އެޗްޑީސީގެ 15 މުވައްޒަފަކު ވަކިކޮށްފި

ގެދޮރުވެރިޔާ/ބިންވެރިޔާ ސްކީމާ ގުޅޭ ގޮތުން ޕްރޮސެކިއުޓާ ޖެނެރަލް އައްބާސް ޝަރީފްގެ އަމުރަކަށް ފުލުހުންނާއި އޭސީސީ ގުޅިގެން ހިންގާ ޖިނާއީ ތަހުގީގަށް މަގުފަހި ކުރުމަށްޓަކައި އެ ކުންފުނީގެ 15 މުވައްޒަފަކު މިއަދު ވަކިކޮށްފި އެވެ.

"މިހާރު" އަށް އެނގިފައިވާ ގޮތުގައި ވަކިކުރި މުވައްޒަފުންގެ ތެރޭގައި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނެ އެވެ. އޭގެ އިތުރުން ބައެއް މުވައްޒަފުން ވެސް މިހާރު ވަނީ ސަސްޕެންޑް ކޮށްފަ އެވެ.

ފާއިދާއި ޔާމީން ވެސް ވަނީ މިދިޔަ ބުރާސްފަތި ދުވަހުން ފެށިގެން ސަސްޕެންޑްކޮށްފަ އެވެ.

"މިހާރު" އަށް އެނގިފައިވާ ގޮތުގައި މިހާތަނަށް ވަކިކުރި 15 މުވައްޒަފުންގެ ތެރެއިން އެންމެ މީހެއް ފިޔަވައި އެންމެންނަކީ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ވަރަށް ގާތް މީހުންނެވެ.

ބިންވެރިޔާ ސްކީމްގެ މައްސަލަތަކެއް މިދިޔަ ބުދަ ދުވަހު ފެންމަތިވީ، އެޗްޑީސީގެ މެނޭޖިން ޑިރެކްޓަރުކަމުން ރޭ އިސްތިއުފާ ދެއްވި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އެ ސްކީމަށް ޝަރުތު ހަމަނުވާ ލިސްޓުގައި އޮއްވައި، ފަޒީލަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ.

އެ މައްސަލާގައި ފަޒުލްގެ މައްޗަށް ތުހުމަތުގެ އިނގިލި ދިއްކުރަން ފެށުމާ އެކު، އެޗްޑީސީގެ ބޯޑުގެ ޗެއާމަން އަހުމަދު ނާސިފް (ޑީޑީ) ފިޔަވައި ބޯޑުގެ ހުރިހާ މެމްބަރުން މިދިޔަ ބުރާސްފަތި ދުވަހުން ފެށިގެން ވަނީ ސަސްޕެންޑް ކޮށްފަ އެވެ. ބޯޑު މެމްބަރުންގެ ޕާސްޕޯޓް ވެސް ވަނީ ހިފަހައްޓައިފަ އެވެ.

ނާސިފް "މިހާރު" އަށް މިއަދު ވިދާޅުވީ، ތަހުގީގަށް ފަހިވާ ގޮތަށް އެޗްޑީސީގެ ފަރާތުން އަޅަންޖެހޭ ފިޔަވަޅުތައް އަޅަމުން އަންނަ ކަަމަށެވެ. އެހެންވެ، ފުލުހުންނާއި އޭސީސީން މިހާރު ކުރިއަށް ގެންދާ ތަހުގީގުގެ މަރުހަލާ އަށް ފަހިވާ ގޮތަށް އެ ކުންފުނީގެ އެތެރޭގެ ކަންކަން ވެސް ބައްޓަން ކުރަމުން އަންނަ ކަަމަށް އޭނާ ވިދާޅުވި އެވެ.

"އަޅުގަނޑުމެންނަށް އެންމެ މުހިންމީ ކުންފުނީގެ ޕަބްލިކް އިމޭޖު ރަނގަޅު ކުރުން. ނަޒާހަތްތެރިކަން ދެމެހެއްޓުން. އެޗްޑީސީގެ ތާރީހަށް ބަލާއިރު އެއީ އެންމެ ބޮޑެތި ކުންފުނިތަކުގެ ތެރޭގައި ހިމެނޭ ކުންފުންޏެއް. އެސްޓެބްލިޝްޑް ޕޮލިސީތަކާއި ގަވާއިދުތައް ހުންނާނެ. އެހެންވީމާ ރައްޔިތުންގެ މަސްލަހަތު ހިމާޔަތް ކުރެވޭ ގޮތަށް، ތަހުގީގަށް އެއްބާރުލުން ދޭނެ،" ނާސިފް ވިދާޅުވި އެވެ.

އެޗްޑީސީގެ ތެރެއިން ކޮރަޕްޝަންގެ މައްސަލަތަކެއް ފެންމަތިވުމާ އެކު، އެ ކުންފުނީގެ އާ މެނޭޖިން ޑިރެކްޓަކަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް މިއަދު ވަނީ އައްޔަންކޮށްފަ އެވެ. އޭނާއަކީ ހުޅުމާލެ ހިއްކަން ފަށައި އަދި ތަރައްގީ ކުރުމުގައި އެންމެ އިސްކޮށް އުޅުއްވި އެއް ބޭފުޅާ އެވެ.

ހުޅުމާލެ ހިއްކަން ފެށިއިރު މައުރޫފް ހުންނެވީ ކޮންސްޓްރަކްޝަން މިނިސްޓްރީގައި ކަމަށް ވިޔަސް ހުޅުމާލެ ޕްރޮޖެކްޓް ވިލަރެސް ކުރުމުގައި އޭނާ އިސްކޮށް ހުންނެވި އެވެ.

އޭގެ ފަހުން ރައީސް އޮފީހުގެ ދަށުން ހިންގާ ގޮތަށް ހުޅުމާލެ ޑިވެލޮޕްމަންޓް ޔުނިޓް އުފެއްދިއިރު އެ ތަނުގެ ޑިރެކްޓަ ޖެނެރަލަކަށް ނުވަތަ އެންމެ އިސްކޮށް ހުންނެވީ ވެސް މައުރޫފެވެ. އަދި އެޗްޑީސީ އުފެއްދުމާ އެކު، އެ ކުންފުނީގެ ސީއީއޯގެ މަގާމު ދުވަސްކޮޅަކަށް ފުރުއްވި އެވެ. މައުރޫފް އެޗްޑީސީން ވަކިވެވަޑައިގަތީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ ފަހު ދައުރުގައި ކޮންސްޓްރަކްޝަން މިނިސްޓަރަކަށް އައްޔަން ކުރެއްވި ހިސާބުންނެވެ.

އެޗްޑީސީގެ ޗެއާމަނަކަށް މިދިޔަ މަހު އައްޔަންކުރި ނާސިފް ވިދާޅުވީ، އާ މެނޭޖިން ޑިރެކްޓަރާ އެކު، ކުންފުނީގެ އިތުބާރު އިތުރު ކުރަން މެނޭޖުމަންޓުން މަސައްކަތްތައް ކުރާނެ ކަމަށެވެ.