އަކްރަމާއި އާރިފް ހިމެނޭ ގޮތަށް ހައުސިން މިނިސްޓްރީގެ ކުރީގެ ބައެއް ވެރިންގެ ޕާސްޕޯޓް ހިފަހައްޓައިފި

ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީންނާއި ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ހިމެނޭ ގޮތަށް އެ މިނިސްޓްރީގެ އިސް ބޭފުޅުންތަކެއްގެ ޕާސްޕޯޓް މިއަދު ހިފަހައްޓައިފި އެވެ.

އެނގިފައިވާ ގޮތުގައި، ޕާސްޕޯޓް ހިފެހެއްޓީ ތަހުގީގުކުރަމުންދާ މައްސަލައަކާ ގުޅިގެން އޭސީސީގެ އަމުރަކަށެވެ. އެ ބޭފުޅުންނަކީ؛

• އަކްރަމް ކަމާލުއްދީން (ކުރީގެ ސްޓޭޓް މިނިސްޓަރު)

• މުހައްމަދު އާރިފް (ކުރީގެ ސީނިއާ އެގްޒެކެޓިވް ޑިރެކްޓަރު)

• ލިރުގާމް ވަހީދު (ކުރީގެ ސީނިއާ އެގްޒެކެޓިވް ޑިރެކްޓަރު)

• އަހްމަދު ވިޝާން ނަސީމް (ޑިރެކްޓާ ޖެނެރަލް)

މި ބޭފުޅުންގެ ތެރެއިން ވިޝާންއަކީ ހައުސިން މިނިސްޓްރީގެ މިހާރުގެ ޑިރެކްޓާ ޖެނެރަލް އެވެ.

ޕާސްޕޯޓް ހިފެހެއްޓި ހައުސިންގެ ކުރީގެ އިސްވެރިންނަކީ އޭރު ހިންގި ބިންވެރިޔާ އަދި ގެދޮރުވެރިޔާ ސްކީމުން ގޯއްޗާއި ފްލެޓް ދޫކުރުމުގެ ކަންކަމުގައި އިސްކޮށް އުޅުއްވި ބޭފުޅުންނެވެ.

ބިންވެރިޔާ ސްކީމުން ގޯތި ލިބުނު މީހުންގެ ލިސްޓުގައި ނެތް ނަމަވެސް، ގޯތި ލިބުނު ކަމުގެ ރަޖިސްޓްރީ ގެންގުޅުނު މައްސަލައެއް ފަޅާއަރައި ކަމާ ބެހޭ އިދާރާތަކުން އަންނަނީ ތަހުގީގު ކުރަމުންނެވެ. އެ ލިއުން ދިނީ، ދިނީ ކުރީގެ ސަރުކާރުން ކަމަށް، އެ މައްސަލައިގައި ފުލުހުން ސުވާލުކުރި ހަ މީހަކު ތަހުގީގަށް ބަޔާން ދީފައިވާ ކަމަށް ފުލުހުން ރޭ ބޭއްވި ޕްރެސް ކޮންފަރެންސްގައި ވަނީ ބުނެފަ އެވެ.

އެހެންވެ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފްލެޓާއި ގޯތި ދިނުމުގައި އިސްކޮށް އުޅުއްވި ބޭފުޅުން ވެސް މިކަމުގައި ބައިވެރިވާ ކަމަށް ވަނީ ތުހުމަތުކުރެވިފަ އެވެ.

އަކްރަމާއި އާރިފްއަކީ ކުރީގެ ސަރުކާރުން ފްލެޓާއި ގޯތި ދިނުމަށް އުފެއްދި ހާއްސަ ކޮމިޓީގައި ވެސް އިސްކޮށް ތިއްބެވި ބޭފުޅުންނެވެ.

ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ވަނީ ގޯތީގެ ރަޖިސްޓްރީއެއް ހަދައިފަ އެވެ.

މި މައްސަލައާ ގުޅިގެން ފުލުހުން ރޭ ބޭއްވި ޕްރެސް ކޮންފަރެންސްގައި ދެއްކި ވާހަކަތަކާ ގުޅިގެން އަކްރަމް ވަނީ އެ ވާހަކަތަކަށް ރައްދު ދެއްވުމުގެ ގޮތުން އެކްސްގައި މިއަދު ޕޯސްޓެއް ވެސް ކޮށްފަ އެވެ.

އަކްރަމް ވިދާޅުވީ، ގޯތި ލިބުނު ކަމުގެ އެއްބަސްވުމެއް ކަމަށް ދެއްކުމަށް ތައްޔާރުކޮށްފައިވާ ލިޔުންތަކާ މެދު ސުވާލު އުފެދުމުން ވެސް، އެ ލިޔުންތަކުގެ ސައްހަކަން ކަށަވަރުކުރުމަށް ފޮރެންސިކް ތަހުލީލެއް ވެސް ކުރުމެއް ނެތި، ކުރީގެ ސަރުކާރުން ދޫކުރި ލިޔުމެއްގެ ގޮތުގައި ފުލުހުން ވާހަކަ ދެއްކީ ރައްޔިތުންނަށް ހަގީގަތް އޮޅުވާލުމަށް ކަމަށެވެ.

"ފުލުހުން އެ ބުނާ ފަޒީލްއާ އަޅުގަނޑާ ދުވަހަކު ވެސް ބައްދަލުވެފައެއް ނުވެ އެވެ. އަދި އެއްވެސް މުއާމަލާތެއް ވެސް އޭނާއާ ކޮށްފައި ނުވާނެ އެވެ. އެއްވެސް ކަމެއްގައި ބައްދަލުކުރަން އޭނާ އެދިފައެއް ވެސް ނުވެ އެވެ،" އަކްރަމް ވިދާޅުވި އެވެ.

ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން ނުވަތަ ގަވާއިދާ ހިލާފަށް ނުވަތަ ނުރަސްމީކޮށް އެއްވެސް ފަރާތަކަށް ކުރީގެ ހައުސިން މިނިސްޓްރީން ދޫކޮށްފައި ނުވާނެ ކަމަށް ވެސް އަކްރަމް ވިދާޅުވި އެވެ.

އަކްރަމް ވިދާޅުވި ގޮތުގައި، ސަރުކާރުގައި އޭނާ އަދާކުރެއްވި މަގާމުގެ ހައިސިއްޔަތުން ކޮށްފައިވާ މަސައްކަތްތަކާ ގުޅޭ ގޮތުން ޖަވާބުދާރީ ނުވެވޭނެ އެއްވެސް ކަމެއް ނޯންނާނެ އެވެ.

ފުލުހުންނާއި އޭސީސީން ތަހުގީގުކުރަނީ ކުރީގެ ސަރުކާރުން ހިންގި ބިންވެރިޔާ ސްކީމްގެ ދަށުން ގޯތި ލިބުމަށް ޝަރުތު ހަމަނުވާ ބަޔަކަށް، ހުޅުމާލެއިން ބިންތަކެއް ދިން މައްސަލަ އެވެ.

މި މައްސަލައާ ގުޅިގެން އެޗްޑީސީގެ ޗެއާމަން އަހްމަދު ނާސިފް (ޑީޑީ) ފިޔަވައި، ބޯޑުގެ ހުރިހާ ބޭފުޅުން ވަނީ ސަސްޕެންޑުކޮށްފަ އެވެ. އަދި، އެ ބޭފުޅުންގެ އިތުރުން މި މައްސަލައާ ގުޅުންހުރި ހައުސިން މިނިސްޓްރީގެ 10 ބޭފުޅެއް ވެސް ވަނީ ސަސްޕެންޑުކޮށްފަ އެވެ.

އެޗްޑީސީ އާއި ހައުސިން މިނިސްޓްރީގެ ބޭފުޅުން ހިމެނޭ ގޮތަށް މިހާތަނަށް 20 މީހެއްގެ ޕާސްޕޯޓް ވަނީ ހިފަހައްޓައިފަ އެވެ.