ނާޒިމްގެ ހިޔާލެއް: ގަތުލްއާންމު ހިންގާ ފަރާތްތަކަށް އަމާޒުކޮށް ޕާސްޕޯޓު މަނާކުރެވިދާނެ!

އިޒްރޭލުން ފަލަސްތީނުގައި ހިންގާ ނަސްލު ނައްތާލުމުގެ ޖަރީމާތަކުގެ އަދަބެއްގެ ގޮތުން، ރާއްޖެ އައުން މަނާ ކުރަންވީ އެ ޖަރީމާތަކުގައި ބައިވެރިވާ ފަރާތްތައް ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެ އެވެ.

އިޒްރޭލްގެ ޕާސްޕޯޓު މަނާކުރުމަށް އިމިގްރޭޝަން ގާނޫނަށް ހުށަހެޅި އިސްލާހާ ގުޅޭ ގޮތުން ބޭއްވި 241 ކޮމިޓީގެ ބައްދަލުވުމުގައި ވާހަކަ ދައްކަވަމުން ނާޒިމް ވިދާޅުވީ، އިޒްރޭލްގެ ޕާސްޕޯޓު އޮންނަ އެންމެން ރާއްޖެ އެތެރެވާން މަނާކުރަން ކެބިނެޓުން ނިންމާފައިވީ ނަމަވެސް ސައުތު އެމެރިކާ އާއި އެމެރިކާ އާއި އާޖެންޓީނާ ފަދަ ގައުމުތަކުގައި އެ ޕާސްޕޯޓުގައި އުޅޭ ރައްޔިތުން ވަރަށް ގިނަ ވާނެ ކަމަށެވެ.

ޖޯޑަން އާއި އަރަބި ބައެއް ގައުމުތަކާއި ފަލަސްތީން މީހުން ވެސް ބޭނުން ކުރަނީ އިޒްރޭލްގެ ޕާސްޕޯޓު ކަމަށް ނާޒިމް ވިދާޅުވި އެވެ.

"މިސާލަކަށް ދަންނަވާ ކަމަށް ވަންޏާ އާޖެންޓީނާ އަކީ ވަރަށް ގިނަ އިޒްރޭލް މީހުން ތިބޭ ގައުމެއް، ވަރަށް ގިނަ ޔަހޫދީން ހިޖުރަ ކުރި ގައުމެއް. އެ މީހުން އާޖެންޓީނާ ޕާސްޕޯޓަށް ވުރެ ގިނައިން އިޒްރޭލް ޕާސްޕޯޓު ބޭނުން ކުރަނީ. އެއީ އެމެރިކާ އަށް ވެސް ފަސޭހައިން ދެވޭތީ،" ނާޒިމް ވިދާޅުވި އެވެ.

އިޒްރޭލް ޕާސްޕޯޓު މަނާ ކުރުމުގެ ކުރިން ތަފާސްހިސާބު ހޯދުމަށް ފަހު، އެއީ ކިހާ އަދަދެއްގެ މީހުންތޯ ބަލަން ޖެހޭ ކަމަށް ނާޒިމް ވިދާޅުވި އެވެ. އެ ޕާސްޕޯޓުގައި މީހުން ރާއްޖެ އަންނަނީ ހަމައެކަނި ޓޫރިޒަމްގެ ބޭނުމަށްތޯ ނުވަތަ އެހެން މަސައްކަތެއްގައި ރާއްޖެ އައިސް އުޅޭތޯ ވެސް ބަލަން ޖެހޭ ކަމަށް ނާޒިމް ވިދާޅުވި އެވެ.

"އަޅުގަނޑުމެންނަށް ބުރައެއް ނުވާނެ އިޒްރޭލްގެ ޕާސްޕޯޓަކަށް ވީތީ ބޭން ކުރާކަށް،" އޭނާ ވިދާޅުވި އެވެ.

ނާޒިމް ވިދާޅުވި ގޮތުގައި އދ. އިން ވެސް އެފަދަ މައްސަލަތަކުގައި ފިޔަވަޅު އަޅަނީ އަސްކަރީ ހަރަކާތްތަކުގައި ބައިވެރިވާ ނުވަތަ އިންސާނީ ހައްގުތައް ހިފެހެއްޓުމުގައި އުޅޭ މީހުންނަށެވެ.

އެގޮތަށް އަސްކަރިއްޔާގައި އުޅޭ މީހުންގެ ޕާސްޕޯޓު ރާއްޖެ އިން މަނާ ކުރުމަކީ ވެސް ފިޔަވަޅު އެޅިދާނެ އެއްގޮތް ކަމަށް ނާޒިމް ވިދާޅުވި އެވެ. އެކަން ކުރުމަށްޓަކައި އެ މައުލޫމާތުތައް ވެސް ހޯދަން ޖެހޭ ކަމަށް ނާޒިމް ވިދާޅުވި އެވެ.

ސަރުކާރުން އިޒްރޭލް ޕާސްޕޯޓު އެއްކޮށް މަނާ ކުރަން ނިންމާފައިވީ ނަމަވެސް މަޖިލީހުން ދިރާސާ ކުރުމަށް ފަހު އެހެން ގޮތަކަށް ލަފާ ދޭން ބޭނުން ނަމަ އެކަން ވެސް ކުރެވިދާނެ ކަމަށް ނާޒިމް ވިދާޅުވި އެވެ.

"ޓާގެޓް ކުރާނީ ގަތުލުއާންމު ހިންގާ ފަރާތްތަކަށް ނަމަ އެކަން އެގޮތަށް ކުރެވިދާނެ،" އޭނާ ވިދާޅުވި އެވެ.

އެ ކޮމިޓީން މިއަދު ވަނީ އެ މައްސަލާގައި ރާއްޖޭގެ ހުރިހާ ސިޔާސީ ޕާޓީތަކާއި ސަރުކާރުގެ ކަމާބެހޭ އިދާރާތަކާއި ޓޫރިޒަމް ދާއިރާގެ ޖަމިއްޔާތަކާ ބައްދަލު ކުރުމަށް ނިންމައިފަ އެވެ.