ހަނާ މަރަން ކުރި ހުކުމުގެ މައްސަލައިގެ އަޑުއެހުމެއް މާދަމާ

ގާނޫނީ ވަކީލް އަހުމަދު ނަޖީބް މަރާލި މައްސަލާގައި، އެކަމުގައި ބައިވެރިވި ފާތިމަތު ހަނާ މަރަން ކޮށްފައިވާ ހުކުމާ މެދު ޝަރުއީ އެންމެ މަތީ މަރުހަލާއިން މާދަމާ ގޮތެއް ކަނޑައެޅުމަށް ސުޕްރީމް ކޯޓުން އަޑުއެހުމެއް ތާވަލުކޮށްފި އެވެ.

ހަނާ މަރަން ހުކުމްކުރި މައްސަލާގައި އަޑުއެހުންތައް ސުޕްރީމް ކޯޓުން ނިންމާލާފައިވަނީ އޭޕްރީލް، 2021 ގަ އެވެ. އޭގެ ތިން އަހަރު ފަހުން އެ މައްސަލައިގެ އަޑުއެހުމެއް ތާވަލް ކޮށްފައިވަނީ މާދަމާ ހެނދުނު 10:00 އަށެވެ.

ޖޫން، 2012 ގައި ހަނާ އާއި އޭނާގެ އޭރުގެ ލޯބިވެރިޔާ މ. މަސްރޫރާ، އަހުމަދު މުއްރަތު ބައިވެރިވެގެން، މުއްރަތުގެ ގޭގައި ވަކީލް ނަޖީބް ރަހީނުކޮށް، އޭނާ އަތުން ފައިސާ އަތުލުމަށް ފަހު، ވަޅިން ހަމަލާދީ އޭނާ މަރާލި މައްސަލައިގައި ހަނާ އާއި މުއްރަތު މެރުމަށް ކްރިމިނަލް ކޯޓުން ކުރި ހުކުމަށް ހައި ކޯޓުން ކުރިން އޮތީ ތާއީދުކޮށްފަ އެވެ.

ހަނާގެ ފަރާތުން އެ މައްސަލަ ސުޕްރީމް ކޯޓުގައި އިސްތިއުނާފު ނުކުރާތީ، އެ ހުކުމުގެ ސައްހަކަން ކަށަވަރު ކުރަން ސުޕްރީމް ކޯޓަށް ހުށަހެޅީ ދައުލަތުންނެވެ.

އެ މައްސަލަ ސުޕްރީމް ކޯޓުން ބައްލަވަނީ އުއްތަމަ ފަނޑިޔާރު އަހުމަދު މުއުތަސިމް އަދުނާނާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު ހުސްނުއްސުއޫދު އަދި ފަނޑިޔާރު ޑރ. މުހައްމަދު އިބްރާހިމެވެ. ބެންޗުގެ ރިޔާސަތަކީ އުއްތަމަ ފަނޑިޔާރެވެ.

ސުޕްރީމް ކޯޓުގައި ހަނާ ބުނެފައިވަނީ މުއްރަތުގެ ގެއަށް ނަޖީބު ގެނައީ މުއްރަތުގެ މަންމަގެ ގޭގެ މައްސަލައެއްގައި ގާނޫނީ އެހީތެރިކަން ހޯދަން ކަމަށާއި ނަޖީބު އެ ގެއަށް އައީ އިރުއޮއްސުނު ފަހުން ކަމަށެވެ. އަދި އެ މައްސަލައާ ގުޅޭގޮތުން ވާހަކަ ދައްކަން ތިބެފައި މުއްރަތު ބޭރަށް ނުކުތުމުން ނަޖީބުގެ ފަރާތުން އުނދަގޫވާ ކަހަލަ ކަންތައްތަކެއް ފެނުނު ކަމަށާއި އެހެންވެ ބޭރަށް ނުކުމެ، އެ ވާހަކަ މުއްރަތު ކައިރީގައި ބުނި ކަމަށް ހަނާ ބުނެފައިވެ އެވެ.

އެ ވާހަކަ ބުނުމުން މުއްރަތު ކޮޓަރި އަށް ވަދެ ވަޅިއެއް ހިިފައިިގެން ގޮސް، ނަޖީބުގެ ކަރުގައި ވަޅި ޖެއްސި ކަމަށާއި އަދި ނަޖީބުގެ މޫނާއި އަނގަމަތީގައި ޓޭޕް އަޅައި، ގޮނޑިއެއްގައި ބަދެފައިވާނެ ކަމަށް ހަނާ ބުންޏެވެ.

އޭނާ ބުނިގޮތުގައި އޭގެ ފަހުން ނަޖީބުގެ ކޭޝްކާޑާއި ޕިން ނަމްބަރުު އަތުލައިގެން އެރޭ މުއްރަތާ ދެ މީހުން ރަލާއި އެކި ކާބޯތަކެތި ގެނެސް، ރާ ބޮއެގެން ނިދީ އެވެ. އޭނާ އަށް ހެނދުނު ހޭލެވުނީ މުއްރަތު ވަރަށް ހާސްވެގެން އޭނާ އަށް ގޮވުމުން ކަމަށާއި އޭރު ނަޖީބު މަރާލާފައިވާ ކަމަށް ހަނާ ބުންޏެވެ.

ދައުލަތުން ބުނިގޮތުގައި އިސްލާމީ ޝަރީއަތުގައިވާ ގޮތުގެ މަތިން ހަނާއަށް މަރުގެ އަދަބު ނުދެވޭނެ ސަބަބެއް ނެތެވެ. އެއީ ނަޖީބުގެ ވާރިސުންގެ މަރަށް މަރު ހިފަން ބޭނުންވުމާއި ހަނާއަކީ ބުއްދި ސަލާމަތުން ހުރި މީހަކަށް ވުމުގެ އިތުރުން އޭނާއަށް މަރުގެ އަދަބު ނުދެވޭނެ ފަދަ ހާލަތެއް އޮތްކަން ހަނާއަށް ސާބިތުކޮށް ނުދެވޭތީ ކަމަށް ދައުލަތުން ބުނެފައިވެ އެވެ.

އެ މައްސަލާގައި މުއްރަތު މެރުމަށް ކުރި ހުކުމަށް ސުޕްރީމް ކޯޓުން 2016 ގައި ވަނީ ތާއީދު ކޮށްފަ އެވެ. އެކަމަކު އެ ހުކުމް މިހާތަނަށް ތަންފީޒު ކޮށްފައެއް ނުވެ އެވެ.