ބިޑް އުސޫލާ ހިލާފަށް ހުޅުމާލެއިން ބިން ވިއްކި ވާހަކަ އެޗްޑީސީން ދޮގުކޮށްފި

ހުޅުމާލެއިން ދިރިއުޅުމުގެ ބޭނުމަށް ވިއްކާ ބައެއް ބިންތައް ބީލަމުގެ އުސޫލާ ހިލާފަށް ވިއްކާފައިވާ ކަމަށް ބުނެ ދެއްކެވޭ ވާހަކަތައް އެޗްޑީސީން މިރޭ ދޮގުކޮށްފި އެވެ.

އެ ކުންފުނިން ނެރުނު ނޫސްބަޔާނެއްގައި ބުނީ، ދިރިއުޅުމުގެ ބޭނުމަށް ހުޅުމާލެ އިން ވިއްކުމަށް އިއުލާން ކޮށްފައިވާ ބައެއް ބިންތައް ބީލަމުގެ އުސޫލާ ހިލާފަށް ވިއްކާފައިވާ ކަމަށް ތުހުމަތުކޮށް، އެޗްޑީސީގެ އިތުބާރު ގެއްލޭ ގޮތަށް ފަތުރަމުން ދަނީ ދޮގު ވާހަކަތަކެއް ކަމަށެވެ.

ދިރިއުޅުމުގެ ބޭނުމަށް ހުޅުމާލެ އިން ވިއްކާފައި ވަނީ އާންމުކޮށް އިއުލާންކުރުމާ އެކު، ހުޅުވާލާފައިވާ ބިޑިން ޕްރޮސެސްއެއްގެ ތެރެއިން ކަމަށް އެ ކުންފުނިން ބުންޏެވެ.

އެޗްޑީސީން ބުނީ ބިން ގަތުމުގެ ފުރަތަމަ މަރުހަލާއަކީ ކަނޑައެޅޭ ބިމަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުން ކަމަށާއި އެ އަށް ފަހު އީއޯއައި ހުށަހަޅާ މީހުންނަށް ބިޑް ކުރުމަށް ހުޅުވާލާ ކަމަށެވެ. ބިން ގަތުމުގެ ފުރުސަތު ދީފައި ވާނީ ބިޑް ކުރުމަށް ކަނޑައެޅި ވަގުތު ނިމޭއިރު، އެންމެ މަތީ އަގު ހުށަހެޅި މީހާ އަށް ކަމަށް ވެސް އެ ކުންފުނިން ބުންޏެވެ.

"ބިން ގަތުމަށް އީއޯއައި ހުށަހެޅޭނީ އިއުލާން ކޮށްފައިވާ ބިމުގެ ބޭސް ރޭޓަށް ވުރެ ދަށް ނޫން އަގެއްގަ އެވެ. ބޭސް ރޭޓްގެ ގޮތުގައި ކަނޑައަޅާފައި ވަނީ މި ކޯޕަރޭޝަންގެ ބޯޑް އޮފް ޑިރެކްޓަރުން އެންޑޯޒް ކޮށްފައިވާ ރޭޓުތަކެކެވެ،" އެ ބަޔާނުގައިވެ އެވެ.

އެ އުސޫލުން ވިއްކި ތިން ބިމެއްގެ މައުލޫމާތު އެޗްޑީސީގެ ނޫސްބަޔާނުގައި ވަނީ ހިމަނައިފަ އެވެ. އަދި އެ ބިންތަކަށް ލިބުނު ބިޑުތަކުގެ އަދަދާއި އީއޯއައި ހުށަހެޅި ތާރީހާއި އެކި މީހުން ހުށަހެޅި އަގުތަކާއި ބިމުގެ ބޮޑުމިން އަދި ބިޑު ކާމިޔާބުކުރި އަގު ވެސް، ނޫސްބަޔާނުގައި ހިމަނާފައިވާ ތާވަލެއްގައިވެ އެވެ.

އެޗްޑީސީން މި ބަޔާން ނެރުނީ ރައްޔިތުންގެ މަޖިލީހުގެ ޕީއެންސީގެ ބައެެއް މެންބަރުންނާއި މި ސަރުކާރުގެ ބައެއް ވެރިންނަށް ހުޅުމާލެ އިން ނުއަގުގައި ބިންތަކެއް ވިއްކާލި ކަމަށް ބުނެ ސޯޝަލް މީޑިއާގައި އަޑު ފެތުރިފައިވާ ދަނޑިވަޅެއްގަ އެވެ.

ބިންވެރިޔާ ސްކީމަށް ޝަރުތު ހަމަނުވާ ބަޔަކަށް އެ ކުންފުނިން ބިންތަކެއް ދިން މައްސަލައެއް ވެސް މިފަހުން ވަނީ ފެންމަތިވެފަ އެވެ. އެ މައްސަލަ ހޫނުވެ، ފުލުހުންނާއި އޭސީސީން މިހާރު އަންނަނީ ތަހުގީގު ވެސް ކުރަމުންނެވެ. އެ ބިންތަކުގެ މައްސަލާގައި ތަހުގީގީ އިދާރާތަކުން ކުރާ މަސައްކަތަކަށް ފުރުސަތު ދިނުމުގެ ގޮތުން ކަމަށް ވިދާޅުވެ، އެ މައްސަލާގައި ސަސްޕެންޝަނުގައި ހުންނެވި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ މިރޭ މަގާމުން އިސްތިއުފާ ވެސް ދެއްވައިފަ އެވެ. އެ ތަހުގީގަށް އޭނާ އާއި އެޗްޑީސީ އާއި ހައުސިން މިނިސްޓްރީގެ 20 މުވައްޒަފަކު ހިމެނޭ ގޮތަށް ބައެއް މީހުންގެ ޕާސްޕޯޓް ވެސް ވަނީ ހިފަހައްޓައިފަ އެވެ.