އެމްއައިބީގެ "އެޕްލައި ނައު" ޕޯޓަލްއަށް ބައިނަލްއަގުވާމީ އެވޯޑެއް

ގްލޯބަލް ފިންޓެކް އިންޓަނޭޝަނަލް އެވޯޑުގައި އެމްއައިބީގެ "އެޕްލައި ނައު" ޕޯޓަލްއަށް އެވޯޑެއް ލިބިއްޖެ އެވެ.

އިންޑިއާގެ މުމްބާއީގައި އޮތް މި އެވޯޑު ހަފްލާގައި އެ ބެންކުގެ ޕޯޓަލްއަށް ލިބުނީ "މޮސްޓް އިނޮވޭޓިވް ޑިޖިޓަލް އޮންބޯޑިން ރޯލްއައުޓް" އެވޯޑެވެ.

އައިބީއެސް އިންޓެލިޖެންސުން ހޮވާ މި އެވޯޑު އެމްއައިބީ "އެޕްލައި ނައު" ޕޯޓަލްއަށް ލިބިފައި ވަނީ މެދުއިރުމަތި އަދި އޭޝިއާ ސަރަހައްދުގެ ގިނަ ބެންކުތަކަކާ ވާދަކޮށްގެންނެވެ. އެމްއައިބީ "އެޕްލައި ނައު" ޕޯޓަލް އަކީ ރާއްޖޭގައި ވަގުތުން އެކައުންޓު ހުޅުވުމުގެ ހިދުމަތް އާއްމުންނާއި ބިޒްނަސްތަކަށް ދޭ ހަމައެކަނި ޕޯޓަލް އެވެ. މި ޕޯޓަލް މެދުވެރިކޮށް، އެ ބެންކުން ދޭ އިތުރު ހިދުމަތްތަކަށް ވެސް އެޕްލައި ކުރެވޭނެ އެވެ.

މި ޕޯޓަލްއިން އީފާސް މެދުވެރިކޮށް ކަސްޓަމަރުން ވެރިފައިކުރުމުގެ ގާބިލުކަން ވަނީ ލިބިފަ އެވެ. އަދި މި ޕޯޓަލްއިން އިކޮނޮމިކް މިނިސްޓްރީގެ ޑޭޓާބޭސްގެ އެހީގައި ވިޔަފާރިތައް ވެރިފައިކުރެ އެވެ.

މި ޕޯޓަލް އަކީ ދުނިޔޭގެ އެންމެ ކުރިއަރާފައިވާ ގައުމުތަކެކޭ އެއްފަދައިން ރައްކާތެރިކަމާ އެކު ހިދުމަތްތައް ލިބެން ހުރި ޕޯޓަލެއް ކަމަށް އެ ބެންކުން ބުނެ އެވެ.

އެމްއައިބީގެ ޕީއާރު އޮފިސަރު އަހުސަން ޖަމީލް ވިދާޅުވީ "އެޕްލައި ނައު" ޕޯޓަލް އަކީ ދިވެހިންގެ އުފެއްދުމެއް ކަމަށެވެ.

"ސައްތައިންސައްތަ ދިވެހިންގެ އުފެއްދުމެއް މިއީ. މި ޕޯޓަލްއަށް މި ފަދަ ބައިނަލްއަގުވާމީ އެވޯޑެއް ލިބުމަކީ ދިވެހި ޑިވަލޮޕަރުންގެ ހުނަރު މުޅި ދުނިޔެއަށް ފެނި، އެ މަސައްކަތައް ރެކޮގްނިޝަން ލިބުނު ކަމެއް." އޭނާ ވިދާޅުވި އެވެ.

އެމްއައިބީ އަކީ ޒަމާނީ ޓެކްނޮލަޖީގެ އެހީގައި އެކި ހިދުމަތްތައް އޮންލައިންކޮށް ފޯރުކޮށްދެމުންދާ ބޭންކެކެވެ.