ގެދޮރުވެރިޔާ ފްލެޓްތަކުގެ މައްސަލާގައި ދައުވާކުރަން އުޅެނީ ހައުސިން މިނިސްޓްރީގެ ކުރީގެ ބައެއް ވެރިންނަށް!

ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކުގެ މައްސަލާގައި އޭސީސީ އާއި ޕީޖީން ދައުވާ ކުރުމާ މެދު މަޝްވަރާކުރަމުން އަންނަނީ ކުރީގެ ސަރުކާރުގެ ހައުސިން މިނިސްޓްރީގެ ބައެއް އިސްވެރިންގެ މައްޗަށް ކަން "މިހާރު" އަށް އެނގިއްޖެ އެވެ.

އޭސީސީގެ އިސް އޮފިޝަލަކު ކަށަވަރުކޮށްދެއްވި ގޮތުގައި، އެ މައްސަލާގައި ދައުވާކުރަން މަޝްވަރާ ކުރެވެނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީންނާއި ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް އާއި ކުރީގެ ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު އަދި އެ މިނިސްޓްރީގެ ޑިރެކްޓާ ޖެނެރަލަކަށް އޭރު ވެސް އަދި މިހާރު ވެސް ހުންނެވި އަހްމަދު ވިޝާން ނަސީމްގެ މައްޗަށެވެ.

"މި ބޭފުޅުންގެ މައްޗަށް ދައުވާކުރުމާ މެދު ވަރަށް އަވަހަށް ގޮތެއް ނިންމޭނެ ކަމަށް ބެލެވޭ،" އޮފިޝަލް ވިދާޅުވި އެވެ.

މި މައްސަލާގައި އޭސީސީގެ އަމުރަކަށް އެ ހަތަރު ބޭފުޅުންގެ ޕާސްޕޯޓު ވެސް މިދިޔަ ހަފުތާގައި ވަނީ ހިފަހައްޓައިފަ އެވެ. އޭސީސީން މި މައްސަލަ ބަލަމުން އަންނައިރު، މިހާރު ފެންމަތިވެފައިވާ ބިންވެރިޔާ ސްކީމްގެ މައްސަލާގައި ވެސް އެ ހަތަރު ބޭފުޅުންނަށް ތުހުމަތުތައް ކުރެވެ އެވެ.

އޭސީސީން މިރޭ ނެރުނު ނޫސް ބަޔާނެއްގައި ބުނީ އެ ކޮމިޝަނުން ތަހުގީގު ކުރަމުން އަންނަ ގެދޮރުވެރިޔާ ސްކީމްގެ ފްލެޓްގެ މައްސަލާގައި ހިމެނޭ ފަރާތްތަކުގެ (ތުހުމަތުތައް ކުރެވޭ ފަރާތްތަކުގެ) މައްޗަށް ދައުވާކޮށްދިނުމާ މެދު ގޮތެއް ނިންމުމަށް ޕީޖީ އޮފީހާ އެކު ރަސްމީކޮށް ޑިއުޓީ ޕްރޮސިކިއުޝަން މަރުހަލާ ފަށާފައިވާ ކަމަށެވެ.

އާންމުންގެ މަސްލަހަތު ބޮޑު މި މައްސަލާގައި ޑިއުޓީ ޕްރޮސެކިއުޝަންގެ މަރުހަލާ ނިންމައި ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން ކުރަން ޖެހޭ މަސައްކަތްތައް އެ ކޮމިޝަނުން ވީހާ ވެސް އަވަހަކަށް ކުރަމުން ގެންދާނެ ކަމަށް އޭސީސީން ބުންޏެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، މާލޭގައި ދިރިއުޅޭތާ 15 އަހަރުވެފައިވާ މީހުންނަށް ދޭން ނިންމި ގެދޮރުވެރިޔާ ފްލެޓްތަކުގެ މައްސަލާގައި އޭސީސީން ކުރި ބޮޑު ތަހުގީގަށް ފަހު ބުނީ ފުރަތަމަ 4،000 ފްލެޓް ދޭން އޭރުގެ ހައުސިން މިނިސްޓްރީން ކަނޑައެޅި މީހުންގެ ތެރެއިން ފްލެޓަށް ހުރިހާ ޝަރުތެއް ހަމަވަނީ އެންމެ 20 ޕަސެންޓް މީހުން ކަމަށެވެ. އެހެންވެ، އެ ލިސްޓް ރިވިއު ކުރަން އެ ކޮމިޝަނުން ވަނީ މިހާރުގެ ހައުސިން މިނިސްޓްރީއަށް އަންގައިފަ އެވެ.

އޭސީސީން އެގޮތަށް އެންގުމުން ހައުސިން މިނިސްޓްރީން ވަނީ ގެދޮރުވެރިޔާ ސްކީމްގެ ފުރަތަމަ ބުރުގައި ފޯމު ހުށަހެޅި އެންމެންގެ ފޯމުތައް ރިވިއުކުރަން ނިންމައި، އެ މަސައްކަތް ފަށައިފަ އެވެ. އެއީ 20،000 އަށް ވުރެ ގިނަ ފޯމެވެ.

ކުރީގެ ސަރުކާރުން ހިންގި ބިންވެރިޔާ އަދި ގެދޮރުވެރިޔާ ސްކީމުގެ ދަށުން ޝަރުތު ހަމަނުވާ ބަޔަކަށް ބިންތަކެއް ދިން މައްސަލާގައި ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް އައްބާސް ޝަރީފް ފުލުހުންނަށާއި އޭސީސީއަށް މިދިޔަ ބުރާސްފަތި ދުވަހު ވެސް ވަނީ އަމުރެއް ކުރައްވައިފަ އެވެ.