ފިނި މޫސުން ނިމެންދެން ސީރިއާގެ ބަފަ ޒޯނުގައި އިޒްރޭލު ސިފައިން ތިބެން އަންގައިފި

ސީރިއާގެ ހުޅަނގު ދެކުނު ކަނުގައި އޮންނަ ހަޟްބަތުލް ޖައުލާނި ނުވަތަ ގޯލާން ހައިޓްސްގައި ސީރިއާ ސިފައިންނާއި އިޒްރޭލު ސިފައިން ވަކިވާހެން އދ. ގެ ސުލްހަ ބަލަހައްޓާ ސިފައިން ތިބޭ ބަފަ ޒޯނަށް ވަދެފައިވާ އިޒްރޭލު ސިފައިން އެތަނުގައި ތިބުމަށް އަންގައިފި އެވެ.

އަސްކަރީ ހަރަކާތްތައް ހިންގުން މަނާކޮށް، އދ.ގެ ބެލުމުގެ ދަށުގައި ބާއްވާފައި އޮންނަ އެ ސަރަހައްދަށް އިޒްރޭލު ސިފައިން ވަނީ މިދިޔަ އާދީއްތަ ދުވަހު ސީރިއާގެ ވެރިކަން ވެއްޓި ހަނގުރާމަވެރިންގެ ބާރުގެ ދަށަށް އެ ގައުމު ދިޔަތާ ކުޑަ އިރުކޮޅެއް ފަހުންނެވެ.

އިޒްރޭލުގެ ޑިފެންސް މިނިސްޓަރު އިޒްރާއިލް ކާޓްޒް މިހާރު ވަނީ މި ފިނި މޫސުން ނިމެންދެން ތިބެން ސިފައިން ތައްޔާރުވާން އަންގައިފަ އެވެ.

މި ސަރަހައްދު އިޒްރޭލު ސިފައިންގެ ބާރުގެ ދަށަށް ގެންދިއުމުން އެކި ގައުމުތަކުންނާއި އދ. އިން ވެސް ވަނީ އެކަން ކުށްވެރިކޮށްފަ އެވެ. އެކަމަކު އަބަދުވެސް އިޒްރޭލުގެ ދިފާއުގައި އޮންނަ އެމެރިކާއިން ބުނީ އިޒްރޭލުގެ އެ ނިންމަކީ އަމިއްލަ ދިފާއުގައި އަޅަންޖެހޭ ފިޔަވަޅެއް ކަމަށެވެ.

ސުލްހަ ބަލަހައްޓާ ސިފައިން ކަމަށްވާ ޔޫއެންޑީއޯއެފުން ހުކުރު ދުވަހު ނެރުނު ބަޔާނެއްގައި ބުނެފައި ވަނީ ބަފަ ޒޯން އުފެއްދުމަށް ސީރިއާ އާއި އިޒްރޭލާ ދެމެދު 1974 ވަނަ އަހަރު ގާއިމުކުރި އެއްބަސްވުމާ އިޒްރޭލު ހިލާފުވެފައިވާކަން އިޒްރޭލަށް އަންގާފައިވާ ކަމަށެވެ.

ބައްޝާރުގެ ވެރިކަން ވެއްޓުނު ފަހުން އިޒްރޭލުގެ އަސްކަރިއްޔާއިން ވެސް ވަނީ ސީރިއާގެ އަސްކަރީ ތަންތަނަށް އެތައް ސަތޭކަ ހަމަލާއެއް ދީފަ އެވެ. އެއީ ކެމިކަލް ހަތިޔާރު ގުދަންތަކުން ފެށިގެން ވައިގެ ދިފާއީ ބާރުތައް ހަނގުރާމަވެރިންގެ އަތްދަށަށް ދިޔަ ނުދިނުމަށް ކަމަށް އިޒްރޭލުން ވަނީ ބުނެފަ އެވެ.

ބަފަ ޒޯނަށް އިޒްރޭލު ސިފައިން ވަދެފައިވަނީ ލުބްނާންގެ ހިޒްބުﷲއާ ދެކޮޅަށް ހަމަލާދޭން ފަށާއި އެ ގައުމަށް އަރައި ތިބުމަށް ފަހު އެތަނުން ފޭބުމާ އެކުގަ އެވެ.

އިޒްރޭލުން ބުނީ އެ ސަރަހައްދަށް ވަންނަން ޖެހުނީ ބައްޝާރުގެ ވެރިކަން ވެއްޓުމާ އެކު ސީރިއާ ސިފައިން ބޯޑަރު ދޫކޮށް ދިއުމުން އެ ހުސްކަން ފޫބައްދަން ކަމަށެވެ. އަދި 1974 ގެ އެއްބަސްވުން އަލުން ތަންފީޒުކުރެވެން ފަށަންދެން އިޒްރޭލު ސިފައިން އެތަނުގައި ތިބޭނެ ކަމަށް ވެސް ބުންޏެވެ.