އެމްއައިބީގެ ސާވިސް ސެންޓަރެއް ޅ. ނައިފަރަށް

މޯލްޑިވްސް އިސްލާމިކް ބޭންކް (އެމްއައިބީ) އިން ޅ. ނައިފަރުގައި ސާވިސް ސެންޓަރެއް ހުޅުވައިފި އެވެ.

އެ ސާވިސް ސެންޓަރު ހުޅުއްވައި ދެއްވީ އެ ރަށު ކައުންސިލްގެ ރައީސް މުހައްމަދު ރަޝީދާއި އެމްއައިބީގެ ސީއީއޯ އަދި މެނޭޖިން ޑިރެކްޓަރު މުފައްދަލް އިދްރީސް ހުމްރީ އެވެ.

އެމްއައިބީން ބުނީ އެ ބޭންކުން ދޭ ހުރިހާ ހިދުމަތްތަކެއް އެ ސެންޓަރުން ލިބޭނެ ކަމަށެވެ. އޭގެ ތެރޭގައި ފައިސާ ޖަމާކުރުމާއި ފައިސާ ނެގުމުގެ ހިދުމަތް އޭޓީއެމް މެދުވެރިކޮށް 24 ގަޑިއިރު ލިބޭނެ ކަމަށް އެމްއައިބީން ބުންޏެވެ.

އެމްއައިބީގެ ހިދުމަތްތައް ރާއްޖޭގެ ހުރިހާ އަތޮޅުތަކަށް ފުޅާކުރަން ކުރަމުން އަންނަ މަސައްކަތްތަކުގެ ތެރެއިން ނައިފަރުގައި ހުޅުވި ސެންޓަރަކީ އެ ރަށުގައި އުޅޭ ކަސްޓަމަރުންނަށް އެ ބޭންކުގެ ހިދުމަތްތައް މިހާރަށް ވުރެ ފުރިހަމަ އަށް އަދި ފަސޭހައިން ހޯދޭނެ ތަނެއް ކަމަށް އެމްއައިބީން ބުންޏެވެ.

ނައިފަރުގެ ސެންޓަރާ އެކު ޅ އަތޮޅުގެ އިތުރުން ހއ، ހދ، ބ، އދ، ކ، ދ، ލ، ގއ، ގދ އަދި ފުވައްމުލަކާއި އައްޑޫން ވެސް މިހާރު އެމްއައިބީގެ ހިދުމަތްތައް ލިބޭނެ އެވެ.