ޓޫރިޒަމް އޮކިއުޕެންސީ ރަނގަޅުވެ، އާމްދަނީ ވެސް މައްޗަށް

މި އަހަރުގެ ފުރަތަމަ 10 މަހުގެ ޓޫރިޒަމްގެ އޮކިއުޕެންސީ ރޭޓު 59 ޕަސެންޓުގައި ހުރި އިރު އެ ދާއިރާ އިން ލިބުނު އާމްދަނީ 3.4 ބިލިއަން ޑޮލަރު (52 ބިލިއަން ރުފިޔާ) އަށް މަތިވެފައިވާ ކަން މަރުކަޒީ ބޭންކުގެ ތަފާސްހިސާބުތަކުން ދައްކައިފި އެވެ.

ތަފާސްހިސާބުތައް ދައްކާ ގޮތުން މިއީ މިދިޔަ އަހަރަށް ވުރެ ދެ ޕަސެންޓުގެ ކުރިއެރުމެކެވެ. މިދިޔަ އަހަރު އޮކިއުޕެންސީ ރޭޓު ހުރީ 57 ޕަސެންޓުގަ އެވެ. ޓޫރިޒަމްގެ އާމްދަނީގެ ގޮތުގައި މިދިޔަ އަހަރު ލިބުނީ 2.9 ބިލިއަން ރުފިޔާ ((45 ބިލިއަން ރުފިޔާ) އެވެ. އެހެންވެ، މިދިޔަ އަހަރާ ބަލާއިރު މި އަހަރު ވަނީ އާމްދަނީގެ ގޮތުން ކުރިއެރުން ލިބިފަ އެވެ.

ޓޫރިސްޓުންގެ އަތުން މި އަހަރު އެންމެ ބޮޑު އާމްދަނީ އެއް ލިބުނީ ޖެނުއަރީ މަހު އެވެ. އެ މަހު ވަނީ 589 މިލިއަން ޑޮލަރު (9 ބިލިއަން ރުފިޔާ) ލިބިފަ އެވެ. އާމްދަނީ އެންމެ ދަށްވީ މެއި މަހު އެވެ. އެ މަހު ޓޫރިޒަމުން ލިބުނު ކަމަށް ރެކޯޑު ކޮށްފައިވަނީ 213 މިލިއަން ޑޮލަރު (3.3 ބިލިއަން ރުފިޔާ) އެވެ.

ޓޫރިޒަމްގެ އާމްދަނީ ދަށްވި އިރު މި އަހަރުގެ މިހާތަނަށް ވަނީ 1.8 މިލިއަން ޓޫރިސްޓު ޒިޔާރަތް ކޮށްފަ އެވެ. އެއީ ނުވަ ޕަސެންޓުގެ ކުރިއެރުމެކެވެ.

މި އަހަރުގެ އޮކިއުޕެންސީ އެންމެ ބޮޑަށް ދަށަށް ދިޔައީ ޖޫން މަހު އެވެ. އެ މަހުގެ އޮކިއުޕެންސީ ހުރީ 39 ޕަސެންޓުގަ އެވެ. ދެން ސެޕްޓެމްބަރު މަހާއި މެއި މަހު އެވެ. އެ ދެ މަހުގެ އޮކިއުޕެންސީ ހުރީ 44 ޕަސެންޓުގަ އެވެ.

މި އަހަރު އެންމެ އޮކިއުޕެންސީ ރަނގަޅުވި ފެބްރުއަރީ މަހު ހުރީ 81 ޕަސެންޓުގަ އެވެ. އެއީ އެއް މަސްދުވަހުގެ ތެރޭގައި އެންމެ ގިނަ ޓޫރިސްޓުން ވެސް އައި މަހެވެ.