ތަހުގީގަށް ފުރުސަތު ދޭން ބޭނުންވެގެން ކަމަށް ވިދާޅުވެ ފަޒުލް އެޗްޑީީސީން އިސްތިއުފާ ދެއްވައިފި

އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އެ މަގާމުން މިއަދު އިސްތިއުފާ ދެއްވައިފި އެވެ.

ރައީސް ޑރ. މުހައްމަދު މުއިއްޒަށް ފޮނުއްވި ސިޓީގައި ފަޒުލް ވިދާޅުވީ، އިސްތިއުފާ ދެއްވީ ބިންވެރިޔާ ސްކީމާ ގުޅޭ ގޮތުން ފުލުހުން މިހާރު ފަށާފައިވާ ތަގުގީގަށް ފުރުސަތު ދިނުމަށް ބޭނުންވާތީ ކަމަށެވެ.

"... ކަން މިހެން ހުރުމުން، ބިންވެރިޔާ ސްކީމްއާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި، ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން، މިއަދުން ފެށިގެން ހައުސިން ޑިވެލޮޕްމަންޓް ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު ކަމުން އަޅުގަނޑު އިސްތިއުފާ ދީފީމެވެ،" ފަޒުލްގެ ސިޓީގައިވެ އެވެ.

ފަޒުލް ވިދާޅުވީ އެޗްޑީސީގެ އެމްޑީ ކަމުގައި އޭނާ ހޭދަކުރެއްވި މުއްދަތުގައި އެކި ގޮތްގޮތުން އޭނާއަށް ކޮށްފައިވާ އަދި މިހާރު އެކިއެކި ޕްލެޓްފޯމްތަކުގައި ކުރަމުންދާ ތުހުމަތުތަކަށް އިންކާރު ކުރައްވާ ކަމަށެވެ. އެމްޑީ ކަމަށް އައްޔަން ކުރެއްވި ފަހުން، އެޗްޑީސީގެ ފަރާތުން މިހާތަނަށް ކޮށްފައިވާ ހުރިހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ޕޮލިސީތަކުގެ އިމުގެ ތެރެއިން ކުންފުނީގެ މަސްލަހަތު އިސްކޮށްގެން ކޮށްފައިވާ މުއާމަލާތްތައް ކަމަށް ވެސް އޭނާ ވިދާޅުވި އެވެ.

ބިންވެރިޔާ ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ އެ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫން ކަމަށް ވެސް ފަޒުލް ވިދާޅުވި އެވެ.

"އަޅުގަނޑު އެދެނީ އެ ތުހުމަތުތަކުގެ ހަގީގަތް ވީ އެންމެ އަވަސް ފުރުސަތެއްގައި ރައްޔިތުންނަށް ހާމަވުމެވެ. އަދި މިކަމުގެ ސަބަބުން ކުންފުންޏާއި ސަރުކާރު ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެމެވެ،" ފަޒުލް ވިދާޅުވި އެވެ.

"އަޅުގަނޑު އެދެނީ މަނިކުފާނަށާއި ސަރުކާރަށް ކާމިޔާބު ދުވަސްތަކަކަށެވެ."

އެޗްޑީސީގެ އެމްޑީގެ މަގާމުން ފަޒުލް އިސްތިއުފާ ދެއްވިއިރު، ފުލުހުން ފަށާފައިވާ ތަހުގީގުގެ ބޭނުމަށް އޭނާއާ އެކު އެޗްޑީސީ އާއި ހައުސިން މިނިސްޓްރީގެ 20 މީހެއްގެ ޕާސްޕޯޓް ވަނީ ހިފަހައްޓައިފަ އެވެ. އަދި އެޗްޑީސީގައި ފަޒުލްއާ އެކު އެންމެ ގާތުން މަސައްކަތް ކުރެއްވި ބައެއް އިސްވެރިން ވަނީ އެ މަގާމުތަކުން ސަސްޕެންޑް ކޮށްފަ އެވެ.

މި މައްސަލަ ފެންމަތިވުމުން އެޗްޑީސީގެ މިދިޔަ ބުރާސްފަތި ދުވަހުގެ ރޭ ބޭއްވި ޕްރެސް ކޮންފަރެންސްގައި ވެސް ފަޒުލް ވަނީ އޭނާ އަށް ކުރާ ތުހުމަތުތަކަށް އިންކާރުކޮށް، އުސޫލުން ބޭރުން އެއްވެސް ބަޔަކަށް ގޯތި ހަވާލުނުކުރާ ކަމަށް ވިދާޅުވެފަ އެވެ.

ގޯތިތަކުގެ މައްސަލަ އެންމެ ފުރަތަމަ ފެންމަތިވީ، ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާއަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ. އޭނާގެ އިތުރުން އަދި އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ފަޅާއެރުމާ އެކު، އެޗްޑީސީގެ ޗެއާމަން އަހްމަދު ނާސިފް (ޑީޑީ) ފިޔަވައި، ކުންފުނީގެ މުޅި ބޯޑު ވެސް ވަނީ ސަސްޕެންޑްކޮށްފަ އެވެ.

ގޯތި ލިބުނު ކަމަށް ތުހުމަތު ކުރެވޭ އެމްޑަބްލިއުއެސްސީގެ ޑީއެމްޑީ ފަޒީލް ވެސް ވަނީ ސަސްޕެންޑުކޮށްފަ އެވެ. އޭނާގެ މައްޗަށް ފޯޖަރީގެ ތުހުމަތުކޮށް، ފުލުހުން ވަނީ އެ މައްސަލަ ވެސް ތަހުގީގުކުރަން ފަށައިފަ އެވެ.

ފުލުހުންނާއި އޭސީސީން ވެސް އަންނަނީ މި މައްސަލަ ތަހުގީގުކުރަމުންނެވެ.

ޝަރުތު ހަމަނުވާ ބަޔަކަށް ހުޅުމާލެއިން ގޯތިތަކެއް ދިން މައްސަލާގައި ހައުސިން މިނިސްޓްރީގެ 10 މުވައްޒަފަކު ވެސް ވަނީ ސަސްޕެންޑުކޮށްފަ އެވެ.

ގޯތިތަކުގެ މައްސަލާގައި ކުރީގެ ސަރުކާރުން ވެސް ގޯސްތަކެއް ހަދައިފައި އޮތް ކަމަށް ތުހުމަތުކުރެވިގެން، ކުރީގެ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް އާއި ސީނިއާ އެގްޒެކެޓިވް ޑިރެކްޓަރު ލިރުގާމް ވަހީދު އަދި މިހާރުގެ ޑިރެކްޓާ ޖެނެރަލް އަހްމަދު ވިޝާން ނަސީމްގެ ޕާސްޕޯޓު ވެސް ވަނީ ހިފަހައްޓައިފަ އެވެ. އެނގިފައިވާ ގޮތުގައި، އެ ބޭފުޅުންގެ ޕާސްޕޯޓު ހިފެހެއްޓީ އޭސީސީގެ އަމުރަކަށެވެ.

މި ވެރިކަމުގައި އެޗްޑީސީގެ އެމްޑީއަކަށް މިނިސްޓަރުކަމުގެ ފެންވަރުގައި ފަޒުލް އައްޔަން ކުރެއްވީ ނޮވެމްބަރު 28، 2023 ގަ އެވެ. ފަޒުލް ވަނީ އެމްޑަބްލިއުއެސްސީގެ މެނޭޖިން ޑިރެކްޓަރުކަން ވެސް 2015 ވަނަ އަހަރުން ފެށިގެން ނޮވެމްބަރު، 2018 އާ ހަމައަށް ކުރައްވައިފަ އެވެ. އެޗްޑީސީގެ އެމްޑީގެ މަގާމަށް އައްޔަންކުރުމާ ހަމައަށް އޭނާއަކީ ފެލިދޫ ދާއިރާގެ މެމްބަރެވެ. އަދި އޭރުގެ އިދިކޮޅު ޕާޓީ ޕީޕީއެމްގެ ޕާލަމެންޓްރީ ގުރޫޕްގެ ލީޑަރުކަން ވެސް އެޗްޑީސީގެ އެމްޑީގެ މަގާމަށް އައްޔަން ކުރެއްވުމާ ހިސާބަށް ފުރުއްވި އެވެ.