ޗައިނާގެ ޑިފެންސް މިނިސްޓަރަށް ކޮރަޕްޝަންގެ ތުހުމަތު

ޗައިނާގެ އަސްކަރިއްޔާއާ ގުޅުން ހުރި ކޮރަޕްޝަނަށް ތުހުމަތުކުރެވޭ މައްސަލަތަކެއް ފެންމަތިވެފައި ވަނިކޮށް ޑިފެންސް މިނިސްޓަރު ޑޮންގް ޖުންގެ މައްޗަށް ވެސް ތުހުމަތުކުރެވި ތަހުގީގެއް ހިންގަން ފަށައިފި އެވެ.

މިކަމުގެ މައުލޫމާތު އެނގޭ، އެމެރިކާގެ މިހާރުގެ އޮފިޝަލުންނާއި ކުރީގެ އޮފިޝަލުންނާ ހަވާލާދީ އިނގިރޭސި ވިލާތުގެ ފައިނޭންޝަލް ޓައިމްސް އިން ބުނީ ޑޮންގުގެ މައްސަލަ ބަލަނީ ކޮރަޕްޝަނާ ގުޅުން ހުރި ފުޅާ ތަހުގީގެއްގެ ތެރެއިން ތުހުމަތުކުރެވިގެން ކަމަށެވެ.

އޭއެފްޕީން މިކަމާ ގުޅޭ ގޮތުން ސުވާލުކުރުމުން ފޮރިން މިނިސްޓްރީން ވެސް އަދި ވޮޝިންޓަންގައި ހުންނަ އެ ގައުމުގެ އެމްބަސީން ވެސް ޖަވާބެއް ނުދިނެވެ.

ނޭވީގެ ކުރީގެ ކޮމާންޑަރެއްގެ ގޮތުގައި ހުންނެވި ޑޮންގް ޑިފެންސް މިނިސްޓަރުގެ މަގާމަށް ހަމަޖެއްސީ މިދިޔަ އަހަރުގެ ޑިސެމްބަރު މަހު، އޭރު އެ މަގާމުގައި ހުންނަވާތާ އެންމެ ހަތް މަސްވީ ލީ ޝަންގްފޫ ކުއްލި ގޮތަކަށް މަގާމުން ވަކިކުރުމަށް ފަހު އެވެ.

އޭގެ ފަހުން ލީ ވަނީ، ވެރިކަން ކުރާ ކޮމިއުނިސްޓް ޕާޓީން ރިޝްވަތުގެ ތުހުމަތުގައި ވަކިކޮށްފައި ކަމަށް ދައުލަތުގެ މީޑިއާއިން ބުނެފައިވެ އެވެ.

އޭނާގެ ކުރިން އެ މަގާމުގައި ހުންނެވި ވެއި ފެންގޭ ވެސް ވަނީ ކޮރަޕްޝަންގެ ތުހުމަތުގައި ޕާޓީން ވަކިކޮށް ޕްރޮސެކިއުޓަރުންނާ ހަވާލުކޮށްފަ އެވެ.

ފާއިތުވި އަހަރެއްހާ ދުވަހުގެ ތެރޭގައި ޗައިނާއިން ވަނީ ސިފައިންގެ ތެރޭގައި ކޮރަޕްޝަންގެ އަމަލުތައް ހިންގަމުންދާ ކަމަށް ތުހުމަތުކުރެވޭ މީހުންނާ ދެކޮޅަށް ފިޔަވަޅުތައް އިތުރަށް ވަރުގަދަކޮށްފަ އެވެ.