އިޒްރޭލު ޕާސްޕޯޓު މަނާކުރަން ފަލަސްތީނާއި އަރަބި ގައުމުތަކުގެ ލަފާ ހޯދަން ޖެހޭ: ފަލާހު

ފަލަސްތީނުގެ ނަސްލު ނައްތާލަން އިޒްރޭލުން ހިންގާ ޖަރީމާތަކާ ގުޅިގެން، އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރުމުގެ ކުރިން އެކަމާ މެދު ފަލަސްތީނުން ދެކޭ ގޮތާއި އަރަބި ގައުމުތަކުގެ ލަފައެއް ވެސް ހޯދަންޖެހޭ ކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު މިއަދު ވިދާޅުވެއްޖެ އެވެ.

އިޒްރޭލްގެ ޕާސްޕޯޓު މަނާކުރަން އިމިގްރޭޝަން ގާނޫނަށް ހުށަހެޅި އިސްލާހާ ގުޅޭ ގޮތުން ބޭއްވި 241 ކޮމިޓީގެ ބައްދަލުވުމުގައި ފަލާހު ވިދާޅުވީ، ހުށަހަޅާފައިވާ މައްސަލައާ މެދު ގޮތެއް ނިންމަންވާނީ ވަރަށް ބޮޑަށް މަޝްވަރާ ކުރުމަށް ފަހުގައި ކަމަށެވެ.

އޭނާ ވިދާޅުވީ އިޒްރޭލު ޕާސްޕޯޓު މަނާކުރުމުގެ ކުރިން، އެކަމުގެ ސަބަބުން ފަލަސްތީނަށް އޮތީ ކޮން ފައިދާއެއްތޯ ބަލަންޖެހޭ ކަމަށެވެ.

"މި ކަމުގެ ސަބަބުން އެ ބޭފުޅުންނަށް، އެ ގައުމަށް މިކަމުގައި ކިހާ މަންފާއެއް، ފައިދާއެއް ހުރިތޯ ނުވަތަ އެ ބޭފުޅުންނަށް [އިޒްރޭލު ޕާސްޕޯޓު މަނާކުރުމުން] ލިބޭނެ ހިތްހަމަޖެހުމާއި އުފާވެރިކަން އޮތްތޯ [ބަލަން ޖެހޭ]،" ފަލާހު ވިދާޅުވި އެވެ.

އިޒްރޭލުގައި ވެސް އެތައް ހާސް މުސްލިމުންނެއް އުޅޭ ކަމަށާއި އެހެންކަމުން މި މައްސަލާގައި ގޮތެއް ނިންމުމުގެ ކުރިން އަރަބި އެހެން ގައުމުތަކުގެ ލަފާ ވެސް ހޯދަން ޖެހޭ ކަމަށް އޭނާ ވިދާޅުވި އެވެ.

އިޒްރޭލް ޕާސްޕޯޓު މަނާ ކުރުމުގެ ކުރިން ތަފާސްހިސާބު ހޯދުމަށް ފަހު، އެއީ ކިހާ އަދަދެއްގެ މީހުންތޯ ބަލަން ވެސް 241 ކޮމިޓީން ވަނީ ނިންމައިފަ އެވެ. އެ ކޮމިޓީން ވަނީ އެ މައްސަލައިގައި ރާއްޖޭގެ ހުރިހާ ސިޔާސީ ޕާޓީތަކާއި ސަރުކާރުގެ ކަމާބެހޭ އިދާރާތަކާއި ޓޫރިޒަމް ދާއިރާގެ ޖަމިއްޔާތަކާ ބައްދަލު ކުރުމަށް ނިންމައި އެކަމުގެ މަސައްކަތް ކުރަމުންނެވެ.

ސަރުކާރު ހިންގާ ޕީއެންސީގެ މެޖޯރިޓީ އޮންނަ ކޮމިޓީން އަންދާޒާ ކުރަނީ އެ މައްސަލަ ނިމޭނީ އަންނަ އަހަރުގެ ފެބްރުއަރީ މަހު ކަމަށެވެ.