ގަވާއިދަށް ގެނައި އިސްލާހާ އެކު، އަނެއްކާވެސް ޕެސެންޖާ ލައިނާތައް ރާއްޖެ އަންނަން ފަށައިފި

ޓޫރިސްޓު އުޅަނދުފަހަރު ރާއްޖޭގެ ސަރަހައްދުގައި ދުއްވުމާއި ބަނދަރުކުރުމާ ބެހޭ ގަވާއިދަށް ގެނައި އިސްލާހާ އެކު، ކްރޫޒް ލައިނާތައް އަނެއްކާވެސް ރާއްޖެ އަށް އަންނަން ފަށާފައިވާ ކަމަށް މޯލްޑިވްސް އެސޯސިއޭޝަން އޮފް ޔޮޓް އެޖެންޓް (މާޔާ) އިން ބުނެފި އެވެ.

ދުވަސްތަކަކަށް ފަހު، އަނެއްކާވެސް ކްރޫޒް ލައިނާއެއް މާލޭގެ ބަނދަރާ މިހާރު ކައިރި ކޮށްފައިވާއިރު، މި ސީޒަންގެ ފުރަތަމަ ބޯޓަކީ "އައިޑާ ބެލާ" އެވެ. ޖަރުމަނުގެ އަމިއްލަ ކުންފުންޏަކުން ހިންގާ "އައިޑާ ބެލާ" ކްރޫޒްލައިނާ އިން 2،000 އަށް ވުރެ ގިނަ ޓޫރިސްޓުން މާލެ އަށް ވަނީ ފައިބައިފަ އެވެ.

މާޔާ އިން މިއަދު ބުނީ، މި މަހުގެ ފަހު ކޮޅުގައި ވެސް އިތުރު ދެ ކްރޫޒް ލައިނާއެއް އަންނާނެ ކަމަށެވެ. އަންނަ ޖެނުއަރީއާ ހަމައަށް 12،000 ޓޫރިސްޓުންގެ ކްރޫޒް ލައިނާތަކުން ޓޫރިސްޓުން އަންނަން ހަމަޖެހިފައިވާ ކަމަށް އެ ޖަމިއްޔާ އިން ބުންޏެވެ.

ބޭރުގެ ޓޫރިސްޓް އުޅަނދުތައް ރާއްޖޭގައި ދުއްވުމާއި ބަނދަރު ކުރުމާ ބެހޭ ގަވާއިދު ކުރިން އޮންނަ ގޮތުން ބޯޓުތަކުގެ އެޖެންޓުންގެ ގޮތުގައި ބޭރު ފަރާތްތަކަށް ވެސް މަސައްކަތް ކުރެވޭނެ އެވެ. ނަމަވެސް އެ ގަވާއިދަށް އިއްޔެ ގެނައި އިސްލާހު ބުނާގޮތުން، ޓޫރިސްޓް އުޅަނދެއްގެ އެޖެންޓްކަމާ ހަވާލުވެވޭނީ ހިއްސާދާރުންގެ ގޮތުގައި މުޅިން ވެސް ދިވެހިން ތިބި ކުންފުނިތަކާއި ޕާޓްނަޝިޕްތަކާއި ނުވަތަ ސޯލް ޕްރޮޕްރިއޭޓަޝިޕްތަކަށެވެ.

އެފަދަ އުޅަނދުތަކުން އަންނަ ޓޫރިސްޓުންނަށް ޝޯ އެކްސްކާޝަން ދިނުމުގައި ހަރަކާތްތެރިވެވޭނީ ވެސް ޓުއަ ގައިޑުންނާ ބެހޭ ގަވާއިދުގެ ދަށުން ހުއްދަ އޮންނަ ފަރާތްތަކަށް ކަމަށް އާ އިސްލާހުގައި ވެ އެވެ.

ރާއްޖެ އަށް އަންނަ ޓޫރިސްޓް އުޅަނދުތައް ރާއްޖޭގައި މަޑުކުރަން ކަނޑައަޅާފައިވާ މުއްދަތު އިތުރުކުރާ ނަމަ ކޮންމެ ދުވަހަކަށް 100 ޑޮލަރުގެ ރޭޓުން ފީއެއް ދައުލަތަށް ދައްކަން ޖެހޭނެ އެވެ. ހުއްދަ ދޭ ބޭރުގެ ޓޫރިސްޓް އުޅަނދެއްގައި ޕެސެންޖަރުންގެ ގޮތުގައި އިތުރު ބަޔަކު ބައިތިއްބަން އެދޭ ނަމަ ޕެސެންޖާ ލައިސަންސް ހޯދަން ވާނެ ކަމަށް ވެސް ގަވާއިދުގައި ބުނެފައިވެ އެވެ. އެ ލައިސެންސް ހޯދަން ޖެހޭނީ ވެސް އެޖެންޓުންގެ ނަމުގަ އެވެ.