ސީރިއާ އަށް އިޒްރޭލުން ވައިގެ މަގުން 100 އަށް ވުރެ ގިނަ ހަމަލާ ދީފި

މިދިޔަ ހަފްތާ ބަންދުގައި ސީރިއާގެ ވެރިކަމުން ބައްޝާރުލް އަސަދު ދުރުކޮށް ހަނގުރާމަވެރިންނަށް ކޮންޓްރޯލް ލިބުމާ އެކު އެ ގައުމުގެ ކެމިކަލް ހަތިޔާރުތައް ނައްތާލުމަށް ކަމަށް ބުނެ އިޒްރޭލުން ބޮން އެޅުމަށް ފަހު ރޭ 100 އަށް ވުރެ ގިނަ ހަމަލާ ދީފި އެވެ.

ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުނީ ރޭ ސީރިއާގެ އެކި ތަންތަން ބޮން އަޅާފައި ވާއިރު އޭގެ ތެރޭގައި ކެމިކަލް ހަތިޔާރު އުފެއްދުމުގެ ދިރާސާތައް ކުރާ ކަމަށް ޔޫރަޕުން ތުހުމަތުކުރާ ރިސާޗް ސެންޓަރެއް ވެސް ހިމެނޭ ކަމަށެވެ.

"އިޒްރޭލުގެ ހަނގުރާމަމަތީ މަތިންދާބޯޓުތަކުން ސީރިއާއަށް 100 އަށް ވުރެ ގިނަ ހަމަލާ ދީފައިވޭ. އޭގެ ތެރޭގައި ބަރްޒާހް ސައިންޓިފިކް ރިސާޗް ސެންޓަރު ވެސް ހިމެނޭ،" ސީރިއަން އޮބްޒަވޭޓަރީ ފޯ ހިއުމަން ރައިޓްސްގެ އިސްވެރިޔާ ރާމީ އަބްދުއްރަހްމާން އޭއެފްޕީއަށް ބުންޏެވެ.

އޭނާ ބުނި ގޮތުގައި ބައްޝާރުގެ ވެރިކަމުގައި ގާއިމުކޮށްފައިވާ އަސްކަރީ ބާރުތައް ކުޑަކުރުމަށް ހަމަލާ ދީފައިވާ ކަމަށް ބެލެވެ އެވެ.

އިޒްރޭލުގެ ފޮރިން މިނިސްޓަރު ގިޑިއޯން ސާރް ނޫސްވެރިންގެ ބައްދަލުވުމެއްގައި އިއްޔެ ބުނީ "ސްޓްރެޓީޖިކް ވެޕަން ސިސްޓަމް، މިސާލަކަށް، ބާކީ ހުރި ކެމިކަލް ހަތިޔާރު ނުވަތަ ދުރުރާސްތާ މިސައިލާއި ރޮކެޓްތައް ހަރުކަށި ފިކުރުގެ ބައެއްގެ ބާރުގެ ދަށަށް ހިނގައިދާނެތީ" އެއަށް ހަމަލާ ދީފައިވާ ކަމަށެވެ.

ހުކުރު ދުވަހުގެ ރޭ ދިން އެ ހަމަލާތަކާ ބެހޭ ގޮތުން ސާރު ބުނީ އިޒްރޭލުން ހަނގުރާމަވެރިންގެ އަމަލުތައް ބަލަމުން އަންނަ ކަމަށާއި، އިޒްރޭލުން ފިޔަވަޅު އަޅާފައި ވާނީ އިޒްރޭލުގެ މަސްލަހަތަށް އަދި އެތަނުގެ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރަން ކަމަށެވެ.

"ވެރިކަން ވެއްޓުނުކަން އިއުލާނުކުރިތާ އިރުކޮޅެއް ފަހުން އިޒްރޭލުގެ ވަރުގަދަ ވައިގެ ހަމަލާތައް ދޭން ފެށި، އެއީ ހަތިޔާރާއި ގޮވާތަކެތި ހުރި ތަންތަން ނައްތާލުމަށް އަމާޒުކުރި ހަމަލާތަކެއް،" ސީރިއަން އޮބްޒަވޭޓަރީ ފޯ ހިއުމަން ރައިޓްސް ބުންޏެވެ.

އޭއެފްޕީގެ ފޮޓޯތަކުން ފެންނަ ގޮތުގައި ދިމިޝްގުގެ ބޭރުގައި އޮންނަ މަޒްޒޭހް އަސްކަރީ އެއާޕޯޓަށް މި ހަމަލާތަކުގައި ބޮޑެތި ގެއްލުންތަކެއްވެ ހެލިކޮޕްޓަރުތަކާއި ޖެޓްތައް ވެސް ހުރީ ހަލާކުވެފަ އެވެ.

ސީރިއާގައި ދާހިލީ ހަނގުރާމަ 2011 ވަނަ އަހަރު ފެށުނު ފަހުން އިޒްރޭލުން ވަނީ އެ ގައުމުގައި އެތައް ސަތޭކަ ހަމަލާއެއް ދީފަ އެވެ. މައިގަނޑު ގޮތެއްގައި ހަމަލާތައް އަމާޒުކުރަނީ އަސްކަރިއްޔާއަށާއި އީރާނަށް ތާއީދުކުރާ ޖަމާއަތްތަކަށެވެ. އިޒްރޭލުން ސީރިއާއަށް ދޭ ވަކިވަކި ހަމަލާތަކާ ބެހޭ ގޮތުން ވަރަށް މަދުން ނޫނީ ވާހަކައެއް ނުދައްކަ އެވެ. އެކަމަކު އީރާންގެ ބާރު ސީރިއާގައި ގަދަކުރިޔަ ނުދޭނެ ކަމަށް އަބަދުވެސް ބުނެ އެވެ.