ސީޒަން ފަށާނެ ތާރީހެއް އެފްއޭއެމުން ކަށަވަރުކޮށް ނުދޭތީ މާޒިޔާއިން ޕްރެކްޓިސް ހުއްޓާލައިފި

އާ ފުޓްބޯޅަ ސީޒަން ފަށާނެ ތާރީހެއް އެފްއޭއެމުން ކަށަވަރުކޮށް ނުދޭތީ، މާޒިޔާއިން ޕްރެކްޓިސް ހުއްޓާލައިފަ އެވެ.

އެފްއޭއެމުން ކްލަބްތަކަށް ފޮނުވި ޑްރާފްޓް ކަލަންޑަރުގައި ވާ ގޮތުން ސީޒަން ފަށަން ތާވަލުކޮށްފައި އޮތީ އަންނަ މަހު އެވެ. އެކަމަކު ރަސްމީ ކަލަންޑަރު އެފްއޭއެމުން މިހާތަނަށް އިއުލާންކޮށްފައެއް ނުވެ އެވެ.

ޑްރާފްޓް ކަލަންޑަރު ކްލަބްތަކަށް ފޮނުވުމުން އެހެން އަހަރުތަކެކޭ ވެސް އެއްގޮތަށް އެންމެ ފުރަތަމަ ތައްޔާރުވާން ފެށީ ވެސް މާޒިޔާއިންނެވެ. މިދިޔަ މަހު 27 ގައި އެ ޓީމުން ޕްރީ ސީޒަން ޓްރެއިނިން ފެށި އެވެ.

މާޒިޔާއިން ދުރާލާ ތައްޔާރު ވާން ފެށި ނަމަވެސް އެހެން ކްލަބްތަކުން އެއްވެސް ހަރަކާތެއް ނުބާއްވަ އެވެ. މާޒިޔާ ފިޔަވައި މިދިޔަ އަހަރު ފުރަތަމަ ޑިވިޝަނުގައި ވާދަކުރި އަނެއް ހަތް ކްލަބަށް މާލީ މައްސަލަތައް ވަނީ ކުރިމަތިވެފަ އެވެ. ކުޅުންތެރިންނަށް ގަވާއިދުން މުސާރަ ނުދިނުމުގެ މައްސަލަތައް އެ ހަތް ކްލަބަށް ކުރިމަތި ވި އެވެ.

މި އަހަރު ފުރަތަމަ ޑިވިޝަނުގައި 10 ކްލަބަކުން ވާދަކުރާނެ އެވެ. އެއީ މިދިޔަ އަހަރު ދެވަނަ ޑިވިޝަނުގެ ފައިނަލުގައި ކުޅުނު އޮޑި ސްޕޯޓްސް އާއި ވިކްޓަރީ ވެސް ހިމަނައިގެންނެވެ. އެފްއޭއެމުން ކުރިން ހަމަޖައްސާފައި އޮތީ މިދިޔަ އަހަރު ލީގުގައި ވާދަ ކުރި އެއްވެސް ކްލަބެއް ރެލިގޭޓް ނުކުރުމަށެވެ. އޮޑިން ވަނީ ބައެއް ކުޅުންތެރިން ލައްވައި ސޮއި ކުރުވައިފަ އެވެ. އެކަމަކު ޕްރީ ސީޒަން ޓްރޭނިން އެ ކްލަބަކުން ނުފަށަ އެވެ. މިހާރު ކުރިއަށްދާ ގޯލްޑް ކަޕުން ވެސް ފާހަގަ ކުރެވޭ ކުޅުންތެރިން އެ ޓީމުގެ ރާޑަރަށް ވަނީ އަރައިފަ އެވެ.