ޒުހޫރުގެ ސިޓީއެއް އަޅުގަނޑަށް ނުލިބޭ، ލިބުނު ނަމަ ފިޔަވަޅު އަޅާނަން: ރައީސް

އެޗްޑީސީގައި ހުރި މައްސަލަތައް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ފޮނުއްވި ކަމަށް ބުނާ ސިޓީ ލިބިވަޑައިނުގަންނަވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އޮފީހުގެ ބޭރުގައި މިއަދު މެންދުރުފަހު ބައެއް ނޫސްވެރިންނާ ބައްދަލުކުރައްވައި ރައީސް ވިދާޅުވީ އެފަދަ ސިޓީއެއް ލިބިވަޑައިގެންނެވި ނަމަ ޔަގީނުން މާ ކުރިން މި މައްސަލާގައި ފިޔަވަޅު އަޅުއްވާނެ ކަމަށެވެ.

ރައީސް ވިދާޅުވީ ކޮރަޕްޝަން ހިންގައި، ގަވާއިދާ ހިލާފަށް ކުރާ ކަމެއް ހުއްޓުވުމުގައި އެ މަނިކުފާނު ފަހަތަށް ޖެހިވަޑައިނުގަންނަވާނެ ކަމަށެވެ. އެ މަނިކުފާނުގެ ވެރިކަމުގައި މިދިޔަ ދުވަސްތަކުގައި ވެސް ހުންނާނީ އެކި ކަންތަކުގައި، އެކި މީހުން އެގޮތަށް ކޮށްފައި ހުރި ކަންކަމުގެ މައުލޫމާތު ލިބިވަޑައިގަތުމުން އެކަމަށް ފިޔަވަޅު އަޅައި، ކަމާބެހޭ ފަރާތްތަކަށް އަންގާފައި ކަމަށް ރައީސް މުއިއްޒު ވިދާޅުވި އެވެ.

"ސިޓީއެއް އަޅުގަނޑަށް ލިބި، އަމަލުނުކޮށް އޮތް ކަމަށް ބުނެ ދައްކާ ވާހަކައަކީ ހަގީގީ ވާހަކައެއް ނޫން، ލިބިފައެއް ނެތް ސިޓީއެއް،" ރައީސް ވިދާޅުވި އެވެ.

"އަޅުގަނޑަށް ކަންކަން އެނގުނު ހިސާބުން ކޮންމެ ކަމެއްގައި ވެސް ހުންނާނީ ފިޔަވަޅު އަޅައިފައި. މިހާރު މި ހިނގައިގެން އުޅޭ ކަންތައްތަކުގައި ވެސް އަޅުގަނޑަށް އެނގުނު ހިސާބުން ޕޮލިހަށް އަންގާފައި، އެ ބޭފުޅުންގެ ގާނޫނީ ޒިންމާ އެ ބޭފުޅުން އަދާކުރައްވާނެ."

މި ސަރުކާރަކީ ކޮރަޕްޝަނާއި ފަސާދަ އާއި ނުގަވާއިދުން ހިނގާ ކަންކަމާ ދުރުވެފައި އޮތް ސަރުކާރަކަށް ހެދުމަކީ އެމަނިކުފާނުގެ ވައުދެއް ކަމަށާއި އެ ވައުދުގެ މަތީގައި ދެމިހުންނެވި ކަމަށް ރައީސް ވިދާޅުވި އެވެ.

"ސަރުކާރުގެ އެއްވެސް ތަނެއްގައި އަޅުގަނޑު ބޭނުމެއް ނޫން ގަވާއިދާ ހިލާފު އެއްވެސް ކަމެއް ހިނގާކަށް. އަޅުގަނޑު މަގާމުތަކަށް މީހުން ލަނީ ވައްކަންކުރާކަށް ނޫން، ކޮރަޕްޝަން ހިންގާކަށް ނޫން، ގަވާއިދާ ހިލާފު ކަމެއް ކުރާކަށް ވެސް ނޫން. އޭގެ ބަދަލުގައި ތެދުވެރިކަމާއި އަމާނަތްތެރިކަމާ އެކު، ރައްޔިތުންނަށް ހިދުމަތް ދިނުމަށް،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި، ކުރީގެ ސަރުކާރުތަކުގައި ކޮރަޕްޝަންގެ މައްސަލަތަކުގައި ފިޔަވަޅު އަޅައި ދޫކޮށް ނުލިޔަސް މި ސަރުކާރުން އެގޮތަށް ކަންތައްތައް ނުކުރާނެ އެވެ. ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރާ ނަމަ، ފިޔަވަޅު އަަޅާނެ ކަމުގެ ޔަގީންކަން ވެސް ރައީސް ދެއްވި އެވެ.

"ކޮރަޕްޝަނަށް ނޯންނާނެ އެއްވެސް ފުރުސަތެއް، އެއީ ކޮންމެ މީހަކު ކަމުގައި ވިޔަސް،" ރައީސް ވިދާޅުވި އެވެ.

ޒުހޫރު، ރައީސް ޑރ. މުހައްމަދު މުއިއްޒަށް އެޑްރެސް ކުރައްވައި މިދިޔަ ޖުލައި މަހު ފޮނުއްވި ކަމަށް ބުނާ ހަތް ސަފުހާގެ ދިގު ސިޓީގައި އެ ކުންފުނީގެ ތެރޭގައި އޮތް އެތައް މައްސަލަތަކެއް ތިލަކޮށް، ކޮރަޕްޝަންގެ އެތައް އިންޒާރެއް ދެއްވާފައިވެ އެވެ. ޒުހޫރު ވިދާޅުވާ ގޮތުގައި، އެޗްޑީސީގެ އެތެރެއިން ކަންކަން ވަނީ ފައިސާ ދޭ މީހާއަށެވެ.

ރައީސްގެ ހާއްސަ އެދިވަޑައިގަތުމަކަށް އެޗްޑީސީގެ ޗެއާމަންކަމާ ހަވާލުވެވަޑައިގެންނެވި ޒުހޫރު މި އަހަރުގެ މޭ މަހު މަގާމުން ވަކިކުރި ފަހުން ރައީސަށް ފޮނުއްވި ކަމަށް ބުނާ އެ ސިޓީގައި، އެޗްޑީސީގެ އެމްޑީއަކަށް ހުންނެވި އިބްރާހިމް ފަޒުލް ރަޝީދަށް ގިނަ ތުހުމަތުތަކެއް ކުރައްވާފައިވެ އެވެ. ހައްގު ނޫން ފަރާތްތަކަށް ހުޅުމާލޭން ގޯތީގެ ހުއްދަ ދިން މައްސަލައެއް މިފަހުން ފެންމަތިވެގެން ދިޔައިރު، މި ހުރިހާ އިންޒާރެއް ޒުހޫރު އޮތީ ދެއްވައިފަ އެވެ.

މި މައްސަލަތަކުގެ ތަހުގީގަށް ފުރުސަތު ދެއްވުމަށް ކަމަށް ވިދާޅުވެ، ފަޒުލް ވަނީ އިއްޔެ މަގާމުން އިސްތިއުފާ ދެއްވައިފަ އެވެ.

ބިންވެރިޔާ ސްކީމްގައި ނެތް ބަޔަކަށް ގޯތިތަކެއް ދިން މައްސަލަ އާއި ވިނަރެސް ފްލެޓް ދިނުމާ ގުޅޭ މައްސަލަތަކުގައި އެޗްޑީސީގެ ބޯޑުގެ ޗެއާމަން އަހުމަދު ނާސިފް (ޑީޑީ) ފިޔަވައި ބޯޑުގެ ހުރިހާ މެމްބަރުން ވަނީ ސަސްޕެންޑުކޮށްފަ އެވެ. އަދި މި މައްސަލާގައި، އެ ކުންފުނިން 15 މުވައްޒަފަކު މިއަދު ވަކިކޮށްފައި ވެސް ވެ އެވެ.