މައުރޫފަށް ވަރަށް އިތުބާރުކުރަން، ކަންކަން ރަނގަޅުވާނެ: ރައީސް

އެޗްޑީސީގެ މެނޭޖިން ޑިރެކްޓަރަކަށް މިއަދު އައްޔަން ކުރެއްވި މައުރޫފް ޖަމީލަށް ވަރަށް ބޮޑަށް އިތުބާރު ކުރައްވާ ކަމަށާއި ނަޒާހަތްތެރިވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އޮފީހުގެ ބޭރުގައި މިއަދު މެންދުރުފަހު ބައެއް ނޫސްވެރިންނާ ބައްދަލުކުރައްވައި ރައީސް ވިދާޅުވީ، އެޗްޑީސީގެ މައްސަލަ އެ މަނިކުފާނުގެ ސަމާލުކަމަށް އައުމާ އެކު، ކަންކަން އިސްލާހު ކުރުމަށް ކަމާބެހޭ އިދާރާތަކާ ގުޅިގެން ފިޔަވަޅުތައް އަޅަމުން އަންނަ ކަމަށެވެ. މިހާރު އަޅަމުން އަންނަ ފިޔަވަޅުތަކާ އެކު، އެޗްޑީސީ އަށް ރަނގަޅު ބަދަލެއް އަންނާނެ ކަމަށް ޔަގީން ކުރައްވާ ކަމަށް ރައީސް މުއިއްޒު ވިދާޅުވި އެވެ.

"[ކަންކަން ރަނގަޅު ވާނެ ކަމުގެ] ވަރަށް ޔަގީންކަން އެބައޮތް. އަޅުގަނޑަށް މީގައި ބޭނުންވަނީ އެންމެންގެ ވެސް އެއްބާރުލުން. މިސާލަކަށް އެޗްޑީސީ އަށް އަޅުގަނޑު މިއަދު މި އައްޔަންކުރި، ކުރީގެ މިނިސްޓަރު މައުރޫފް ޖަމީލް. އެ ބޭފުޅާއަކީ އަޅުގަނޑު ވަރަށް އިތުބާރު ކުރާ، ފުލް އިންޓެގްރިޓީ ހިފަހައްޓާނެ ބޭފުޅެއް. ފުލް ކޮމިޓްމެންޓާއި ޕްރޮފެޝަނަލިޒަމްއާ އެކު މަސައްކަތްކުރައްވާ ބޭފުޅެއް،" ރައީސް ވިދާޅުވި އެވެ.

ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލަކީ ހުޅުމާލެ ހިއްކި ދުވަސްވަރުން ފެށިގެން ވަރަށް ގިނަ ދުވަސް ވަންދެން، އެ ތަން ތަރައްގީ ކުރުމުގައި އެންމެ އިސްކޮށް ހަރަކާތްތެރިވި ބޭފުޅެކެވެ. ހުޅުމާލެ ހިއްކަން ފެށިއިރު ކޮންސްޓްރަކްޝަން މިނިސްޓްރީގައި ހުންނަވައިގެން އެ މަޝްރޫއުގައި މައުރޫފް އިސްދައުރެއް އަދާކުރެއްވި އެވެ.

އޭގެ ފަހުން ރައީސް އޮފީހުގެ ދަށުން ހިންގާ ގޮތަށް ހުޅުމާލެ ޑިވެލޮޕްމަންޓް ޔުނިޓް އުފެއްދިއިރު އެ ތަނުގެ ޑިރެކްޓަ ޖެނެރަލަކަށް ނުވަތަ އެންމެ އިސްކޮށް ހުންނެވީ ވެސް މައުރޫފެވެ. އަދި އެޗްޑީސީ އުފެއްދުމާ އެކު، އެ ކުންފުނީގެ ސީއީއޯގެ މަގާމު ދުވަސްކޮޅަކަށް ފުރުއްވި އެވެ. މައުރޫފް އެޗްޑީސީން ވަކިވެވަޑައިގަތީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ ފަހު ދައުރުގައި ކޮންސްޓްރަކްޝަން މިނިސްޓަރަކަށް އައްޔަން ކުރެއްވި ހިސާބުންނެވެ.

ރައީސް ވިދާޅުވީ ސަރުކާރުގެ ހުރިހާ މުއައްސަސާތަކަށް ވެސް ބޭނުންވަނީ މައުރޫފް ކަހަލަ ތެދުވެރިކަމާއި ނަޒާހަތްތެރިކަމާ އެކު މަސައްކަތްކުރައްވާނެ ބޭފުޅުން ކަމަށެވެ.

"އެޗްޑީސީގައި ވެސް ކުރިއަށް އޮތް ތަނުގައި އަޅުގަނޑު ޔަގީން ކުރަނީ، މިއަދު އެ ތަނުން ބައެއް ބޭފުޅުން ވަކިކޮށްފައި ވެސް ވޭ، އަޅުގަނޑު ބޭނުމެއް ނޫން އެއްވެސް މުއައްސަސާއެއްގައި ކޮރަޕްޝަނަށް މަގުފަހިވާ ގޮތަށް ކަންކަން ވާކަށް. އަދި އެފަދަ ކަންކަން ކުރާ ފަރާތްތަކަށް ޖާގަ އޮންނާކަށް ވެސް،" ރައީސް ވިދާޅުވި އެވެ.

"އެހެން ކުންފުންޏެއްގައި ވެސް އެ ކަހަލަ ކަމެއް ހިނގަން ފުރުސަތެއް ނުދޭނަން. މިނިސްޓްރީއެއްގައި ވިޔަސް، އެހެން އޮފީހެއްގައި ވިޔަސް."

ރައީސް ވިދާޅުވި ގޮތުގައި، ފުލުހުން މިހާރު ކުރަމުން އަންނަ ތަހުގީގުން މިކަމުގައި ބައިވެރިވަނީ ކޮން ބައެއްކަން ދެނެގަނެވި، ފިޔަވަޅު އެޅޭނެ އެވެ. އަދި ކުރިއަށް އޮތް ތަނުގައި މި ކަހަލަ ކަމެއް ދިމާނުވާނެ ގޮތަށް ކަންކަން ބައްޓަންކުރާނެ އެވެ.

"އެއްގޮތަކަށް ވެސް މީހަކަށް ލިބިގެންވާ ހައްގެއް ނޫން، ކަނޑައެޅިފައިވާ އުސޫލުތަކާއި ގާނޫނުތަކާ ހިލާފަށް މީހަކަށް ގޯއްޗެއް ލިބުން، ފްލެޓެއް ލިބުން ނުވަތަ އެއްވެސް އެއްޗެއް ލިބުން. އެ ކަންކަން ހަމަޖެހިފައި އޮންނަ ގޮތަށް ކަންކަން ވާން ޖެހޭނީ،" ރައީސް ވިދާޅުވި އެވެ.

ބިންވެރިޔާ ސްކީމްގައި ނެތް ބަޔަކަށް ގޯތިތަކެއް ދިން މައްސަލަ އާއި ވިނަރެސް ފްލެޓް ދިނުމާ ގުޅޭ މައްސަލަތަކުގައި އެޗްޑީސީގެ ބޯޑުގެ ޗެއާމަން އަހުމަދު ނާސިފް (ޑީޑީ) ފިޔަވައި ބޯޑުގެ ހުރިހާ މެމްބަރުން ވަނީ ސަސްޕެންޑުކޮށްފަ އެވެ. ފަޒުލް ވެސް އިސްތިއުފާ ދެއްވި ސަސްޕެންޝަނުގައި ހުންނަވަނިކޮށެވެ. އަދި މި މައްސަލާގައި، އެ ކުންފުނިން 15 މުވައްޒަފަކު މިއަދު ވަކިކޮށްފައި ވެސް ވެ އެވެ.

އެޗްޑީސީގެ އިތުރުން، މި މައްސަލާގައި ހައުސިން މިނިސްޓްރީގެ 10 މުވައްޒަފަކު ސަސްޕެންޑުކޮށްފައިވެ އެވެ. އަދި ކުރީގެ ސަރުކާރުގެ ހައުސިން މިނިސްޓްރީގައި އިސްކޮށް އުޅުއްވި ބައެއް ބޭފުޅުން ޕާސްޕޯޓު ވެސް ވަނީ މި މައްސަލައިގެ ތަހުގީގަށް ހިފަހައްޓައިފަ އެވެ.