އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް ހުއްޓާލައިފި

އެސްޓީއޯގެ ދަށަށް ފެނަކަ ބަދަލު ކުރުމުގެ މަސައްކަތް އެސްޓީއޯއިން ހުއްޓާލައިފި އެވެ.

އެސްޓީއޯ އިން ބުނީ، އެގޮތަށް ނިންމީ އެކަން ހުއްޓާލަން މި މަހުގެ 24 ވަނަ ދުވަހު ފިނޭންސް މިނިސްޓްރީން އެންގުމުން ކަމަށެވެ. އެ ކުންފުނިން ބުނީ، ސަބްސިޑަރީއެއްގެ ގޮތުގައި ފެނަކަ ހިންގަން އޭރު ސަރުކާރަށް ހުށަހެޅި އެކުއިޒިޝަން ޕްރޮޕޯސަލްގައި ހިމަނާފައިވާ ކަންކަން ކުރިއަށް ގޮސްފައިވާ މިންވަރަށް ބަލައި ފެނަކައިގެ ހިއްސާ ގަތުމުގެ މަސައްކަތް ހުއްޓާލަން ނިންމީ، މިއަދު ބޭއްވި ބޯޑު ބައްދަލުވުމުގައި ކަމަށެވެ.

މިދިޔަ އޮގަސްޓް މަހު ސަރުކާރުން ވަނީ އަންނަ ޖެނުއަރީ މަހުން ފެށިގެން ފެނަކަ ކޯޕަރޭޝަން އެސްޓީއޯގެ ދަށަށް ގެންގޮސް އެސްޓީއޯގެ ސަބްސިޑަރީއެއްގެ ގޮތުގައި ހިންގަން ނިންމައިފަ އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓު ފޮތުގައި ކުންފުނިތައް ރިފޯމުކުރުމަށްޓަކައި ރާވާފައިވާ ކަންކަމުގެ ތެރޭގައި އެސްޓީއޯގެ ދަށަށް ފެނަކަ ގެންދިއުމުގެ ބަދަލުގައި ފެނަކަ އާއި ސްޓެލްކޯއާ އެއްކޮށްލުން ފަދަ، އެހެން ހައްލެއް ހޯދުމަށް މަސައްކަތް ކުރަމުން އަންނަ ކަމަށް ހާމަކޮށްފައިވެ އެވެ. އަދި އަންނަ އަހަރު އެކަމަށް ދާއިމީ ހައްލެއް ހޯދޭނެ ކަމަށް ފިނޭންސް މިނިސްޓްރީން ބުންޏެވެ.

އެއް ކުންފުންޏަކުން އެސްޓީއޯއަށް މިވަގުތު އެންމެ ބޮޑު އަދަދެއްގެ ދަރަނި ދައްކަން ޖެހިފައި އޮތީ ފެނަކައިންނެވެ. ފެނަކައަށް ތެޔޮ ގަނެގެން އެސްޓީއޯއަށް ދެ ބިލިއަން ރުފިޔާ ދައްކަން އެބަ އޮތެވެ.

އެސްޓީއޯގެ އިތުރުން އެހެން ފަރާތްތަކަށް ދައްކަން ޖެހޭ ފައިސާއާ އެކު ފެނަކައިގެ ދަރަނި 4.1 ބިލިއަން ރުފިޔާއަށް އަރަ އެވެ.

ފެނަކައަކީ ސަރުކާރު ހިއްސާވާ ކުންފުނިތަކުގެ ތެރެއިން ހަރަދާއި އާމްދަނީ އެންމެ ނުބައްދަލު އެއް ކުންފުންޏެވެ. އެ ކުންފުންޏަކީ އެންމެ ގިނަ މުވައްޒަފުން ވެސް ތިބި އެއް ކުންފުންޏެވެ.

އެ ކުންފުނީގައި 7،000 އަށް ވުރެ ގިނަ މުވައްޒަފުން ތިބިއިރު ލިބޭ އާމްދަނީގެ ގާތްގަނޑަކަށް 13 ޕަސެންޓް ހޭދަކުރަނީ މުވައްޒަފުންނަށް މުސާރަ ދިނުމަށެވެ. މުވައްޒަފުންގެ މުސާރަ އަށް މިދިޔަ އަހަރު ކޮންމެ މަހަކު 72 މިލިއަން ރުފިޔާ ހޭދަކުރި އެވެ. އެއީ އަހަރަކަށް މުވައްޒަފުންގެ މުސާރައަށް ގާތްގަނޑަކަށް 860 މިލިއަން ރުފިޔާ އެވެ.