ރަށްވެހިކަން ހޯދަން އުނދަގޫވުމުން ފްރާންސްގެ އާއިލާ ދާން ހުށަހެޅީ އަމިއްލައަށް: ޝަމްއާން

ތ. ވޭމަންޑޫގައި ދިރިއުޅޭ ފްރާންސް އާއިލާގެ މައްސަލަ ތިލަވުމުގެ ކުރިން އެ މީހުން ރާއްޖޭގެ ރަށްވެހިކަން ހޯދަން މަސައްކަތް ފެށުމަށް ފަހު އެކަން އުނދަގޫކަމުން އަނބުރާ ގައުމަށް ދާން ބޭނުންވެގެން އަމިއްލައަށް ހުށަހަޅާފައި އެބަ އޮތް ކަމަށް އިމިގްރޭޝަން ކޮންޓްރޯލާ ޝަމްއާން ވަހީދު މިރޭ ވިދާޅުވެއްޖެ އެވެ.

ޝަމްއާން "މިހާރު" އަށް ވިދާޅުވީ އެ އާއިލާގެ ކަންތައްތައް ބަލަހައްޓާ ފިރިހެން މީހާ އިމިގްރޭޝަނަށް ހާޒިރުކުރުމުން ރާއްޖޭގައި ދިރިއުޅޭ ސަބަބާއި ރަށްވެހިކަން ހޯދަން ބޭނުންވާ ވާހަކަ ބުނި ކަމަށެވެ. ނަމަވެސް، އެކަން ކުރެވޭނީ ފޮރިން މިނިސްޓްރީއަށް ހުށަހަޅައިގެން ކަމަށް އެންގުމުން އެ މިނިސްޓްރީއަށް ވެސް އޭނާ ދިޔަ ކަމަށް ޝަމްއާން ވިދާޅުވި އެވެ.

އެކަމަކު، ދެ ވަނަ ފަހަރަށް އިމިގްރޭޝަނަށް ހާޒިރުވެ، ރަށްވެހިކަން ހޯދުމުގެ މަރުހަލާ އުނދަގޫ ކަމަށް ބުނެ އަނބުރާ ގައުމަށް ދާން ބޭނުންވާ ކަމަށް ފްރާންސް ފިރިހެން މީހާ ބުނި ކަމަށް ކޮންޓްރޯލަރު ވިދާޅުވި އެވެ.

އިސްލާމްވެ، ސައީދުގެ ނަމުގައި އުޅޭ ފިރިހެން މީހާ ފުރަތަމަ ރާއްޖެ އައީ ޓޫރިސްޓު ވިސާގައި އޭނާ އެކަންޏެވެ. ނަމަވެސް، އަނބުރާ ގައުމަށް ގޮސް، 2013 ވަނަ އަހަރު އަލުން އައީ ފަޔަ ފައިޓަރެއްގެ ގޮތުގައި އުޅެން ވޯކް ވިސާ ނަގައިގެންނެވެ. އޭނާގެ އަންހެނުންނާއި އޭރު ތިބި ދެ ކުދިން ޓޫރިސްޓު ވިސާގައި ރާއްޖެ އައީ އޭގެ ފަހުންނެވެ. އެ ވިސާގެ މުއްދަތަކީ ތިން މަސް ދުވަހެވެ.

ޝަމްއާން ވިދާޅުވީ ފިރިހެން މީހާއަށް 2019 ވަނަ އަހަރާ ހަމައަށް ވިސާ އޮތް ކަމަށެވެ. ނަމަވެސް، އޭރު ވެސް އޭނާ މަސައްކަތްކުރީ އިމިގްރޭޝަންގެ ގާނޫނާ ހިލާފަށެވެ. އެހެންވެ، ސްޕޮންސާކޮށްފައި އޮތް ކުންފުނި ބަދަލުކުރަން އޭނާއަށް އެންގި ކަމަށާއި އެކަމަކު އެ ކުންފުނިން އޭނާއަށް ފުރުސަތު ދިނުމުން ވެސް އެކަން ކޮށްފައިނުވާ ކަމަށް އިމިގްރޭޝަނުން ބުންޏެވެ.

"އޭނާ ބުނީ ރާއްޖެ އައީ އިސްލާމް ވީމާ އާއިލާ ނުރުހޭތީއޭ، އަނެއްހެން ތްރެޓެއް ނެތޭ. މިހާ ދުވަހު މި ކޮޅުގައި މަޑުކުރީ ސިޓިޒެންޝިޕް ހޯދާށޭ...އެހެންވެ ބުނިން ފޮރިން މިނިސްޓްރީއަށް ހުށަހަޅައިގެންނޭ އެކަން ވާނީ. ފޮރިންއަށް ދިޔަ ފުރަތަމަ އިންޓަވިއުއަށް ފަހު ބުނީ އެކަން ކޮމްޕްލިކޭޓޭޑް ވީމާ އަނބުރާ ގައުމަށް ދާށޭ ބޭނުންވަނީ. އެކަމަކު ޕާސްޕޯޓާ އެއްޗެހި މުއްދަތު ހަމަވެފައި ހުރީމާ ޑޮކިއުމަންޓް ހޯދަން އެސިސްޓް ކޮށްދޭނެ ކަމަށް ބުނެފައިވާނީ،" ޝަމްއާން ވިދާޅުވި އެވެ.

އޭނާ ވިދާޅުވީ ފްރާންސްގެ ކޮންސިއުލޭޓްގެ އެހީއާ އެކު ޑޮކިއުމަންޓުތައް ހަމަކުރަމުން އަންނަ ކަމަށެވެ.

އެ މީހުން ރާއްޖެ އައިސް ފުރަތަމަ ދިޔައީ ގދ. ތިނަދުއަށެވެ. އޭގެ ފަހުން ލ. އަތޮޅުގައި އުޅުމަށް ފަހު ތ. ތިމަރަފުއްޓަށް ބަދަލުވި އެވެ. ނަމަވެސް އެ ރަށުގައި ހަރުކަށި ފިކުރުގެ ކަންތައް ބޮޑު ކަމަށް ބުނެ ވޭމަންޑު އަށް ބަދަލުވިތާ ވެސް މިހާރު ހަ އަހަރު ވެއްޖެ އެވެ. އެ ދެމަފިރިންގެ ހަގަށް ތިބި ތިން ކުދިން ލިބުނީ ރާއްޖެއަށް އައި ފަހުންނެވެ. އޭގެ ތެރެއިން ދެ ކުދިން ވިހެއީ ވޭމަންޑޫގަ އެވެ.

ޝަމްއާން ވިދާޅުވީ މުސްލިމަކަށް ވުމުން ފްރާންސްގައި ހައްޔަރުކުރާ ކަމަށް ބުނާ ވާހަކަ ގަބޫލުކުރަން އުނދަގޫ ކަމަށެވެ. އެ ދެމަފިރިންގެ އަތުގައި ފްރެންޗު ޕާސްޕޯޓު އެބައޮތް ކަމަށާއި އެއީ އެހެން ގައުމުތަކުގެ މީހުންނަށް ރެފިއުޖީ އަދި ހިމާޔަތްދޭ ގައުމެއް ކަމަށް ކޮންޓްރޯލަރު ވިދާޅުވި އެވެ.

"އޭނާ ވެސް ބުނީ އާއިލާ ނުރުހޭތީ ކަމަށް އައީ،" ޝަމްއާން ވިދާޅުވި އެވެ.

އިމިގްރޭޝަންގެ ގާނޫނު ބުނާ ގޮތުން، ވިސާގެ މުއްދަތަށް ވުރެ އިތުރަށް މަޑުކޮށްފި ނަމަ އަނބުރާ ދެވޭނީ އެ ޖޫރިމަނާ ފައިސާ ދެއްކުމަށްފަހުގަ އެވެ. އެއް ދުވަސް ވެސް އިތުރަށް މަޑުކޮށްފި ނަމަ، އެ ޖޫރިމަނާ ފެށެނީ 15،000ރ. އިންނެވެ. އަދި ވަކި މުއްދަތެއް ވެއްޖެނަމަ، ލީގަލް އިން މައްސަލަ ބެލުމަށްފަހު ރާއްޖެ ނާދެވޭ ގޮތަށް ޑީޕޯޓުކޮށްލަ އެވެ. އެ ޖޫރިމަނާ މައާފުކުރަން ނުވަތަ ކުޑަ ކޮށްދިނުމަށް ކޮންޓްރޯލާއަކަށް ގާނޫނުން ބާރެއް ނުލިބެ އެވެ.