ޗުއްޓީއަށާ އެކު، އެއް އާއިލާގެ 40 މީހުން އުމްރާ އަށް!

މި ޑިސެމްބަރު މަހުގެ އުމްރާގެ އަޅުކަން އަދާކުރުމަށް ދިވެހި އެއް އާއިލާއަކުން 40 މީހުން ސައުދީ އަރަބިއްޔާއަށް ހިނގައްޖެ އެވެ.

ފުވައްމުލަކަށް ނިސްބަތްވާ މި އާއިލާ ސައުދީ އަށް ދިޔައީ މި މަހުގެ 16 ގަ އެވެ.

އުމުރުން 70 އަހަރުގެ މީހަކު ހިމެނޭ ގޮތަށް އާއިލާގެ އެކި އުމުރުފުރާގެ ޖުމްލަ 40 މީހުން މި އުމްރާ ދަތުރުގައި ބައިވެރިވެ އެވެ.

ސައުދީގައި މިވަގުތު ހުރި އެ އާއިލާގެ މީހަކު "މިހާރު" އަށް މިއަދު ބުނީ އުމްރާ ދަތުރުގައި ބައިވެރިވުމަށް އާއިލާގެ ގިނަ ބަޔަކު ބޭނުންވިޔަސް އެކި ސަބަބުތަކާ ހުރެ އަދިވެސް ބައެއް މީހުންނަށް ދަތުރުގައި ބައިވެރި ނުވެވޭ ކަމަށެވެ.

މި އާއިލާ އިން އުމްރާގެ އަޅުކަން އަދާކުރީ އެ މީހެއްގެ ހަރަދެއް އެ މީހަކު އަމިއްލަ އަށް ހަމަޖައްސާ ގޮތަށެވެ. އުމްރާގެ އަޅުކަމަށް ދިޔަ އެ 40 މީހުންގެ ތެރޭގައި އެއްބަނޑުއެއްބަފާ މީހުންނާއި ބޮޑުބޭބެއިންނާއި ބޮޑުދައިތައިން ފަދަ އާއިލީ ގޮތުން ވަރަށް ގާތް މީހުން ހިމެނެ އެވެ.

އާއިލާގެ ފަރާތުން ވާހަކަ ދެއްކި މީހާ ބުނީ ރިއާދުގައި އާއިލާގެ މީހަކު ވެސް ދިރިއުޅެމުން އަންނާތީ އެ މީހުން ސައުދީ އަށް ދިޔައީ އުމްރާގެ އަޅުކަމަށް ފަހު ސައުދީގައި ޗުއްޓީ ހޭދަކުރާ ގޮތަށް ކަމަށެވެ.

"ސްކޫލު ޗުއްޓީ އަށް މި ފަހަރު އެހެން ތަނަކަށް ދިއުމުގެ ބަދަލުގައި އުމްރާ އަށް ހާއްސަ އިސް ކަމެއް ދީގެން އާއިލާ މި އައީ މިތަނަށް މިތަނުގައި ވެސް ޗުއްޓީ ހޭދަކުރެވޭ ގޮތަށް،" ކޮންމެ ޗުއްޓީއެއްގައި ވެސް އެކި ތަންތަނަށް ޒިޔާރާތްކުރާ އާއިލާގެ ފަރާތުން ވާހަކަ ދެއްކި މީހާ ބުންޏެވެ.

އެހެންވެ، ޓޫރިސްޓު ވިސާގައި އެ މީހުން ސައުދީ އަށް ދިޔައިރު އޭނާ ބުނިގޮތުގައި ދަތުރުގައި މައްކާ އާއި މަދީނާގައި 10 ދުވަސް ހޭދަކުރި އެވެ. އެ ތަންތަނުގެ ތާރީހީ އެކި ތަންތަނަށް ވެސް އެމީހުން ދިޔަ އެވެ.

އެ އާއިލާ އިން ބުނީ ސައުދީގެ އެކި ތަންތަނާ ގުޅޭ ތާރީހީ ވާހަކަތައް، އެ ގައުމުގައި ކިޔަވަމުންދާ ދިވެހި ދަރިވަރުންގެ އެހީގައި ލިބުނު ކަމަށެވެ.

ސައުދީގައި ހުންނަ ދިވެހި ސަފީރު އަހުމަދު ސަރީރު ވެސް ވަނީ މި އާއިލާއާ ބައްދަލުކުރައްވައިފަ އެވެ.