުން ކުރިއަށް ގެންގޮސްފައިވޭ.

- އާންމު ދިރިއުޅުމަށް ހުރަސް އެޅޭ ހާލަތުގައި ހުރި 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދިން.

މެޓުން ބުނީ މިއަދު އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަކޮށް، ބައެއް ރަށްތަކަށް ގުގުރުމާ އެކު ބޯކޮށްވާރޭވެހޭނެ ކަމަށެވެ. އަދި ކުރިއަށް އޮތް 48 ގަޑިއިރުގެ ތެރޭގައި ރާއްޖޭގެ މޫސުން ދާނީ މަޑުމަޑުން ރަނގަޅުވަމުން ކަމަށް ވެސް ބުންޏެވެ.