ރާއްޖޭގައި ބާއްވާ އެންމެ ބޮޑު ގެސްޓްހައުސް ސިމްޕޯޒިއަމް މާދަމާ

ރާއްޖޭގެ ގެސްޓްހައުސް ދާއިރާއަށް އަމާޒުކޮށްގެން ބާއްވާ އެންމެ ބޮޑު ސިމްޕޯޒިއަމް، މޯލްޑިވްސް އިސްލާމިކް ބޭންކް (އެމްއައިބީ)ގެ ގެސްޓްހައުސް ސިމްޕޯޒިއަމް މާދަމާ އޮންނާނެ އެވެ.

ކްރޮސްރޯޑްސްގައި އޮންނަ މި ސިމްޕޯޒިއަމްގައި ޓޫރިޒަމް އާއި ހޮޓެލް އިންޑަސްޓްރީގައި މަސައްކަތްކޮށްފައިވާ ތަޖުރިބާކާރުން ބައިވެރިވެ، ދާއިރާ ތަރައްގީކޮށް ކުރިއަރުވަން ބޭނުންވާނެ މުހިންމު ގިނަ މައުލޫމާތުތައް ހިއްސާކުރާނެ އެވެ. މި ސިމްޕޯޒިއަމްގައި ކީނޯޓު ސްޕީޗް ދެއްވާނީ ލަކްސް ރިޒޯޓްސްގެ ރީޖަނަލް ޑިރެކްޓާ އޮފް ޓްރެއިނިން، ޑިވަލޮޕްމަންޓް އެންޑް ކޮލިޓީއެޝުއަރަންސް، އަފީފް ހުސެއިނެވެ.

އަފީފް އަކީ އެޗްއާރު ސްޓްރެޓެޖީ، ކަސްޓަމާ އެކްސްޕީރިއަންސް އަދި ކޮލެޓީ މެނޭޖް މަންޓާއި ޓެލެންޓް، ޕާފޯމަންސް މެނޭޖްމަންޓާއި ލާނިން އެންޑް ޑިވަލޮޕްމަންޓް ދާއިރާއިން 15 އަހަރުގެ ތަޖުރިބާ ހުރި ހޮސްޕިޓާލިޓީ އިންޑަސްޓްރީން ފާހަގަކޮށްލެވޭ ބޭފުޅެކެވެ.

އަފީފް ވަނީ މީގެ ކުރިން އެޗްއާރު ސަމިޓްތަކާއި މެލޭޝިއާ، ފިލިޕީންސް، އިންޑޮނޭޝިއާ، ދުބާއީ، ހޮންކޮންގް، ޔޫކޭ އަދި އެމެރިކާގައި ވެސް އެކި ހަރަކާތްތަކުގައި ވާހަކަ ދައްކަވައިފަ އެވެ. އޭނާ އަކީ ޖޯން މެކްސްވެލްގެ ސެޓިފައިޑް ސްޕީކާ، ޓްރެއިނާ އަދި ކޯޗެކެވެ. އަދި އޭނާ ވަނީ "މޮސްޓް އިންފްލުއެންޝަލް ގްލޯބަލް އެޗްއާރު ޕްރޮފެޝަނަލްސް 100" އެވޯޑު ވެސް ހާސިލްކުރައްވައިފަ އެވެ.

މި ސިމްޕޯޒިއަމްގައި ހިދުމަތުގެ ފެންވަރު ރަނގަޅުކޮށްގެން ގެސްޓް ހައުސް ތަޖުރިބާތައް ފުރިހަމަކުރުމާއި ގުޅޭގޮތުންނާއި ގެސްޓްހައުސް ވިޔަފާރިތަކާ އެކު ރަށްތައް ތަރައްގީކުރުމާ ގުޅޭގޮތުންނާއި ސަސްޓެއިނަބިލިޓީއާ ގުޅޭ ޕެނަލް ޑިސްކަޝަންތައް ކުރިއަށް ދާނެ އެވެ.

މި ޕެނަލްޑިސްކަޝަންތަކުގައި ބައިވެރިވާނީ ދާއިރާގެ ތަޖުރިބާކާރު މާހިރުންނެވެ.

ގެސްޓްހައުސްއާ ގުޅޭ ވިޔަފާރިތައް ހިންގާ ޒުވާނުންނަށް އެ ޒުވާނުންގެ ވިޔަފާރި ހިޔާލުތައް ހުށަހަޅައި އީޖާދުތައް ދައްކާލަން ފުރުސަތު ދީ ބާއްވާ މި ސިމްޕޯޒިއަމްގައި ޒުވާނުންގެ ހުނަރުވެރިކަން ދައްކާލެވޭނެ ސްޓޯލުތައް ހުންނާނެ އެވެ.

މިއީ ޓޫރިސްޓުންނަށް ސުވެނިއާގެ ގޮތުގައި ތަފާތު ތަކެތި ތައްޔާރުކުރަމުން އަންނަ ޒުވާނުންނަށް އެ ތަކެތި ޝޯކޭސްކުރުމަށް ދޭ ފުރުސަތެކެވެ. މިއީ މި މަސައްކަތްތައް ކުރާ ފަރާތްތައް ވެސް ނެޓްވޯކުކޮށް, މިހާރު ކުރަމުން އަންނަ މަސައްކަތްތައް އިތުރަށް ފުޅާކުރަން ލިބޭނެ ފުރުސަތެކެވެ.

މި ފުރުސަތަކީ ޒުވާނުންނަށް ގެސްޓްހައުސްތަކުގެ ވެރިންނާއި ދާއިރާގެ ތަޖުރިބާކާރުންނަށް އެ ފަރާތްތަކުގެ ވިޔަފާރި އާއި އުފެއްދުން ހުށަހެޅުމަށް ލިބޭނެ ވަރަށް ރަނގަޅު ފުރުސަތެއްގެ ގޮތުގައި އެމްއައިބީ އިން ސިފަކުރެ އެވެ.