ބޮޑު ކްލަބެއްގެ ސިފަ ޖެހި އެތުލެޓިކޯ އަންނަނީ ފުޅާވަމުން

މެޑްރިޑް (ޑިސެމްބަރު 30) – ބޮޑު ކްލަބެއްގެ ސިފަ ޖެހި އެތުލެޓިކޯ އަންނަނީ އިތުރަށް ހެދި ބޮޑުވެ ފުޅާވަމުން ކަމަށް އެ ކްލަބްގެ ރައީސް އެންރީކޭ ސެރޭޒޯ ވިދާޅުވެއްޖެ އެވެ.

ސްޕެއިންގެ ކުޅިވަރު ނޫސް "އޭއެސް" އަށް ދިން އިންޓަވިއުގައި ސެރޭޒޯ ވިދާޅުވީ އޭނާގެ ކްލަބްގެ 121 އަހަރުވީ ތާރީހުގައި އެ ޓީމު މިހާރު އޮތީ އެންމެ ރަނގަޅު މަރުހަލާގައި ކަމަށެވެ.

އެ ކްލަބުން މި އަހަރު ނިންމާލީ ލަލީގާގެ އެއް ވަނައިގަ އެވެ. އޭނާ ބުނީ އެތުލެޓިކޯއިން އުފާކުރަން ޖެހޭ ގިނަ ސަބަބުތަކެއް އެބަހުރި ކަމަށެވެ.

"އަހަރު ނިމިގެންދާއިރު އެއް ވަނައިގައި ނިންމާލުމަކީ އުނދަގޫ ކަމެއްގެ ގޮތުގައި އަހަރެމެންނަށް ހީވި. އަހަރެމެންނަށް މިހާރު ފެންނަނީ މި ކްލަބަށް ކޮންމެ ކާމިޔާބެއް ވެސް ހޯދިދާނެކަން،" ފިލްމު ޕްރޮޑެކްޝަން ދާއިރާގެ މަހުޖަނުގެ ގޮތުގައި މަޝްހޫރުކަން ހޯދި ސެރޭޒޯ ވިދާޅުވި އެވެ.

އެތުލެޓިކޯގެ ކޯޗު ޑިއޭގޯ ސިމިއޭނޯގެ ކުރިމަގާ ބެހޭގޮތުން ސުވާލު އުފެދިފައިވާކަމަށް ސްޕެއިންގެ މީޑިއާތަކުން މީގެ ކުރިން ހަބަރު ފެތުރި އެވެ. އެކަމަކު އެކަހަލަ އެއްވެސް އިޝާރާތެއް ސެރޭޒޯ ނުދެ އެވެ. އޭނާ ހުރީ އާޖެންޓީނާގެ ކޯޗާ މެދު ހިތްހަމަޖެހިގެންނެވެ. ސިމިއޭނޯގެ ދައުރުގައި ހޯދީ ކާމިޔާބުތައް އޭނާ ފާހަގަ ކުރަނީ ކްލަބްގެ ތާރީހުގައި ވެސް އެންމެ ކާމިޔާބު ދުވަސްވަރުގެ ގޮތުގައެވެ.

އޭނާގެ ކޯޗުކަމުގެ ދަށުން ލަލީގާގެ ޗެމްޕިއަންކަން އެތުލެޓިކޯއިން ދެ ފަހަރު ހޯދި އެވެ. ޗެމްޕިއަންސް ލީގުގެ ފައިނަލަށް ދެ ފަހަރު ދަތުރު ކުރި އެވެ.

"ކްލަބެއްގެ ގޮތުގައި ވެސް އަހަރެމެން ވަނީ ހެދިބޮޑުވެފައި. އަދި އަހަރެމެން މިދަނީ ގިނަ ގޮތްގޮތުން ވެސް ދުވަހެއް ދުވަހަކަށް ވުރެ ބޮޑުވަމުން. މިހުރިހާ ސަބަބުތަކެއް ހުރުމުން، އަހަންނަށް ހީވަނީ އަހަރެމެން މިތިބީ މި ކްލަބްގެ ތާރީހުގައި ވެސް ހޭދަކުރާ އެންމެ ކާމިޔާބު ދުވަސްވަރުގައި ހެން،"

ރެއާލް މެޑްރިޑާއި ބާސެލޯނާއިން އެކަނި ޑޮމިނޭޓް ކުރަމުން ދިޔަ ލީގެއްގައި ތިން ވަނަ ބާރެއްގެ ގޮތުގައި އެތުލެޓިކޯ ފާހަގަވެގެން އައީ ވެސް މިދިޔަ 15 އަހަރުތެރޭގަ އެވެ.