ވަކިވަކި އިދާރާތަކުން އަލަށް ރިޓަޔާ ކުރާ މީހުންނަށް މަހުން މަހަށް ދޭ އެލަވަންސް ކަނޑާލަނީ

ސަރުކާރުގެ ވަކިވަކި އިދާރާތަކުން ހިންގާ އަމިއްލަ ރިޓަޔަމެންޓް ސްކީމުގެ ތެރެއިން، ވަޒީފާ އިން އަލަށް ރިޓަޔާވާ މުވައްޒަފުންނަށް މަހުން މަހަށް ދޭން ކަނޑައަޅާފައި އޮންނަ އެލަވަންސްތައް އަންނަ އަހަރުގެ ޖެނުއަރީ އިން ފެށިގެން ނުދޭން ނިންމައިފި އެވެ.

ނޭޝަނަލް ޕޭ ކޮމިޝަންގެ ރައީސް އަދި ފިނޭންސް މިނިސްޓަރު މޫސާ ޒަމީރު ސޮއިކުރައްވައި އިދާރާތަކަށް ފޮނުވާފައިވާ ސިޓީގައިވާ ގޮތުން ސަރުކާރުގެ ރިފޯމު އެޖެންޑާގައި ހަރަދު ކުޑަ ކުރަން އަޅަން ނިންމާފައިވާ ފިޔަވަޅެއްގެ ގޮތުން، އަލަށް ވަޒީފާ އިން ރިޓަޔާ ކުރާ މުވައްޒަފުންނަށް އަންނަ ޖެނުއަރީން ފެށިގެން މަހުން މަހަށް ދޭ އެލަވަންސެއް ނުދޭނެ އެވެ. އެކަމަކު، ރިޓަޔާ ކުރާ އިރު އެއް ފަހަރާ ދޭން ކަނޑައަޅާފައި އޮންނަ ފައިސާގެ އަދަދު އޮންނަ އުސޫލުން ލިބޭނެ އެވެ.

ޖެނުއަރީން ފެށިގެން މި ބަދަލު ގެނައި ނަމަވެސް، މި އަހަރުގެ ޑިސެމްބަރުގެ ނިޔަލަށް ރިޓަޔާ ކުރާ މުވައްޒަފުންނަށް މަހުން މަހަށްދޭ އެލަވަންސް މިހާރު އޮންނަ އުސޫލުގެ ތެރެއިން ވެސް ލިބޭނެ ކަމަށް އެ ސިޓީގައިވެ އެވެ.

އެ ސިޓީގައި ވަނީ، ރިޓަޔަމެންޓް ޕެންޝަން ދޭ އިދާރާތަކުން އަންނަ މަހުގެ 15 ވަނަ ދުވަހުގެ ކުރިން އެ އިދާރާތަކުގެ ރިޓަޔަމެންޓް ގަވައިދު އިސްލާހުކޮށް، އެކަން ފިނޭންސަށް ހުށަހަޅައި، ގެޒެޓު ކުރަން ވެސް އެދިފަ އެވެ.

ސަރުކާރުގެ ވަކިވަކި ޕެންޝަން ސްކީމުތައް ހިންގާ ދައުލަތުގެ 13 މުއައްސަސާއެއް އޮތް އިރު އެއް އަހަރުން އަނެއް އަހަރަށް އެ ސްކީމަށް ކުރާ ހޭދަ އަންނަނީ އިތުރުވަމުންނެވެ.

މިއަހަރު އެ ސްކީމަށް 266 މިލިއަން ރުފިޔާ ހޭދަކުރި އިރު އަންނަ އަހަރު ރިޓަޔަކުރާ ފަރާތްތަކަށް 272 މިލިއަން ރުފިޔާ ހޭދަވާނެ ކަމަށް ބަޖެޓުގައި ލަފާކޮށްފައިވެ އެވެ.

ރާއްޖޭގެ ހުރިހާ ފަރާތްތަކެއް ޝާމިލުވާ ގޮތަށް ރިޓަޔަމަންޓް ޕެންޝަން ސްކީމެއް ތައާރަފް ކުރީ 2009 ގަ އެވެ. އޭގެ ކުރިން ވެސް ދައުލަތުން އައީ ޕެންޝަން ސްކީމުތައް ހިންގަމުންނެވެ. އެ ސްކީމުތައް ހިންގީ މުވައްޒަފުންގެ ކޮންޓްރިބިއުޝަނެއް ނެތި ހަމައެކަނި ދައުލަތުން ކުރާ ހޭދައެއްގެ ގޮތުގަ އެވެ. ގާނޫނަކުން ރިޓަޔަމަންޓް ޕެންޝަން ނިޒާމާ އެކު، އޭގެ ކުރިން ހިނގަމުން އައި ޕެންޝަން ފަންޑުތައް ހުއްޓޭނެ ކަމަށް ބެލެވުނު ނަމަވެސް އެކަން އެގޮތަކަށް ކުރިއަކަށް ނުދެ އެވެ.

ރިޓަޔަމެންޓް ސްކީމު ހިންގާ އިދާރާތައް

1. ފުލުހުން

2. ޑިފެންސް މިނިސްޓްރީ

3. ކަސްޓަމްސް

4. ޖުޑިޝަލް ސާވިސް ކޮމިޝަން

5. ރައީސް އޮފީސް

6. ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން

7. ޕްރޮސެކިއުޓާ ޖެނެރަލް އޮފީސް

8. އޭސީސީ

9. ގައުމީ ޔުނިވާސިޓީ

10. ރައްޔިތުންގެ މަޖިލީހުގެ އިދާރާ

11. އިލެކްޝަންސް ކޮމިޝަން

12. އޮޑިޓަ ޖެނެރަލް އޮފީސް

13. ސިިވިލް ސާވިސް ކޮމިޝަން

ރިޓަޔަމެންޓް އިނާޔަތް ދޭން ޖެހޭ މުވައްޒަފުން ގިނަވެ، 65 އަހަރުން މަތީގެ މީހުންނަށް ދޭ އިނާޔަތަށް ކުރަން ޖެހޭ ހަރަދު ވެސް އިތުރުވާ ކަމަށް އަންނަ އަހަރުގެ ބަޖެޓުގައިވެ އެވެ. އެހެންވެ، ރިޓަޔަކުރާ މީހުންގެ އިނާޔަތް ކަނޑާލުމުގެ އިތުރުން އުމުރުން ދުވަސްވީ މީހުންގެ އެލަވަންސް ދިނުމުގެ އުސޫލު ބަދަލުކޮށް، މާލީ ތަނަވަސްކަން ނެތް ފަރާތްތަކަށް އެ އިނާޔަތް ދޭ ގޮތަށް އެ ސްކީމަށް ބަދަލު ކުރަން ވެސް ވަނީ ބަޖެޓު ފޮތުގައި ކަނޑައަޅައިފަ އެވެ.