އެމްއައިބީން ކުޑަގިރީގައި 1000 ގަސް އިންދައިފި

މާލެ ސަރަހައްދުގައި ޕިކްނިކް ދިއުމަށް ހާއްސަކޮށްފައިވާ ކުޑަގިރީގައި އެމްއައިބީން 1000 ގަސް އިންދައިފި އެވެ.

މިއީ، ސަރުކާރުން ކުރިއަށް ގެންދާ ފަސް މިލިއަން ގަސް މަޝްރޫއުގެ ދަށުން އެ ބެންކުން ކުރިއަށް ގެންދިޔަ ހަރަކާތެކެވެ. މި ހަރަކާތް ރާވާ އިންތިޒާމުކުރުމުގައި ކްލީން މޯލްޑިސް ޖަމިއްޔާއިން ބައިވެރިވި އެވެ. އަދި އެޗްޑީސީ އާއި އެމްޓީސީސީ، އޭޝިއާ ފޯވަޑިން، އައިކެއާ، މޯލްޑިސް ޕޮލިސް ސާވިސް އަދި ދަ ހޯކްސް ޕްރައިވެޓް ލިމިޓެޑުން މި ހަރަކާތުގެ ޕާޓްނަރުންގެ ގޮތުގައި ބައިވެރިވި އެވެ.

ކުޑަގިރީގައި ކުރިއަށް ގެންދިޔަ ގަސްއިންދުމުގެ ހަރަކާތުގައި ޣިޔާސުއްދީން ސްކޫލްގެ ގިނަ އަދަދެއްގެ ދަރިވަރުންނާއި ބެލެނިވެރިން ބައިވެރިވި ކަމަށް އެމްއައިބީން ބުންޏެވެ.

މި ހަރަކާތް ރަސްމީކޮށް ފައްޓަވައި ދެއްވަމުން އެމްއައިބީގެ ސީއީއޯ މުފައްދަލް އިދްރީސް ހުމްރީ ވަނީ ތިމާވެށި ހިމާޔަތް ކުރުމަކީ އެންމެންގެ ފަރުދީ ޒިންމާއެއް ކަމަށް ދެކިގެން ކުރިއަށް ދިއުމަށް ބައިވެރިންނަށް ނަސޭހަތްތެރިވެފަ އެވެ.

އެމްއައިބީން އަންނަނީ އެ ބެންކުގެ އިޖުތިމާއީ ޒިންމާ ޕްރޮގްރާމުގެ ދަށުން މުޖުތަމައަށް ފައިދާކުރާ އެކި މަސައްކަތްތައް ކުރަމުންނެވެ.