ތުހުމުތަކަށް އިންކާރުކޮށް ފަޒުލް ވިދާޅުވީ މިނިސްޓްރީން ވެރިފައި ނުކޮށް އެއްވެސް ގޯއްޗެއް ނުދޭ ކަމަށް

ހައުސިން މިނިސްޓްރީން ވެރިފައި ނުކޮށް، ބިންވެރިޔާ ސްކީމްގެ ދަށުން ހުޅުމާލެ އިން އެއްވެސް ގޯއްޗެއް ދޫކޮށްފައި ނުވާނެ ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިރޭ ވިދާޅުވެއްޖެ އެވެ.

ބިންވެރިޔާ ސްކީމްގެ ލިސްޓުގައި ނެތް ބަޔަކަށް ހުޅުމާލެ އިން ގޯތިތަކެއް ދިން ކަމަށް ބުނާ މައްސަލައެއް ވަރަށް ބޮޑަށް ހޫނުވެ، މުޅި ރާއްޖޭގެ ސަމާލުކަމަށް އައުމުން އެޗްޑީސީން ކުއްލި ގޮތަކަށް ބޭއްވި ނިއުސް ކޮންފަރެންސްގައި ފަޒުލް ވިދާޅުވީ ހުޅުމާލެއިން ދިން ގޯތިތަކުގައި އިމާރާތްކުރަން ހުއްދައަށް އެދުމުން އޮންނަ އުސޫލުގެ ދަށުން ހައުސިން މިނިސްޓްރީއާ އެކު ވެރިފިކޭޝަން ޕްރޮސެސްއެއް ކުރިއަށް ގެންދާ ކަމަށެވެ.

ފަޒުލް ވިދާޅުވީ އެގޮތަށް ލިބުނު ރިކުއެސްޓުތައް ބެލުމުން ބައެއް މައްސަލަތައް ފާހަގަވި ކަމަށާއި އެހެންވެ، އެ މައްސަލަތައް ވެރިފައި ކުރުމަށްޓަކައި ހައުސިން މިނިސްޓްރީ އަށް ހުށަހެޅި ކަމަށެވެ. މިހާރު ސޯޝަލް މީޑިއާގައި ދައުރުވާ ލިޔުންތަކަކީ އެ މައްސަލަތައް އުޅޭކަން ހައުސިން މިނިސްޓްރީން އެޗްޑީސީ އަށް ކަށަވަރު ކޮށްދިނުމަށް ފޮނުވާފައި ހުރި ލިޔުންތައް ކަމަށް އޭނާ ވިދާޅުވި އެވެ.

ބިންވެރިޔާ ސްކީމުގެ ލިސްޓުން ބޭރުން ހުޅުމާލެއިން ގޯތިތަކެއް ދިން ކަމަށް ބުނެ ކުރާ ތުހުމަތުތަކަށް އޭނާ އިންކާރު ކުރެއްވި އެވެ.

"އެއީ ހަގީގަތަކާ ހިލާފު ވާހަކަތަކެއް. އެއީ، އަޅުގަނޑުމެންގެ ވެރިފިކޭޝަން ޕްރޮސެސް ކުރިއަށް ގެންދިޔަ ގޮތް. އެހެންވީމާ ވަރަށް ސާފުކޮށް އެބަ އެނގޭ އޭގައި ކޮން ތާރީހެއްގައިތޯ އެ ރިކުއެސްޓު ފޮނުވީ، އަދި އެއަށް ހަވާލާދީ އަޅުގަނޑުމެންނަށް [މިނިސްޓްރީން] ސިޓީ ފޮނުވާފައި އޮތީ،" ފަޒުލް ވިދާޅުވި އެވެ.

ފަޒުލް ވިދާޅުވީ، އެ ބިންތަކުގެ މައްސަލަ މިނިސްޓްރީއަށް ވެރިފިކޭޝަނަށް ފޮނުވަން ޖެހުނީ ވެސް އެއް ބިމަކަށް ދެމީހުން އެދުމުން އެކަން ވެރިފައިކުރުމުގެ ގޮތުން ކަމަށެވެ. މިހާރު ސޯޝަލް މީޑިއާގައި ދައުރުވަނީ އެ މައްސަލަ ދިމާވި ދެ ބިމަކާ ގުޅޭ ލިޔުންތައް ކަމަށް އޭނާ ވިދާޅުވި އެވެ.

"އަޅުގަނޑުމެން އެއްވެސް ހާލަތެއްގައި މިނިސްޓްރީ އޮފް ހައުސިން އިން ނާންގާ ފަރާތަކަށް، މިތަނުން ބިމެއް ހަވާލުކޮށްފައި ނުވާނެ،" ފަޒުލް ވިދާޅުވި އެވެ.

ފަޒުލް ވިދާޅުވި ގޮތުގައި، ފުރަތަމަ ބިން (20768) އިމާރާތް ކުރުމުގެ ހުއްދަ އަށް އެދުނީ މިދިޔަ ޖޫން މަހުގެ 30 ވަނަ ދުވަހު އެވެ. ދެވަނަ ބިން (20821) އިމާރާތް ކުރުމުގެ ހުއްދައަށް އެދުނީ މިދިޔަ ޖޫން މަހުގެ 29 ވަނަ ދުވަހު އެވެ. އެ ދެ ބިމަށް ވެސް ދެ ފަހަރެއްގެ މަތިން ހުއްދައަށް އެދިފައިވެ އެވެ. އެ ބިންތަކާ ގުޅޭ ކަންކަން ވެރިފައި ކުރުމަށް ހައުސިން މިނިސްޓްރީ އަށް އެޗްޑީސީން ސިޓީ ފޮނުވީ މިދިޔަ ޖުލައި މަހުގެ 22 ވަނަ ދުވަހު އެވެ. އަދި މިނިސްޓްރީން ޖަވާބު ދިނީ އޮގަސްޓް 15 ވަނަ ދުވަހު އެވެ.

ފަޒުލް ވިދާޅުވީ ހައުސިން މިނިސްޓްރީގެ ޖަވާބާ ގުޅިގެން އެ ދެ ގޯތީގެ "ޕާމިޓް" އެޗްޑީސީން ކެންސަލްކުރި ކަމަށެވެ.

ފަޒުލް އެ ވާހަކަތައް ދޮގުކުރިޔަސް، ބައެއް ނޫސްވެރިން ވަނީ މިނިސްޓްރީގެ ޖަވާބު ލިބުނުތާ ހަތް މަސް ދުވަސް ފާއިތުވެގެން ދިޔައިރު ވެސް އެޗްޑީސީން މި މައްސަލަ ފާހަގަކޮށްފައި ނުވާތީ، އެ ސުވާލު މިރޭ ކުރިމަތިކޮށްފަ އެވެ. ރައްޔިތުންގެ މަޖިލީހުގެ ކޮމިޓީއަށް ފަޒުލް އާއި އެޗްޑީސީގެ ވެރިން މި މަހު ހާޒިރުކުރުމުން، އެ ކޮމިޓީގައި ވެސް މި މައްސަލަ ސަމާލުކަމަށް ގެނެސްފައި ނުވާތީ އެކަމާ މެދު ވެސް ބައެއް ނޫސްވެރިން ސުވާލު އުފެއްދި އެވެ. އެއީ، މި މައްސަލާގައި ފަޒުލްގެ ބޭބެ ވެސް ޝާމިލުވާތީ، އަމިއްލަ މަސްލަހަތު ހިމާޔަތްކުރަންތޯ ވެސް ބައެއް ނޫސްވެރިން ސުވާލުކުރި އެވެ.

"އަޅުގަނޑުގެ އިންވޯލްމަންޓެއް މިޔަކު ނެތް، ވަރަށް ސާފުކޮށް މި ދަންނަވަނީ،" ތުހުމަތުތަކަށް އިންކާރުކޮށް ފަޒުލް ވިދާޅުވި އެވެ.

އެ މައްސަލަ ފެންމަތިވީ އެ ގޯތިތަކުގެ އިންފާރު ރޭނުމުގެ ހުއްދައަށް އެޗްޑީސީގައި އެދުމުން އެޗްޑީސީން ހައުސިން މިނިސްޓްރީގައި އެ ހުއްދައަށް އެދުމުންނެވެ. ނަމަވެސް ހައުސިން މިނިސްޓްރީން ވަނީ އެ ހުއްދައަށް އެދުނު މީހުންނަކީ ބިންވެރިޔާ ސްކީމްގެ ދަށުން ގޯތި ހޯދަން އެދުނު ބައެއް ނޫން ކަން އަންގައިފަ އެވެ. އާންމުވެފައިވާ ލިޔުންތަކުގައިވާ ގޮތުން އޭގެ ތެރެއިން އެކަކީ ފަޒުލް ބޭބެ ފަޒީލް ރަޝީދެވެ. އަދި ދެވަނަ މީހަކީ އަބްދުލްމަޖީދު މާހިރު ކިޔާ މީހެކެވެ.

ފަޒުލްގެ އެއްބަނޑު އެއްބަފާ ބޭބެ ފަޒީލް ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ތަހުގީގަށް ފުލުހުން ވަނީ މިއަދު ހަވީރު އެޗްޑީސީގެ އޮފީހަށް ވެސް ވަދެފަ އެވެ.

ބިންވެރިޔާ ސްކީމަކީ މާލޭ މީހުންނަށް ގޯތި ދިނުމަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި ސްކީމެކެވެ. އެ ސްކީމްގެ ދަށުން ވަނީ ހުޅުމާލެ އާއި ގުޅިފަޅާއި ގިރާވަރުފަޅުން 9،000 ވުރެ ގިނަ ގޯތި ހިލޭ މާލޭ މީހުންނަށް ދިނުމަށް ނިންމައިފަ އެވެ. އެ ސްކީމްގެ ދަށުން ހުޅުމާލެ 2 އިން ދޭން ނިންމި ހުރިހާ ގޯއްޗެއް ހައުސިން މިނިސްޓްރީން ވަނީ އެ ބިންތައް ލިބުނު މީހުންނަށް މިދިޔަ މަހު ހަވާލުކޮށްފަ އެވެ. އެ ގޯތިތަކުގެ ކަންމުޑި ޖަހައި، އިން ވަކިކޮށްދިނުމުގެ މަސައްކަތް ހަވާލުކުރީ އެޗްޑީސީއާ އެވެ.