އެމްއައިބީއަށް ތިން ވަނަ ކުއާޓަރުގައި 82 މިލިއަން ރުފިޔާގެ ފައިދާ

މޯލްޑިވްސް އިސްލާމިކް ބޭންކް (އެމްއައިބީ)އަށް މި އަހަރުގެ ތިން ވަނަ ކުއާޓަރުގައި 82 މިލިއަން ރުފިޔާ ސާފު ފައިދާގެ ގޮތުގައި ލިބިއްޖެ އެވެ.

މިއީ 2023 ވަނަ އަހަރާ އަޅާބާލާއިރު 54 ޕަސެންޓުގެ ކުރިއެރުމެކެވެ. އެމްއައިބީން ނެރުނު ތިން ވަނަ ކުއާޓަރުގެ ރިޕޯޓަށް ބަލާއިރު، މި ކުއާޓަރުގައި ބޭންކުގެ އެސެޓް ވެލިއު 10 ބިލިއަން ރުފިޔާއަށް ވަނީ އަރައިފަ އެވެ. މިއީ، އެ ބޭންކްގެ އެސެޓް ވެލިއު 10 ބިލިއަން ރުފިޔާ އަށް އެރި ފުރަތަމަ ފަހަރެވެ. އަދި މިއީ މިދިޔަ އަހަރުގެ 3 ވަނަ ކުއާޓަރާ އަޅާބަލާއިރު 34 ޕަސެންޓުގެ ކުރިއެރުމެކެވެ.

އެމްއައިބީގެ ކުއާޓާ ރިޕޯޓުން ދައްކާ ގޮތުގައި އެ ބޭންކުގެ ފައިނޭންސިން ޕޯޓްފޯލިއޯ 5 ބިލިއަން ރުފިޔާއަށް ވަނީ އިތުރުވެފަ އެވެ. މިއީ، 2023ގެ 3 ވަނަ ކުއާޓަރާ އަޅާބަލާއިރު 45 ޕަސެންޓުގެ ކުރިއެރުމެކެވެ.

މި ރިޕޯޓުން ދައްކާ ގޮތުގައި މި އަހަރުގެ ދެވަނަ ކުއާޓަރާ އަޅާބަލާއިރު، އެމްއައިބީގެ ޑިޕޮސިޓްބޭސް 8 ބިލިއަން ރުފިޔާއަށް ވަނީ އިތުރުވެފަ އެވެ. މިއީ، ފާއިތުވެދިޔަ އަހަރެއްހާ ދުވަހުގެ ތެރޭގައި ލިބުނު 26 ޕަސެންޓުގެ ކުރިއެރުމެކެވެ.

މިދިޔަ އަހަރުގެ ތިން ވަނަ ކުއާޓަރާ ބަލާއިރު މި އަހަރުގެ ތިން ވަނަ ކުއާޓަރުގައި ބޭންކުގެ އާމްދަނީ ވެސް 51 ޕަސެންޓަށް ވަނީ ކުރިއަރައިފަ އެވެ.

މި އަހަރުގެ ހުރިހާ ކުއާޓަރެއްގައި ވެސް އެ ބޭންކަށް ބޮޑެތި ކުރިއެރުންތަކެއް ލިބިފައިވާކަން އެމްއައިބީއިން ފާހަގަކުރެ އެވެ.

އެމްއައިބީން އަންނަނީ ޓެކްނޮލޮޖީގެ އެހީގައި ބޭންކު ހިންގަން ޒަމާނީ ބަދަލުތަކެއް ގެންނަމުންނެވެ. އޭގެ ތެރޭގައި ބޭންކަށް ނުގޮސް އެކައުންޓު ހުޅުވުމާއި، އުޖާލާ ފައިނޭންސިންގެ ހުރިހާ ކަމެއް އޮންލައިންކޮށް ކުރެވޭ ގޮތަށް ބަދަލުކުރުން ހިމެނެ އެވެ. އަދި އެ ބޭންކުގެ ބްރާންޗްތައް އިތުރުކޮށް ބޭންކުގެ ހިދުމަތްތައް ހޯދުމަށް އެބޭންކުން ވަނީ ބޮޑެތި ލުއި ފަސޭހަތަކެއް ގެނެސްދީފަ އެވެ.