ޒަކިއްޔާގެ މަރުގެ ތަހުގީގު ކުރިއަށް، ފުލުހުންގެ ޓީމެއް އަދިވެސް ހޮޅުދޫގައި

ނ. ހޮޅުދޫގައި މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ ތަހުގީގު އަދިވެސް ކުރިއަށްދާ ކަމަށާއި މިހާރު ވެސް ފުލުހުންގެ ޓީމެއް އެ ރަށުގައި ހަރަކާތްތެރިވަމުން އަންނަ ކަމަށް ޕޮލިސް ކޮމިޝަނަރު އަލީ ޝުޖާއު މިއަދު ވިދާޅުވެއްޖެ އެވެ.

ދިރިއުޅެމުން ދިޔަ ގޭގެ ތެރޭގައި ބޮޑެތި ޒަހަމްތަކަކާ އެކު ޒަކިއްޔާ މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10 ވަނަ ދުވަހު ހެނދުނު އެވެ. އެކަމަކު އެ މަރާ ގުޅިގެން މިހާތަނަށް ވަކި އެއްޗެއް ފުލުހުން ހާމަ ނުކުރާއިރު އެ މައްސަލާގައި މިހާތަނަށް މީހަކު ވެސް ހައްޔަރެއް ނުކުރެ އެވެ.

އުމުރުން 50 އަހަރުގެ ޒަކިއްޔާ މަރުވެފައި އޮއްވާ ފެނުނު ބައެއް މީހުން ބުނެފައިވަނީ އޭނާގެ ކަރު އޮތީ ބުރިކޮށްލާފައި ކަމަށާއި ހަށިގަނޑާއި ކަރު ވަކިނުވެ އޮތީ ހަމަ ކިރިޔާ ކަމަށެވެ. އަދި މީހަކު އަމިއްލަ އަށް އޭނާގެ ހަށިގަނޑަށް އެ ވަރުގެ އަނިޔާއެއް ދެވޭނެތޯ އެ މީހުން ސުވާލު އުފެއްދި އެވެ.

އެ މަރަށް އިންސާފު ނުލިބި ދިގުލައިގެންދާތީ ހޮޅުދޫގެ ރައްޔިތުން މިދިޔަ ހޯމަ ދުވަހު ވަނީ އިހުތިޖާޖަށް ނުކުމެ، އަޑު އުފުލައިފަ އެވެ.

އެކަމާ ގުޅިގެން ސީޕީ ޝުޖާއު "މިހާރު" އަށް ވިދާޅުވީ ޒަކިއްޔާގެ މަރުގެ މައްސަލަ ރިޕޯޓުކުރި ވަގުތުން ފެށިގެން ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. އަދި މިހާރު ވެސް ފުލުހުންގެ ޓީމެއް އެ ރަށުގައި ހަރަކާތްތެރިވަމުންދާ ކަމަށް ޝުޖާއު ވިދާޅުވި އެވެ.

ޝުޖާއު ވިދާޅުވީ މިފަދަ މައްސަލަތަކުގައި ވެސް ފުލުހުންގެ ޓާގެޓަކީ ވީހާ ވެސް އަވަހަކަށް މައްސަލަ ތަހުގީގު ކުރުމެވެ. އަދި އެ މައްސަލާގައި ވޭތުވެދިޔަ ދެ މަސް ދުވަހުގެ ތެރޭގައި ގިނަ މަސައްކަތްތަކެއް ކޮށްފައިވާކަން ސީޕީ ފާހަގަ ކުރެއްވި އެވެ.

އޭނާ ވިދާޅުވީ މަރުގެ މައްސަލައާ ގުޅިގެން އަޑުއިވޭ ނުވަތަ ލިބޭ ކޮންމެ މައުލޫމާތެއް ވެސް ފުލުހުން އަންނަނީ ކަށަވަރު ކުރަމުންނެވެ.

"މިކަމާ ގުޅޭގޮތުން ވަރަށް އަވަހަށް ފުލުހުން މައުލޫމާތު ހާމަކުރާނެ." ޝުޖާއު ވިދާޅުވި އެވެ.

ޒަކިއްޔާ މަރުވެފައި އޮއްވާ ފެނުނީ ގޭގެ ކުނި ނަގަން ވަން ބިދޭސީންތަކަކަށެެވެ. އެ ތަނުގައި ގިނަ އަދަދަކަށް ލޭ ހުރިއިރު ކައިރީގައި ވަޅިއެއް އޮތެވެ. އެ ހާދިސާ ހިނގިއިރު، އެ ގޭގައި ދިރިއުޅެނީ އޭނާގެ ފިރިމީހާ އާއި ފިރިހެން ދަރިފުޅާއި އޭނާގެ އަނބިމީހާ އަދި މާމަ ދަރިފުޅެވެ. ޒަކިއްޔާގެ ދެވަނަ ދަރިފުޅު ދިރިއުޅެނީ މާލޭގަ އެވެ.