ބޭބެގެ މައްސަލަ އެނގުމުން ޕޮލިހަށް ހުށަނާޅަން، ބެލީ މައްސަލަ ހައްލު ކުރެވޭތޯ: ފަޒުލް

އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދަށް ގޯތީގެ ރަޖިސްޓްރީ ލިބުނު މައްސަލަ ފާހަގަވުމުން އެކަން ފުލުހުންގެ ސަމާލު ކަމަށް ގެނައުމުގެ ބަދަލުގައި ހައުސިން މިނިސްޓްރީ ތެރެއިން ހައްލު ކުރަން މަސައްކަތް ކުރެއްވި ކަމަށް ފަޒުލް ރޭ ވިދާޅުވެއްޖެ އެވެ.

ހުޅުމާލެއިން ގޯތި ލިބޭ މީހުންގެ ލިސްޓުގައި ކުރިން ހިމެނިފައި ނެތް އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލް ވަނީ އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީތަކާ އެކު، އެ ބިމުގެ ވަށައި ފާރު އެޅުމުގެ ހުއްދައަކަށް އެޗްޑީސީގައި އެދިވަޑައިގެންފަ އެވެ.

ފަޒީލް އެ ހުއްދަ އަށް އެދިވަޑައިގަތީ ޖޫން 30، 2024 ގަ އެވެ. އަދި ހަމަ އެ ބިމުގައި ވަށައި ފާރު ރާނަން އެހެން މީހެއް ވެސް ވަނީ ޖުލައި 17، 2024 ގައި އެދިފަ އެވެ. އެކަމާ ގުޅޭ ގޮތުން އެޗްޑީސީން ވަނީ އެ ބިން ލިބިފައި ވަނީ އޭގެ ތެރެއިން ކޮން ފަރާތަކަށްތޯ ކަށަވަރު ކުރުމަށް ހައުސިން މިނިސްޓްރީ އަށް ސިޓީއެއް ފޮނުވައިފަ އެވެ.

އެކަމަކު، ހައުސިން މިނިސްޓްރީން މި އަހަރުގެ އޮގަސްޓް 15 ގައި ވަނީ އެ ސިޓީ އަށް ޖަވާބުދީ، އެއީ ބިންވެރިޔާ ލިސްޓުގައި ހިމެނޭ ފަރާތްތަކެއް ނޫން ކަން އެޗްޑީސީ އަށް އަންގައިފަ އެވެ.

އޭގެ ފަސް މަސް ފަހުން އިއްޔެ އެ ލިޔުންތައް ސޯޝަލް މީޑިއާގައި އާންމުވެ، އާންމު ވުމުން ފުލުހުން ވަނީ އެޗްޑީސީ އަށް ވަދެ އެ މައްސަލަ ތަހުގީގު ކުރަން ފަށައިފަ އެވެ.

އެކަމާ ގުޅޭ ގޮތުން ފަޒުލް ރޭ ބޭއްވި ކުއްލި ނިއުސް ކޮންފަރެންސްގައި ނޫސްވެރިން ވަނީ އެ މައްސަލަ ފާހަގަވުމުން ފުލުހުންގެ ސަމާލު ކަމަށް ގެނެސްފައިވޭތޯ ސުވާލު ކޮށްފަ އެވެ.

ފަޒުލް ވިދާޅުވީ އެ މައްސަލަ ފުލުހުންނަށް ހުށަހަޅާފައި ނުވާ ކަމަށެވެ. އެކަން ފެންމަތިވުމުން ފުރަތަމަ ވެސް ހައުސިން މިނިސްޓްރީ އަށް ހުށަހަޅާފައިވާ ކަމަށާއި އެ މިނިސްޓްރީ އިން މައުލޫމާތުތައް ސާފު ކުރަން ބޭނުންވި ކަމަށް ފަޒުލް ވިދާޅުވި އެވެ.

"މި ޕްރޮސެސްގެ ތެރެއިން އަޅުގަނޑުމެން ޕޮލިހަކަށް އަންގާފައި ނުވާނެ. މިނިސްޓްރީ އޮފް ހައުސިންއާ ކޮމިއުނިކޭޓް ކޮށްގެން މައްސަލަ ހައްލު ކުރެވޭތޯ ބަލަނީ. މައްސަލަ ހައްލު ކުރެވުނީމާ ދާއިމީ ހައްލެއް ލިބުނު ކަމަށް ގަބޫލު ކުރަނީ،" ފަޒުލް ވިދާޅުވި އެވެ.

ހައުސިން މިނިސްޓްރީން ޖަވާބު ދިނުމުން ވެސް އިތުރު ވެރިފިކޭޝަންތަކެއް ހަދަމުންދާ ކަމަށް ފަޒުލް ތަކުރާރުކޮށް ވިދާޅުވި އެވެ.

ނަމަވެސް މިދިޔަ ފަސް މަސް ތެރޭގައި އެ މައްސަލަ ސިއްރު ކޮށްފައި ބޭއްވީ ކީއްވެތޯ އާއި އެއީ އަމިއްލަ ބޭބެގެ މައްސަލައަކަށް ވުމުން ތޯ ނޫސްވެރިން ސުވާލު ކުރި އެވެ.

އެ ސުވާލުތަކަށް ޖަވާބު ދެެއްވަމުން ފަޒުލް ވިދާޅުވި ގޮތުގައި އޭނާގެ "ކޮންފްލިކްޓް އޮފް އިންޓްރެސްޓެއް އެކުލެވިގެން ނުވޭ" އެވެ.

މަސްލަހަތެއް ނުހިމެނޭ ކަމަށް ވިދާޅުވި ނަމަވެސް ފަޒުލް ތަކުރާރުކޮށް ވަނީ މިއީ އޭނާގެ އަމިއްލަ ލޭ ހިނގާ މީހަކާ ގުޅޭ މައްސަލައެއް ކަމަށް ވިދާޅުވެފަ އެވެ. އެކަން ފުލުހުންގެ ސަމާލު ކަމަށް ނުގެނައި ސަބަބާ ގުޅޭ ގޮތުން ނޫސްވެރިން ތަކުރާރުކޮށް ސުވާލު ކުރުމުން ވެސް ފަޒުލް ސީދާ ޖަވާބެއް ނުދެއްވައި ވިދާޅުވަމުން ގެންދެވީ އިތުރު ވެރިފިކޭޝަންތަކެއް ހަދަމުންދާ ކަމަށެވެ.

ފަޒުލް، ނޫސްވެރިންގެ ބައްދަލުވުން ނިންމައިލި އިރު ވެސް ނޫސްވެރިން ދިޔައީ އެ މައްސަލާގައި ގިނަ ސުވާލުތަކެއް އަމާޒު ކުރަމުންނެވެ. ނަމަވެސް އިތުރަށް ސުވާލުތަކަށް ޖަވާބު ނުދެއްވައި "އެހެން ދުވަހެއްގައި ނޫސްވެރިންގެ ބައްދަލުވުމެއް ބާއްވާނީ" ކަމަށް ވިދާޅުވެ އެ މާލަން ދޫކުރައްވައި ފަޒުލް ވަޑައިގަތީ އެވެ.

ބިންވެރިޔާ ސްކީމްގެ ލިސްޓުގައި ނެތް ބަޔަކަށް ހުޅުމާލެ އިން ގޯތިތަކެއް ދިން ކަމަށް ބުނާ މައްސަލައެއް ވަރަށް ބޮޑަށް ހޫނުވެފައިވާ އިރު އެޗްޑީސީ އޮފީސް ކައިރީގައި އިހުތިޖާޖެއް ވެސް ރޭ ބޭއްވި އެވެ.