ހާލަތަށް ރިއާޔަތްކޮށް ދަރިންނަށް ދޭ ހަރަދު އިތުރުކުރަން ގާޒީންނަށް އިހުތިޔާރު ދޭން މެމްބަރުން ތާއީދު

ދަރިންނަށް ދޭ ހަރަދު އިތުރުކުރިއަސް ހާލަތަށް ރިއާޔަތްކޮށް އެ ބަދަލުތައް ގެނައުމަށް ގާޒީންނަށް އިހުތިޔާރު ދޭން ފެންނަ ކަމަށް ބައެއް މެމްބަރުން ވިދާޅުވެއްޖެ އެވެ.

އާއިލާއާ ބެހޭ ގާނޫނަށް ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމް (ކުޑޫ) ހުށަހެޅުއްވި އިސްލާހުގައި ވަނީ އެއް ކުއްޖަކު ހުރި ނަމަ 2،000ރ. އަދި އެއް ކުއްޖަކަށް ވުރެ ގިނަ ކުދިން ތިބި ނަމަ އިތުރުވާ ކޮންމެ ކުއްޖަކަށް 1،000ރ. އަށް ވުރެ މަދު ނޫން އަދަދެއް ދޭންވާނެ ކަމަށް އާއިލާއާ ބެހޭ ގާނޫނުގެ ދަށުން އެކުލަވާލާފައި އާއިލާއާ ބެހޭ ގަވާއިދުގައި ބުނާ ކަމަށެވެ.

ނަމަވެސް، ތަކެތީގެ އަގު އިންތިހާ އަށް އުފުލިފައިވާއިރު ހަމައެކަނި މަހެއްގެ މައްޗަށް 2،000ރ. އަކީ ދަރިންގެ ހުރިހާ ހަރަދެއް ފުއްދޭ ވަރަށް ވުރެ މާ ބޮޑަށް ވެސް ކުޑަ އަދަދެއް ކަމަށް އޭނާ ވިދާޅުވި އެވެ.

އެ މައްސަލަ ދިރާސާކުރައްވަމުން ގަވާއިދު ކޮމެޓީގެ ގިނަ މެމްބަރުން ވަނީ ދެމަފިރިން ވަރިވުމަށް ފަހު ދަރިންނަށް ދޭންޖެހޭ ހަރަދު އިތުރުކުރާ އިސްލާހަށް ތާއިދުކުރައްވައިފަ އެވެ. އެކަމަކު އެ މެމްބަރުންގެ ތެރެއިން އިހަވަންދޫ ދާއިރާގެ މެމްބަރު އަހުމަދު ނަސީރުގެ ހިޔާލު ތަފާތެވެ.

އޭނާ ވިދާޅުވީ ފިރިހެން މީހާ ވަރިއާ ހަމައަށް ގިނަ ފަހަރަށް ދަނީ މާޔޫސްވުމާއި ނަފްސާނީ މައްސަލަތައް އަދި އާމްދަނީ ހޯދަން ދަތިތައް އުޅޭތީ ކަމަށެވެ. އެ ކައިވެނި ރޫޅާލާއި، ފިރިމީހާ އެހެން މީހަކާ އިނދެގެން އާމްދަނީ ހޯދައިގެން އުޅޭތީ، ގަވާއިދަށް އިސްލާހު ގެންނައިރު އެ ކަންކަމަށް ވެސް ރިއާޔަތްކުރަންޖެހޭ ކަމަށް ޕީއެންސީގެ މެމްބަރު ވިދާޅުވި އެވެ.

ވަރިވާ އިރު، ދަރިންގެ އަދަދު ކޯޓަށް އެނގޭނެ ކަމަށާއި އެ މީހަކަށް ލިބޭ އާމްދަނީ ވެސް މިހާރު ހުށަހަޅަންޖެހޭ ކަމަށް އޭނާ ވިދާޅުވި އެވެ. ބައެއް ފިރިހެނުން ތިން ބަނޑަށް 10 ދަރިން ހޯދާފައި ތިބޭއިރު، އެ މީހާ އެކަނި އެ ހުރިހާ ކުދިންނަށް ހަރަދު ކުރާއިރު ހުންނާނީ ވަރަށް ނިކަމެތި ވެފައި ކަމަށާއި ފިރިހެން މީހާއާ ދޭތެރޭ ވިސްނާލަންޖެހޭ ކަމަށް އޭނާ ވިދާޅުވި އެވެ.

"ފިރިހެން މީހާގެ ކަންކަން ވެސް ރަނގަޅަށް ބެލެހެއްޓެންޖެހޭ. އޭނާ ވެސް ފެންވަރާ، ސައިބޯނި ލައިގެން ރީއްޗަށްތާ ތިބެންޖެހޭނީ. އެހެންވީމަ، އެ ހުރިހާ ކަމަކަށް ރިއާޔަތްކޮށްފައި ޕަސެންޓޭޖަކަށް ދާންވީހެން އަޅުގަނޑަށް ލަފާކުރެވެނީ އާމްދަނީގެ ޕަސެންޓޭޖެއްގެ ނިސްބަތުން ދަރިންނަށް ހަރަދުކުރަން ވަރިކުރެވޭ ގޮތުން. ބައެއް ފަހަރު އަނބިކަނބަލުން އަމިއްލައަށް ވަރިވެގެން ވެސް އެބަ ދޭ. އެ ކަހަލަ ހާލަތެއްގައި ފިރިމީހާގެ ހައްގު ވެސް ދިފާއުކުރަންޖެހޭނެ،" ނަސީރު ވިދާޅުވި އެވެ.

ނަސީރުގެ ވާހަކަތަކަށް ރައްދު ދެއްވައި މި އިސްލާހު ހުށަހެޅުއްވި ކުޑޫ ވިދާޅުވީ ދަރިން ހޯދަން ޖެހޭނީ ބެލޭ ވަރަށް ކަމަށެވެ. ކުކުޅު ބިސް އަޅާހެން މީހުންނާ އިނދެ، ދަރިން ހޯދައި ވަރިކުރަމުން ނޫޅެވޭނެ ކަމަށާއި އެ މީހުންގެ ވެސް ކޮންމެ ވެސް ޒިންމާއެއް އޮންނަންޖެހޭނެ ކަމަށް އޭނާ ވިދާޅުވި އެވެ.

"ޒިންމާ އަދާކުރޭތޯ ބަލަންޖެހޭނެ. ދަރިން ހޯދައިފިއްޔާ ބަލަންޖެހޭނެ. އެހެން ނޫނީ އިންނާނެ ކަމެއް ވެސް ނެތް،" ކުޑޫ ވިދާޅުވި އެވެ.

ވެލިދޫ ދާއިރާގެ އެމްޑީއޭގެ މެމްބަރު މުހައްމަދު އައްބާސް ވިދާޅުވީ ދަރިންނަށް ރަނގަޅަށް އާމްދަނީ ހޯދައިގެން އުޅޭ މީހުން ވެސް ދަރިންނަށް ހަރަދު ނުދޭ މައްސަލަ ބޮޑު ކަމަށެވެ.

އެ ގަވާއިދު މިހާރު އޮންނަ ގޮތުން 18 އަހަރުން ދަށުގެ ދެ ކުދިންގެ ހަރަދަށް ދޭންޖެހެނީ 3،000ރ. އެވެ. އެއީ އެކަށީގެންވާ މިންވަރެއް ކަމަށް ގަބޫލު ނުކުރައްވާ ކަމަށް އައްބާސް ވިދާޅުވި އެވެ.

އޭނާ ވިދާޅުވީ ދެމަފިރިން ވަކިވުމުން ގިނަ ފަހަރަށް ކުދިން ބަލަނީ މަންމަ ކަމަށެވެ. އެކަމަކު، މަންމަ އުޅެނީ ބިކަ ހާލުގައި ކަމަށް ވިދާޅުވެ، އައްބާސް ވަނީ ކޮންމެ ކުއްޖަކަށް މަދުވެގެން 2،500ރ. ދޭންޖެހޭ ގޮތަށް ގަވާއިދު ބަދަލުކުރަން ހުށަހަޅުއްވައިފަ އެވެ.

ހުރާ ދާއިރާގެ މެންބަރު އަނާރާ ނައީމް ވިދާޅުވީ އެކި މީހުންނަށް ރިޒްގު ދެއްވާނީ އެކި ވަރަށް ކަމަށް ވާތީ، ގިނައިން އާމްދަނީ ލިބޭ ނަމަ ގިނައިން ހަރަދު ނަގައިދެވޭ އުސޫލެއް ވަރަށް މުހިއްމު ކަމަށެވެ.

"މިހާރު ފެންނަނީ މުއްސަނދި ދިރިއުޅުމެއް އުޅޭ މީހުން ވެސް ދެނީ 2000ރ. ނަމަވެސް އިންސާނުންނަށް ވެފައި އާމްދަނީ ހޯދޭ ގޮތް ތަފާތު. ރާއްޖޭގައި މާހައުލު އޮންނަ ގޮތުން ވަރި ވަރަށް ގިނަ. ދަރިން އެކި މީހުންނަށް ތިބޭ. އެ މީހަކަށް ލިބޭ އެއްޗަކުން އެ މީހަކަށް ހަރަދުކުރެވޭނީ. ދަރިންނަށް ވެސް ހަރަދުކުރެވޭނީ އެގޮތަށް. ދަރިންނަށް ދޭންޖެހޭ ސަމާލުކަމެއް ނުދޭ. ބަހުސްކުރަން ރަނގަޅު އަދި ރަނގަޅު އުސޫލެއް ކަނޑައަޅަންޖެހޭ،" އަނާރާ ވިދާޅުވި އެވެ.

މީގެ ކުރިން ގާޒީކަން ކުރެއްވި މަނަދޫ ދާއިރާގެ މެމްބަރު ހުސްނީ މުބާރަކް ވިދާޅުވީ ހަމަ ހުރެފައި ދަރިންގެ ހަރަދު ކަނޑައެޅިގެން ނުވާނެ ކަމަށެވެ. ރަށްރަށުގައި ސެކިއުރިޓީ ބަލަހައްޓައި މީހުންނަށް މަހެއްގެ މައްޗަށް 5،000ރ. ލިބުނަސް ދަރިންގެ ހަރަދަށް ކެނޑުމަށްފަހު ބޭނުންކުރަން ލިބެނީ ކުޑަ އެއްޗެއް ކަމަށެވެ. އޭގެ އަނެއް ކޮޅުން، މަހަކު ލައްކައިން ލިބޭ މީހުން ދަރިންގެ ހަރަދަށް 2،000ރ. ނުވަތަ 3،000ރ. ދިނުމަކީ އިންސާފެއް ނޫން ކަމަށް އޭނާ ވިދާޅުވި އެވެ.

ކޯޓުގައި އެ ވާހަކަ ދެއްކިޔަސް، ގަވާއިދުގައި ވަކި ގޮތެއް ބުނެފައި އޮންނާތީ ކުރެވޭނެ އިތުރު ކަމެއް ނެތް ކަމަށް ހުސްނީ ފާހަގަކުރެއްވި އެވެ.

"ތަޖުރިބާގައި މި ބުނަނީ ފަނޑިޔާރަށް އިހުތިޔާރު ދޭންވީ މާލީ ހާލަތަށް ބަލާފައި [އަދަދު އިތުރުކުރަން]،" އޭނާ ވިދާޅުވި އެވެ.

އެ ކޮމެޓީގެ މިއަދުގެ ބައްދަލުވުން ނިންމާލާފައިވަނީ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީ، ފެމިލީ ކޯޓު، ޑީޖޭއޭ އަދި އެކަނިވެރި މައިންގެ ހައްގުގައި ވަކާލާތުކުރާ ޖަމިއްޔާއެއް ހާޒިރުކުރަން ނިންމައިފަ އެވެ.