ބިންވެރިޔާގެ ސައްހަ ނޫން ލިޔުންތަކުގެ ތުހުމަތުކުރެވޭ މީހުން ބުނީ ލިޔުން ދިނީ ކުރީގެ ސަރުކާރުން ކަމަށް: ފުލުހުން

ބިންވެރިޔާ އަދި ގެދޮރުވެރިޔާ ސްކީމުގެ ދަށުން ހުޅުމާލޭން ދޫކުރި ބިންތަކެއްގެ ސައްހަ ނޫން ލިޔެކިޔުންތަކެއް ހުށަހެޅި މައްސަލާގައި ތުހުމަތުކުރެވޭ މީހުންނަށް ލިޔުން ލިބިފައިވަނީ ކުރީގެ ސަރުކާރުގައި ހައުސިން މިނިސްޓްރީން ކަމަށް އެ މީހުން ބުނެފައިވާ ކަމަށް ފުލުހުން މިރޭ ބުނެފި އެވެ.

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވި ފެށި ތަހުގީގާ ގުޅޭގޮތުން މައުލޫމާތު ދިނުމަށް މިރޭ ފުލުހުން ބޭއްވި ނޫސްވެރިންގެ ބަައްދަލުވުމުގައި އެސިސްޓެންޓް ޕޮލިސް ކޮމިޝަނަރު އަބްދުﷲ ޝަރީފް ވިދާޅުވީ މިހާތަނަށް ބެލި ބެލުމުން ހުޅުމާލޭގެ ތިން ލޮޓެއްގައި މައްސަލަ ހުރި ކަން ފާހަގަވެފައިވާ ކަމަށެވެ.

މިގޮތުން، ބައެއް ލޮޓުތަކަށް އެއް ފަރާތަށް ވުރެ ގިނަ ފަރާތުން ލިޔުން ހުށަހަޅާފައިވާ ކަމަށް ޝަރީފް ވިދާޅުވި އެވެ.

"އަޅުގަނޑުމެންނަށް މިހާތަނަށް ފާހަގަވީ، މި ހުރިހާ ފަރާތްތަކަކީ މި ސްކީމުގެ ދަށުން ޝަރުތު ފުރިހަމަ ނުވާ އަދި ސްކީމުގައި ބައިވެރިވާން ހުށަވެސް ނާޅާ ފަރާތްތަކެއް ކަން،" އޭނާ ވިދާޅުވި އެވެ.

ޝަރީފް ވިދާޅުވި ގޮތުގައި، ތަހުގީގުގަށް ސުވާލު އުފެދޭ ލިޔުންތަކާ ގުޅޭގޮތުން މިހާތަނަށް ހަ ފަރާތަކާ ސުވާލުކުރުމުން، ޝަރުތު ހަމަނުވާތީ ޝަކުވާކުރުމަށް އޭރުގެ ހައުސިން މިނިސްޓްރީގެ އިސް ވެރިންނާ ބައްދަލުކުރުމުން، ޝަކުވާ ބަލައި، ގޯތި ހަމަޖެހިއްޖެ ކަމަށް ބުނެ އެ މިނިސްޓްރީން ދީފައިވާ ލިޔުންތަކެއް ކަމަށް ބުނެފައިވެ އެވެ.

އޭގެތެރޭގައި، ކުރީގެ ސްޓޭޓް ހައުސިން މިނިސްޓަރު އަކްރަމް ކަމާލުއްދީން އާ ބައްދަލުކުރި ކަމަށް މީހަކު ބުނެފައިވާ ކަމަށް އޭނާ ވިދާޅުވި އެވެ.

ނަމަވެސް، ތަހުގީގު ތެރެއިން މި ލިޔުންތަކުގެ ސައްހަކަން ކަށަވަރުކުރުމުގެ މަސައްކަތް ކުރަމުންދާ ކަމަށް ޝަރީފް ވިދާޅުވި އެވެ.

ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ އެމްޑީ އިބްރާހިމް ފަޒުލް ރަޝީދުގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ވަނީ ގޯތީގެ ރެޖިސްޓްރީއެއް ހަދައިފަ އެވެ.

ރޭ ބޭއްވި ޕްރެސް ކޮންފަރެންސެއްގައި ފަޒުލް ވިދާޅުވީ ގޯތިތަކުގެ މައްސަލަ ފާހަގަވީ ގޯތިތަކުގެ ވަށައިފާރު ރޭނުމުގެ ހުއްދައަށް އެދި އެޗްޑީސީއަށް ހުށަހެޅުމުން، އެ ރެޖިސްޓްރީތައް ވެރިފައި ކުރުމަށް ހައުސިން މިނިސްޓްރީ އަށް ފޮނުވުމުން ކަމަށެވެ.

ޝަރީފް ވިދާޅުވި ގޮތުގައި، ސުވާލު އުފެދުނު ލޮޓުތަކެއްގެ ވެރިފަރާތް ކަށަވަރުކުރަން އެޗްޑީސީން ހައުސިން މިނިސްޓްރީއަށް އެދިފައިވާ ލިޔެކިޔުންތަކެއް ވަނީ ލިބިފަ އެވެ.

މި މައްސަލާގައި ސުވާލުކުރި ފަރާތްތަކުގެ ތެރޭގައި ފަޒީލް ވެސް ހިމެނޭ ކަމަށާއި، ނަމަވެސް، ފަޒުލް އަށް އެއްވެސް ތުހުމަތެއް ފުލުހުން ނުކުރާ ކަމަށް އޭނާ ވިދާޅުވި އެވެ.

ހައުސިން މިނިސްޓްރީ ހިންގާ އިމާރާތުގައި މިދިޔަ ހަފްތާގެ ބުރާސްފަތި ދުވަހު ހިނގި އަލިފާނުގެ ހާދިސާ އާ، ބިންވެރިޔާގެ ފޯޖަރީ މައްސަލަ އާ ގުޅޭ ކަމަށް ގިނަ ބަޔަކު ސުވާލު ކުރަމުންދާތީ، ނޫސްވެރިއަކު ސުވާލުކުރުމުން، ޝަރީފް ވިދާޅުވީ މި ދެ ކަމުގައި އެއްވެސް ގުޅުމެއް އޮތް ކަމަށް އަދި ނުބެލެވޭ ކަމަށެވެ.

"އަލިފާނުގެ ހާދިސާ އާ ގުޅުވޭކަށް ނެތް. އަދި މި ތަހުގީގަށް ބޭނުންވާ ލިޔުމެއް ގެއްލިފައި ނޫނީ ނުލިބޭނެ ކަމަށް ފާހަގަވެފައެއް ނެތް،" ޝަރީފް ވިދާޅުވި އެވެ.

ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)އިން ވެސް މި މައްސަލަ ތަހުގީގު ކުރަމުންދާއިރު، އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ސަސްޕެންޑްކޮށް އަދި ބޯޑުން ވެސް، އެންމެ ފަހުން ޗެއާމަން ކަމަށް އައްޔަންކުރި އަހްމަދު ނާސިފް (ޑީޑީ) ފިޔަވައި ހުރިހާ ބޭފުޅުން މިއަދު ވަނީ ސަސްޕެންޑްކޮށްފަ އެވެ.

ބޯޑު ސަސްޕެންޑްކޮށްފައި ވާއިރު އައިޓީ ކޮންސަލްޓެންޓް އަބްދުﷲ ޝުހޫދާއި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން ވެސް މިހާރު ވަނީ ސަސްޕެންޑްކޮށްފަ އެވެ.