ވެލާނާ އެއާޕޯޓުގެ އާ ޓާމިނަލް ނިންމަން އަބޫދާބީ ފަންޑުން އިތުރު 40 މިލިއަން ޑޮލަރު

ވެލާނާ އިންޓަނޭޝަނަލް އެއާޕޯޓު (ވީއައިއޭ) ތަރައްގީ ކުރުމުގެ މަޝްރޫއަށް އަބޫދާބީ ފަންޑް ފޯ ޑިވެލޮޕްމަންޓް (އޭޑީއެފްޑީ) އިން ރާއްޖެއާ އެކު އިތުރު 40 މިލިއަން ޑޮލަރުގެ (616 މިލިއަން ރުފިޔާ) ލޯނު އެއްބަސްވުމެއްގައި ސޮއިކޮށްފި އެވެ.

އެ ޕްރޮޖެކްޓުގައި ހިމެނޭ އާ ޕެސެންޖާ ޓާމިނަލް އަވަހަށް ނިންމައި، ހުޅުވުމަށް މި ސަރުކާރުން އަމާޒު ހިފާފައިވާއިރު، އެ މަޝްރޫއު އަވަސްކުރަން އަބޫދާބީ ފަންޑުން މީގެ ކުރިން ވެސް 50 މިލިއަން ޑޮލަރު (771 މިލިއަން ރުފިޔާ) އަދި ސައުދީ ފަންޑުން 180 މިލިއަން ޑޮލަރު (2.8 ބިލިއަން ރުފިޔާ) ވަނީ ނަގައިފަ އެވެ.

އާ އެއްބަސްވުމުގައި ސޮއިކުރުމުގެ ރަސްމިއްޔާތުގައި، އަބޫދާބީ ފަންޑުގެ ޑިރެކްޓަ ޖެނެރަލް މުހައްމަދު ސައިފް އަލް ސުވައިދީ ވިދާޅުވީ، ރަހުމަތްތެރި ގައުމުތަކުގައި އުމްރާނީ ތަރައްގީ އަށް އަބޫދާބީ ފަންޑުން އަދާކުރަމުންދާ މުހިންމު ދައުރު މި އެއްބަސްވުމާ އެކު އިތުރަށް ހާމަވާ ކަމަށެވެ.

"މިހާރު މި ދިން އިތުރު އެހީގެ ސަބަބުން، ވެލާނާ އިންޓަނޭޝަނަލް އެއާޕޯޓް ޒަމާނީ ކުުރެވުމަކީ ރާއްޖެއަށް ލިބޭނެ ބޮޑު ކުރިއެރުމެއް. އެއީ ޓޫރިޒަމަށް އިތުރުވަމުންދާ ޑިމާންޑް ފުއްދުމަށް ކެޕޭސިޓީ އިތުރުވާތީ،" އޭނާ ވިދާޅުވި އެވެ.

ރާއްޖޭގެ ފަރާތުން އެ އެއްބަސްވުމުގައި ސޮއިކުރެއްވުމަށްފަހު، ފިނޭންސް މިނިސްޓަރު މޫސާ ޒަމީރު ވަނީ ރާއްޖޭގެ ތަރައްގީ އާއި ކުރިއެރުމަށް އަބޫދާބީ ފަންޑުން ޒަމާނުއްސުރެ ފޯރުކޮށްދެމުން އަންނަ އެހީ ފާހަގަކުރައްވައިފަ އެވެ.

ވެލާނާ އެއާޕޯޓު މަޝްރޫއާ އެކު، ގައުމީ ތަރައްގީގެ ލަނޑުދަނޑިތައް ހާސިލުކުރަން މަގުފަހިވެ، ޓޫރިޒަމުން ލިބޭ އާމްދަނީ އެތައް ގުނައެއް އިތުރުވެ، ރާއްޖޭގައި ޗުއްޓީ ހޭދަކުރާ ޓޫރިސްޓުން ޒަމާނީ ފެންވަރުގެ ހިދުމަތެއް ދެވޭނެ ކަމަށް ޒަމީރު ވިދާޅުވި އެވެ.

އާ ޓާމިނަލް އެއްކޮށް ބޭނުން ކުރަން ފެށުމުން ގާތްގަނޑަކަށް 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ.

އާ ޓާމިނަލްއާ އެކު، އެއާޕޯޓަށް 1،800 މުވައްޒަފުން އިތުރުވާނެ އެވެ. ގާތްގަނޑަކަށް 30 އަށް ވުރެ ގިނަ އެއާލައިނުން ހިދުމަތް ދޭ އިރު އާ ޓާމިނަލްއާ އެކު، އިތުުރު އެއާލައިންތަކަށް ވެސް ފުރުސަތުތައް ދެވޭނެ އެވެ.

މި ސަރުކާރުން އަންނަނީ އަންނަ އަހަރުގެ ތެރޭގައި އާ ޓާމިނަލް މަޝްރޫއު ނިންމުމަށް މަސައްކަތް ކުރަމުންނެވެ.