ސައުތު އޭޝިއާގެ އިސްލާމިކް ފައިނޭންސް އެންޓިޓީ އެވޯޑު އެމްއައިބީއަށް

މޯލްޑިވްސް އިސްލާމިކް ބޭންކަށް 9 ވަނަ އިސްލާމިކް ފައިނޭންސް ފޯރަމް އޮފް ސައުތު އޭޝިއާ އެވޯސްގައި މި ސަރަހައްދުގެ އިސްލާމިކް ފައިނޭންސް އެންޓިޓީ އެވޯޑު ލިބިއްޖެ އެވެ.

މި އެވޯޑު އެ ބޭންކަށް ދީފައި ވަނީ ސްރީ ލަންކާގެ ކޮލަމްބޯގައި އޮތް އެވޯޑު ހަފްލާގަ އެވެ.

މޯލްޑިވްސް އިސްލާމިކް ބޭންކަކީ ރާއްޖޭގެ ފުރަތަމަ އަދި ހަމައެކަނި އިސްލާމިކް ބޭންކެވެ. އެމްއައިބީގެ ހިދުމަތް ފެށި ފަހުން އެ ބޭންކުން ވަނީ ރާއްޖޭގައި އިސްލާމިކް ފައިނޭންސިންގެ ދާއިރާ ކުރިއެރުވުމަށް ގިނަ މަސައްކަތްތަކެއް ކޮށްފަ އެވެ. އެ ބޭންކުން އެ ދާއިރާއަށް އަހުލުވެރިކުރުވުމަށް ދަރިވަރުންނަށް ދާއިރާގެ މައުލޫމާތުތައް ދިނުމާއި އެ ދާއިރާ ކިޔެވުމަށް ސްކޮލަޝިޕް ފުރުސަތުތައް ވަނީ ދީފަ އެވެ. އަދި ރާއްޖޭގެ މާހައުލާ ގުޅޭ ގޮތަށް އިސްލާމީ މާލީ ނިޒާމުގެ ތެރެއިން ގިނަ ހިދުމަތްތަކެއް ފަރުމާކޮށް ތައާރަފްކޮށްފައިވެ އެވެ.

އެމްއައިބީގެ ހިދުމަތްތައް ރާއްޖޭގެ ބޮޑެތި އާބަދީތައް ހުރި ހުރިހާ ރަށަކުން މިހާރު ލިބެ އެވެ. އެ ބޭންކުން 12 އަތޮޅެއްގެ 18 ރަށެއްގައި އަންނަނީ ހިދުމަތްތައް ދެމުންނެވެ. އަދި އެ ބޭންކުގެ ގިނަ ހިދުމަތްތަކަކީ އޮންލައިންކޮށް ލިބެން ހުރި ހިދުމަތްތަކަކަށްވުމުން ރާއްޖޭގެ ކޮންމެ ރަށެއްގައި ހުރެގެން ވެސް އެ ބޭންކުގެ ގިނަ ހިދުމަތްތައް ރައްކާތެރިކަމާ އެކު އޮންލައިންކޮށް ހޯދޭނެ އެވެ.

އެމްއައިބީގެ "އެޕްލައި ނައު" ޕޯޓަލްއަށް މިދިޔަ މަހު ވަނީ ގްލޯބަލް ފިންޓެކް އިންޓަނޭޝަނަލް އެވޯޑުގައި "މޮސްޓް އިނޮވޭޓިވް ޑިޖިޓަލް އޮންބޯޑިން ރޯލްއައުޓް" އެވޯޑު ވެސް ވަނީ ލިބިފަ އެވެ.