ޓޫރިސްޓުން މަރުވުމުގެ ހާދިސާތައް އިތުރުވާތީ، ހިދުމަތް ދިނުމުގެ ސަލާމަތީ މިންގަނޑެއް ކަނޑައަޅައިފި

ރާއްޖެއަށް ޗުއްޓީ ހޭދަކުރަން އަންނަ ފަތުރުވެރިން ގެނބުމާއި މަރުވުމުގެ ހާދިސާތައް އިތުރުވާތީ، ޓޫރިސްޓުންނަށް ހިދުމަތް ދޭ ތަންތަނުން އަމަލު ކުރަންޖެހޭ ސަލާމަތީ މިންގަނޑެއް ޓޫރިޒަމް މިނިސްޓްރީން ކަނޑައަޅައިފި އެވެ.

ގެސްޓްހައުސްތަކާއި މީހުން ދިރިއުޅޭ ރަށްރަށުގައި ފީނުގެ ހިދުމަތްދޭ ތަންތަނާއި ހޯމްސްޓޭ އާއި ޓޫރިސްޓް އުޅަނދު އޮޕަރޭޓްކުރާ ފަރާތްތަކަށް މިނިސްޓްރީން ފޮނުވި ސާކިއުލާގައި ބުނީ މޫދުގެ ހަރަކާތްތަކުގައި ގިނަ އެކްސިޑެންޓުތަކާއި ފުރާނައަށް ގެއްލުންވާ ފަދަ ހިތާމަވެރި ހާދިސާތަކެއް ހިނގަމުން އަންނަ ކަމަށެވެ.

މިނިސްޓްރީން ބުނީ ރާއްޖެއަށް އަންނަ ގިނަ ފަތުރުވެރިންނަކީ މޫދުގެ ހަރަކާތްތަކުގައި ވަރަށް ބޮޑަށް ބައިވެރިވާ ބައެއް ކަމަށާއި އެހެންވެ، އެމީހުންނަށް ދިމާވާ މިފަދަ ހާދިސާތައް ހުއްޓުވުމަށް އަވަސް ފިޔަވަޅުތަކެއް އަޅަން ބޭނުންވާ ކަމަށް ޓޫރިޒަމް މިނިސްޓްރީން ބުންޏެވެ.

އެކަމާ ގުޅޭ ގަވައިދެއް އެކުލަވާލައި ގެޒެޓް ކުރުމުގެ މަސައްކަތް ކުރަމުން އަންނަ ކަމަށާއި އެކަމަކު ގަވައިދެއް ހެދެންދެން ވެސް ސަލާމަތީ މިންގަނޑުތަކަކަށް އަމަލު ކުރަންޖެހޭތީ އެ މިންގަނޑަށް އަމަލު ކުރުމުގައި އެއްބާރުލުން ދިނުމަށް އެ ސާކިއުލާގައި މިނިސްޓްރީން އެދިފައިވެ އެވެ.

"ފަތުރުވެރިކަމުގެ ޕީކް ސީޒަންގެ ތެރެއަށް އަޅުގަނޑުމެން ކުރިމަތިލާއިުރ މިފަދަ ހިތާމަވެރި ހާދިސާތައް ތަކުރާރުވިޔަ ނުދިނުމަށްޓަކައި އިލްތިމާސް ކުރެވިފައިވާ ހުރިހާ ކަންތައްތަކަށް ފުރިހަމައަށް ރިއާޔަތްކޮށް ދިވެހިރާއްޖެއަށް ޒިޔާރާތްކުރާ ހުރިހާ ފަތުރުވެރިންގެ ސަލާމަތާއި ރައްކާތެރިކަމަށްޓަކައި ކުރެވެން ހުރި ހުރިހާ ކަމެއް ކުރުމާއި ވެދެވެން އޮތް ހުރިހާ އެއްބާރުލުމެއް ބޭނުންވާ ވާހަކަ މި ފުރުސަތުގައި ދަންނަވަމެވެ." ފަތުރުވެރިންނަށް ހިދުމަތްދޭ ތަންތަނަށް ފޮނުވި ސާކިއުލާގައިވެ އެވެ.

ސަލާމަތީ މިންގަނޑުގައި ފާހަގަކުރާ ކަންކަން:

- މޫދު ކުޅިވަރުގެ ހަރަކާތެއް ފެށުމުގެ ކުރިން އެ ހަރަކާތަކާއި ގުޅޭގޮތުން ސަލާމަތީ ކަންކަމުގެ މައުލޫމާތު ބައިވެރިންނަށް ދިނުން.

- މޫދު ކުޅިވަރުގައި ބޭނުންކުރާ ތަކެއްޗަކީ ސަލާމަތީ މިންގަނޑަށް ފެތޭ ތަކެއްޗަށްވުން. އަދި އެތަކެތި އުފެއްދި ފަރާތަކުން އެތަކެތި ބޭނުންކުރަން ކަނޑައަޅާފައިވާ ގޮތް ނޫން ގޮތަކަށް ބޭނުން ނުކުރުން.

- ފަތަން ނުދަންނަ މީހަކު މޫދު ކުޅިވަރުގައި ބައިވެރިވާ ނަމަ، ބައިވެރިކުރެވޭނީ ލައިފް ޖެކެޓް އަޅުވައިގެން.

- މޫދު ކުޅިވަރުތަކުގެ ތެރެއިން ސަރަހައްދު ވަކިކޮށްގެން ހިންގިދާނެ ފަދަ ކުޅިވަރުތައް ހިންގަންވާނީ އެ ކުޅިވަރެއް ހިންގުމަށް ކަނޑައަޅާފައިވާ ސަރަހައްދުގައި.

- މޫސުން ގޯސްވާނެ ކަމަށް މޫސުމާ ބެހޭ އިދާރާއިން މައުލޫމާތު ދީފި ނަމަ ނުވަތަ ކުޅިވަރު ކުޅެވޭ ވަރަށް ވުރެ މޫސުން ގޯސްވެއްޖެ ކަމަށް އިންސްޓްރަކްޓަރަށް ފެނިއްޖެ ކޮންމެ ހިނދެއްގައި ކުޅިވަރު މެދުކަނޑާލުން.

- ކޮންމެ ދުވަހެއްގެ މޫސުމާ ބެހޭ އިރުޝާދު ބައިވެރިންނަށް ދިނުން.

- މޫދު ކުޅިވަރުގެ އިންސްޓްރަކްޓަރާއި މޫދު ކުޅިވަރު ސެންޓަރާ ދެމެދު މުއާމަލާތް ކުރެވޭނެ މުއާސަލާތީ ވަސީލަތެއް ތައްޔާރީ ހާލަތެއްގައި އޮތުން.

- މޫދު ކުޅިވަރުގައި ބައިވެރިވާ ފަރާތްތަކުގެ މައުލޫމާތު ހިމެނޭ ލޮގެއް ބެލެހެއްޓުން. އޭގައި އެމީހުންގެ ނަމާއި އައިޑެންޓިޓީ އާއި ޕާސްޕޯޓު ނަމްބަރާއި އުމުރު އެނގެން އޮންނަން ޖެހޭ.

- މޫދު ކުޅިވަރުގެ ހިދުމަތްދޭ ފަރާތުން ރާވައިގެން ހިންގާ މޫދު ކުޅިވަރުތަކުގައި ބައިވެރިވާ ފަރާތްތަކުގެ ސިއްހީ ހާލަތާ ބެހޭ އިގުރާރު ފޯމެއް ފުރުވައި އޭގައި ސޮއި ކުރުވުން. ފޯމުގައި ސޮއިކުރާ މީހާ، އޭނާ އަމިއްލައަށް ކުރިމަތިލާ ނުރައްކަލެއްގެ ސަބަބުން ލިބޭ ގެއްލުމަކަށް ޒިންމާ ވާނީ އޭނާ ކަމުގައި އެ އިގުރާރުގައި ބަޔާން ކޮށްފައި އޮންނަންވާނެ

- މޫދު ކުޅިވަރުތަކުގައި 16 އަހަރު ނުފުރޭ ކުޑަ ކުއްޖަކު ބައިވެރިވާ ނަަމަ، އޭނާގެ ބެލެނިވެރިޔާ އިގުރާރު ފޯމުގައި ސޮއިކުރުން.

އެ މިންގަނޑަށް މިދިޔަ ބުރާސްފަތި ދުވަހުން ފެށިގެން އަމަލުކުރަން ވަނީ ފަށައިފަ އެވެ.

ރާއްޖެއަށް ޗުއްޓީއަށް އަންނަ މީހުން ގެނބުމާއި މަރުވުމުގެ ހާދިސާތައް މިފަހަކަށް އައިސް ވަރަށް ބޮޑަށް އިތުރުވިޔަސް މިހާތަނަށް، ޓޫރިސްޓުންނަށް މިފަދަ ހިދުމަތްތައް ދިނުމުގައި އަމަލު ކުރަންޖެހޭނެ މިންގަނޑެއް ނެތެވެ. އެކަމަކު ފަތުރުވެރިންނަށް މޫދު ކުޅިވަރުގެ ހިދުމަތް ދިނުމުގައި ފަރުވާ ކުޑަކަމުގެ ޝަކުވާ އޮތީ ބޮޑުވެފަ އެވެ.