އެޗްޑީސީގެ ކޮރަޕްޝަންގެ ތަހުގީގާ ގުޅޭ ގޮތުން ފުލުހުންނާއި އޭސީސީން މަޝްވަރާކޮށްފި

ބިންވެރިޔާ ސްކީމްގައި ނުހިމެނޭ ބަޔަކަށް އެޗްޑީސީން ގޯތިތަކެއް ދިން ކަމަށް ތުހުމަތުވާ ކޮރަޕްޝަންގެ މައްސަލައިގެ ތަހުގީގު ކުރިއަށް ގެންދިއުމަށް ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) އިން މަޝްވަރާ ބައްދަލުވުމެއް މިއަދު ބާއްވައިފި އެވެ.

އެ ބައްދަލުވުން ބޭއްވީ ފުލުހުންގެ އިދާރާގަ އެވެ.

ފުލުހުން ދެންމެ އެކްސްގައި ކުރި ޕޯސްޓެއްގައި ބުނީ، ޕޮލިސް ކޮމިޝަނަރު އަލީ ޝުޖާއު، އޭސީސީގެ މެމްބަރުންނާ އެކު، މިއަދު ބައްދަލުވުމެއް ބޭއްވި ކަމަށެވެ.

އެ ބައްދަލުވުމުގައި އޭސީސީގެ ރައީސް އާދަމް ޝާމިލް ވެސް ބައިވެރިވެވަޑައިގަތެވެ.

"މި ބައްދަލުވުމުގައި ބިންވެރިޔާ ސްކީމާ ގުޅުން ހުރި ކޮރަޕްޝަންގެ މައްސަލަ ތަހުގީގުކުރުމާ ގުޅޭ ގޮތުން ފުޅާދާއިރާއެއްގައި މަޝްވަރާ ކުރެވުނު،" ފުލުހުން ބުންޏެވެ.

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވުމުން ފުލުހުންނާއި އޭސީސީން ވެސް އަންނަނީ އެ ކޮރަޕްޝަންގެ މައްސަލަ ތަހުގީގު ކުރަމުންނެވެ.

އެ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި، އޭނާއަށް ވަނީ ގޯތީގެ ރަޖިސްޓްރީއެއް ހަދައިފަ އެވެ. އޭނާގެ އިތުރުން އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން އިއްޔެ ފަޅާއެރި އެވެ.

އެ މައްސަލާގައި ފުލުހުން ވަނީ ފަޒީލްގެ މައްޗަށް ފޯޖަރީގެ ތުހުމަތުކޮށް ވެސް ތަހުގީގު ފަށައިފަ އެވެ.

ސޯޝަލް މީޑިއާގައި އާންމުވި އެ ލިޔުންތަކުން އެނގޭ ގޮތުގައި، އެއީ ސައްހަ ރަޖިސްޓްރީތަކެއް ނޫނެވެ. ބިންވެރިޔާ ސްކީމުން ފަޒީލްއަށް ގޯތި ނުލިބޭ ކަމަށް ހައުސިން މިނިސްޓްރީން ވެސް އެޗްޑީސީއަށް ވަނީ އަންގައިފަ އެވެ.

އެ މައްސަލާގައި އެޗްޑީސީގެ ޗެއާމަން އަހްމަދު ނާސިފް ފިޔަވައި، އެ ކުންފުނީގެ ބޯޑު އެއްކޮށް މިއަދު ވަނީ ސަސްޕެންޑު ވެސް ކޮށްފަ އެވެ. އޭގެ ތެރޭގައި ފަޒުލް ވެސް ހިމެނިވަޑައިގަންނަވަ އެވެ.

އެމްޑަބްލިއުއެސްސީގެ ޑީއެމްޑީ ކަމުން ފަޒީލް ވެސް މިއަދު ވަނީ ސަސްޕެންޑުކޮށްފަ އެވެ.

ބިންވެރިޔާ ސްކީމްގެ ލިސްޓުގައި ނެތް ބަޔަކަށް ހުޅުމާލެއިން ގޯތިތަކެއް ދިން ކަމަށް ބުނާ މައްސަލަ ވަރަށް ބޮޑަށް ހޫނުވުމުން އެޗްޑީސީން ރޭ ބޭއްވި ޕްރެސް ކޮންފަރެންސެއްގައި ފަޒުލް ވިދާޅުވީ ގޯތިތަކުގެ މައްސަލަ ފާހަގަވީ ގޯތިތަކުގެ ވަށައިފާރު ރޭނުމުގެ ހުއްދައަށް އެދި އެޗްޑީސީއަށް ހުށަހެޅުމުން، އެ ރަޖިސްޓްރީތައް ވެރިފައި ކުރުމަށް ހައުސިން މިނިސްޓްރީއަށް ފޮނުވުމުން ކަމަށެވެ. އެކަން އެނގި ތިބެ ގިނަ ދުވަސްތަކެއް ފާއިތުވެގެން ދިޔަ ނަމަވެސް، އެޗްޑީސީން މި މައްސަލަ އޮތީ ސިއްރުކޮށްފަ އެވެ.

ފަޒުލް ވިދާޅުވީ، ބިންވެރިޔާ ސްކީމަށް ޝަރުތު ހަމަނުވަނީސް އޭނާގެ ބޭބެ ފަޒީލް ޝަރުތު ހަމަވާ ކަމަށް ހަދައި، ރަޖިސްޓްރީއެއް ހެދުމަކީ އިއްތިފާގެއް ކަމަށެވެ. އެ މައްސަލަ ހައުސިން މިނިސްޓްރީގެ ސަމާލުކަމަށް ވެސް ގެނައީ އެޗްޑީސީން ކަމަށް ފަޒުލް ވިދާޅުވި އެވެ.