އެމްއައިބީން ކުޑަކުދިންނަށް ހާއްސަ ފެސްޓިވަލެއް ބާއްވަނީ

މޯލްޑިވްސް އިސްލާމިކް ބޭންކް (އެމްއައިބީ) އިން އަންނަ ހުކުރު ދުވަހު ކުޑަކުދިންނަށް ހާއްސަކޮށް "ބިންގާ ފެސްޓިވަލް"ގެ ނަމުގައި ހަރަކާތެއް ބާއްވަން ނިންމައިފި އެވެ.

އެމްއައިބީން ބުނީ މި ފެސްޓިވަލަކީ މަޖާ ކުޅިވަރުތަކުގެ އިތުރުން ކުޑަކުދިންނަށް އެކި ދާއިރާތަކުގެ މައުލޫމާތުތައް ލިބޭނެ ސެޝަންތަކެއް ހިމަނައިގެން ކުރިއަށް ގެންދިއުމަށް ހަމަޖެހިފައިވާ ހަރަކާތެކެވެ. މި ހަރަކާތުގައި ފައިނޭންޝަލް ލިޓްރަސީ ކްލާހަކާއި "އާންޓީ އައިޝާ"އާ އެކު ކުދިންގެ އެކި ސުވާލުތަކަށް ޖަވާބުދޭ ކިއު އެންޑް އޭ ސެޝަނަކާއި އެޓޯލް މެރިން ކޮންޒަވޭޝަނާ ގުޅިގެން ވެލާ ކަނހަބާއި ގުޅޭ ހާއްސަ ސެޝަނެއް ބޭއްވުމަށް ވެސް ވަނީ ރާވައިފަ އެވެ.

އެޓޯލް މެރިން ކޮންޒަވޭޝަން ސެންޓަރަކީ ޅ ނައިފަރު ޖުވެނައިލް އިން އެ ރަށުގައި ވެލާ ކަނހަބު ހިމާޔަތްކުރުމަށް ކުރިޔަށް ގެންދާ ސެންޓަރެކެވެ.

ކުޑަކުދިންނަށް ހާއްސަކޮށް ޖަމްޕިން ކާސަލް ފަދަ މަޖާ ހަރަކާތްތަކުގެ އިތުރުން އެކި ކާބޯތަކެތި ލިބޭނެ ސްޓޯލްތައް ވެސް ހުންނާނެ ކަމަށް އެމްއައިބީން ބުންޏެވެ.

މި ފެސްޓިވަލް އޮންނާނީ ހުކުރު ދުވަހު ހަވީރު 4 އިން ރޭގަނޑު 10 ޖެހުމާ ހަމައަށް ކަލާފާން ސްކޫލްގަ އެވެ.

އެ ހަރަކާތުން، އެ ބޭންކުގެ ބިންގާ ކިޑްސް އެކައުންޓާއި ބެހޭ މައުލޫމާތުތައް ލިބޭނެ އެވެ. އަދި އެކައުންޓު ހުޅުވަން ބޭނުންވާ ކުޑަކުދިންނަށް އެކައުންޓު ހުޅުވައި ބިންގާ ޑެބިޓް ކާޑަށް އެޕްލައިކުރުމާއި އިންޓަނެޓް ބޭންކިންގެ ހިދުމަތަށް އެދުމުގެ ފުރުސަތު ލިބޭނެ އެވެ. އޭގެ އިތުރުން މިހާރު ހުޅުވާފައިވާ އެއްވެސް ބިންގާ އެކައުންޓަކާއި ގުޅޭގޮތުން އެހީތެރިކަމެއް ބޭނުންވާ ނަމަ، އިވެންޓުގައި އެ ފަރާތްތަކަށް އެހީތެރިކަން ވެސް ލިބޭނެ އެވެ.

އެމްއައިބީ ބިންގާ އެކައުންޓު ބަންޑްލްގައި 3 އެކައުންޓެއް ހިމެނެ އެވެ. އޭގެ ތެރޭގައި ބެލެނިވެރިން ދޭ ޕޮކެޓް މަނީއިން ކުދިންނަށް އަމިއްލައަށް ޓްރާންސެކްޝަންތައް ހެދޭ އެކައުންޓަކާއި ކުރު މުއްދަތަކަށް ފައިސާ ރައްކާކުރެވޭ ސޭވިން އެކައުންޓަކާއި ދިގު މުއްދަތަކަށް ފައިސާ ރައްކާކުރަން ހާއްސަ އިންވެސްޓް އެކައުންޓެއް ހިމެނެ އެވެ.

އެ އެކައުންޓްތަކަކީ ކުޑަކުދިންނަކީ މާލީ ގޮތުން ޒިންމާދާރު ބަޔަކަށް ހަދައި، އެ ކުދިންގެ މުސަތަގުބަލަށް ބޭނުންވާ ފައިސާ ރައްކާކުރުމަށް ހިތްވަރު ދިނުމުގެ ގޮތުން އެ ބޭންކުން ތައާރަފް ކުރި އެކައުންޓުތަކެކެވެ.