ދުނިޔޭގެ އިގުތިސާދަށް އޮތް ދަތިތަކުން އަރައިގަންނަން އީޖާދީ ވިސްނުން އިސްކޮށް، ގުޅިގެން މަސައްކަތް ކުރަންޖެހޭ: ޒަމީރު

އެކިއެކި ހަނގުރާމަތަކާއި ކާރިސާތަކުގެ ސަބަބުން ދުނިޔޭ އިގުތިސާދު މިހާރު އޮތް ނާޒުކު ފައްތަރުން އަރަގަނެވޭނީ، އީޖާދީ ވިސްނުންތައް އިސްކޮށް، އެންމެން ގުޅިގެން މަސައްކަތްކޮށްގެން ކަމަށް ފިނޭންސް މިނިސްޓަރު މޫސާ ޒަމީރު ގޮވާލައްވައިފި އެވެ.

އިންޑިއާގައި ކުރިއަށްދާ ދެވަނަ ގްލޯބަލް އިކޮނޮމިކް ޕޮލިސީ ފޯރަމްގައި ވާހަކަ ދައްކަވަމުން ޒަމީރު ވިދާޅުވި ގޮތުގައި، މި ބައްދަލުވުން މި ބޭއްވީ ރަޝިއާ އާއި ޔޫކްރޭނު ހަނގުރާމައިގެ އިތުރުން މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ނޭދެވޭ އަސަރު މުޅި ދުނިޔޭގެ އިގުތިސާދަށް ކުރަމުންދާ ދަނޑިވަޅެއްގައި ކަމަށެވެ.

އެ ކަމުގެ ސަބަބުން، ދުނިޔޭގެ ބާޒާރުގައި ތަކެތީގެ އަގު އިންތިހާއަށް އިތުރުވެ، ގައުމުތަކަށް ދަރަނި ދެއްކުމުގެ ގާބިލުކަމާއި ދެމެހެއްޓެނެވި ތަރައްގީއަށް ކުރާ މަސައްކަތްތަކަށް ވަރަށް ބޮޑަށް ހުރަސްއެޅިފައިވާ ކަމަށް މިނިސްޓަރު ފާހަގަކުރެއްވި އެވެ.

މިގޮތުން، ޒަމީރު ވިދާޅުވި ގޮތުގައި އިމްޕޯޓަށާއި ޓޫރިޒަމަށް ބަރޯސާވެފައިވާ ރާއްޖެ ފަދަ ޖަޒީރާ ކުދި ގައުމުތަކަށް މިކަމުގެ ނޭދެވޭ އަސަރު ދަނީ ވަރަށް ބޮޑަށް ކުރަމުންނެވެ.

މީގެއިތުރުން، މޫސުމީ ބަދަލުތަކުގެ ސަބަބުން އުފެދިފައިވާ ހިރާސްތައް ކުޑަކުރަން ރާއްޖޭން ވެސް ފަށާފައިވާ މަސައްކަތަށް ކުރިމަތިވެފައިވާ ހުރަސްތައް އޭނާ ފާހަގަކުރެއްވި އެވެ.

މިގޮތުން، އިޔާދަކުރަނިވި ހަކަތައަށް ބަދަލުކުރުމާއި، މޫސުމީ ބަދަލުތަކަށް ވިލުންވެރި ތަރައްގީ ގެންނަން މި ސަރުކާރުން ކުރަމުންދާ މަސައްކަތްތައް ފާހަގަކުރައްވައި، ޒަމީރު ވިދާޅުވި ގޮތުގައި، މި މަސައްކަތް ކާމިޔާބުކުރަން ދުނިޔޭގެ އެހީތެރިކަމާއި އެއްބާރުލުން ބޭނުންވެ އެވެ.

"...އަޅުގަނޑުމެން ކަނޑައަޅާފައިވާ އަމާޒަށް ވާސިލުވުމަށްޓަކައި، ފައިސާ އާއި ޓެކްނޮލޮޖީގެ ގޮތުން ބައިނަލްއަގުވާމީ ސަޕޯޓު ވަރަށް ބޮޑަށް ބޭނުންވޭ،" މިނިސްޓަރު ގޮވާލެއްވި އެވެ.

އެކަމަކު މިފަދަ ގޮންޖެހުންތަކުގެ ތެރެއިން ކުރިއަށް ދެވޭނެ ފުރުސަތުތަކެއް ވެސް ފަހިވެފައިވާ ކަމަށާއި، އެކަމަށްޓަކައި ވަރަށް ވިސްނުންތެރިކަމާ އެކު އިޔާދަކުރަނިވި ހަކަތަ އާއި، ޓެކްނޮލޮޖީއާއި، ސާފު ފެން ކަށަވަރުކުރުމާއި، މޫސުމީ ވިލުންވެރިކަން އިތުރުކުރަން އިންވެސްޓުކުރަންޖެހޭ ކަމަށް އޭނާ ވިދާޅުވި އެވެ.

"މިކަމަށް ބޭނުންވާނީ އީޖާދީ ވިސްނުމާއި، މުޅި ދުނިޔެ ގުޅިގެން ދުރުރާސްތާގެ ތަސައްވުރެއް ކަނޑައަޅައި، އެ ކަމަށް މަސައްކަތް ކުރުން،" ޒަމީރު ވިދާޅުވި އެވެ.