ހަނިމާދޫގައި ހަދާ 15 މިލިއަން ޑޮލަރުގެ ފިއުލް ޖެޓީ ބޭކާރު: މުއްތަލިބު

ހދ. ހަނިމާދޫގައި މިދިޔަ ސަރުކާރުން ހަދަން ފެށި ފިއުލް ޖެޓީއަކީ ބޭކާރު ތަނެއް ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިރޭ ވިދާޅުވެއްޖެ އެވެ.

ދައުލަތުގެ މީޑިއާއިން މިރޭ ގެނެސްދިން "ހަފްތާ 52" ޕްރޮގްރާމުގައި މުއްތަލިބު ހިމެނިވަޑައިގަންނަވާ ގޮތަށް އިތުރު ތިން މިނިސްޓަރަކު ވަނީ ސަރުކާރުން މިދިޔަ އަހަރެއްހާ ދުވަހު ކުރި މަސައްކަތްތައް ހިއްސާ ކުރައްވައިފަ އެވެ.

އެ ޕްރޮގްރާމުގައި މުއްތަލިބު ވިދާޅުވީ މިދިޔަ ސަރުކާރުގައި އިންފްރާސްޓްރަކްޗާ މިނިސްޓްރީއެއް އޮއްވާ އިކޮނޮމިކް ޑިވެލޮޕްމަންޓް މިނިސްޓްރީން ބޮޑެތި ޕްރޮޖެކްޓްތައް ޓެންޑާކޮށް ހިންގުމަށް ހަވާލުކޮށްފައިވާ ކަމަށެވެ.

އޭގެ ތެރޭގައި އޭނާ ފާހަގަ ކުރެއްވީ ހަނިމާދޫ އެއާޕޯޓު މަޝްރޫއު އާއި ގަމު އެއާޕޯޓާއި ފެލިވަރު މަސް ފެކްޓްރީގެ މަޝްރޫއުއެެވެ.

މިނިސްޓްރީތަކުގެ ޓެކްނިކަލް މުވައްޒަފުން ބައިވެރިނުކޮށް، މިދިޔަ ސަރުކާރުގައި ބޭކާރު ތަންތަން ތަރައްގީކޮށްފައިވާ ކަމަށް މުއްތަލިބު ވިދާޅުވި އެވެ.

އޭނާ ވިދާޅުވި ގޮތުގައި ހަނިމާދޫގައި އެއް ކިލޯ މީޓަރުގެ ފިއުލް ޖެޓީއެއް ހަދާފައިވާއިރު މިތަނުގެ އަގު 15 މިލިއަން ޑޮލަރަށް އަރަ އެވެ.

"ދެން މި ހަދާ ގޮތަކީ ޓެންޑާކޮށްފައި ބަޔަކު ހޯދާފައި ނެގޯޝިއޭޓް ކޮށްފައި ސޮއި ކުރަން މި ހަވާލުކުރަނީ އެސްއޯއީއަކާ. ދެން އެކަމާ ގުޅޭ މިނިސްޓްރީތަކުގެ ޓެކްނިކަލް މުވައްޒަފުން ބައިވެރިނުކޮށް ބޭކާރު ތަންތަން ހެދިފައި އެބަ ހުރި. މިސާލަކަށް ދަންނަވަންޏާ ހަނިމާދޫގައި އެބަ އޮތް އެއް ކިލޯ މީޓަރުގެ ފިއުލް ޖެޓީއެއް އަޅާފައި،"

މުއްތަލިބު ވިދާޅުވީ ހަނިމާދޫއަކީ ފުން ފަޅެއް އޮންނަ ރަށެއް ކަމަށާއި އެތަނަށް ތެޔޮ ބާޖެއް ވައްދައިގެން ވެސް ތެޔޮ އެޅޭނެ ކަމަށެވެ.

"ހަނިމާދޫއަކީ ފުން ފަޅެއް އޮންނަ ތަނަކަށްވާތީ އެތަނަށް ބޭނުންވާ ތެޔޮ ބާޖެއްގައި ވެއްދޭ ވަރުގެ ތަނެއް. މާކަނޑުގައި ގޮސް ބޯޓެއް ބާއްވައިގެން ތެޔޮ ސަޕްލައި ކުރަންޖެހޭ ވަރު ތަނެއް ނޫން އެއީ،" އޭނާ ވިދާޅުވި އެވެ.

މުއްތަލިބު ވިދާޅުވި ގޮތުގައި މުސްތަގުބަލުގައި ވެސް އެތަނަށް ގޮސްގެން ތެޔޮ ސަޕްލައި ކުރަން ނުޖެހޭނެ އެވެ.

އެހެންވެ، އެހާ ބޮޑު އަދަދެއް ހޭދަކޮށްގެން ފިއުލް ޖެޓީއެއް ހަދާތީ މި ސަރުކާރުން އެތަން ނަގަން ބެލި ކަމަށާއި އެކަމަކު އެތަނުގެ މަސައްކަތް އޮތީ ވަރަށް ބޮޑަށް ކުރިއަށް ގޮސްފައި ކަމަށާއި އެތަން ނަގައިގެން ދައުލަތަށް ލިބޭ ގެއްލުން މާބޮޑު ކަމަށް އޭނާ ވިދާޅުވި އެވެ.

"މި ދަންނަވާ އެއްޗަކީ އެ ބޭފުޅުން [ކުރީ ސަރުކާރުން] ބެއްލެވީ އެއް ގޮތެއް ނެތިއްޔާ އަނެއް ގޮތުން ވެސް ޕްރޮޖެކްޓް ހިންގޭތޯއޭ ކޮންމެ ދިމާލަކުން ވިޔަސް،"

މިނިސްޓަރު ވިދާޅުވި ގޮތުގައި ކުރީ ސަރުކާރުން ގިރާވަރުގެ ބިން ހިއްކުން ވެސް ހަވާލުކޮށްފައި އޮތީ މޯލްޑިވްސް ފަންޑް މެނޭޖްމަންޓް ކޯޕަރޭޝަނާ ކަމަށާއި އެ ކުންފުނި އުފައްދާފައި އޮތީ ދައުލަތުގެ ފަންޑު މެނޭޖްކޮށްގެން ފައިސާ ހޯދުމަށް ނަމަވެސް ޕްރޮޖެކްޓް ހިންގަން ނޫނެވެ.

އެކަމަކު އެ ކުންފުންޏަށް ގިރާވަރު ޕްރޮޖެކްޓް ހަވާލުކޮށްފައި ވަނީ 7.5 މިލިއަން ރުފިޔާ އެޑްވާންސް ފައިސާއަށް ދޫކުރުމަށްފަހު ކަމަށާއި ފަހުން އިންތިހާބުގެ ދެވަނަ ބުރުގެ ތެރޭގައި ވެސް 10 މިލިއަން އިތުރަށް ދޫކޮށްފައިވާ ކަމަށް އޭނާ ވިދާޅުވި އެވެ.

އެ މަސައްކަތަށް އެއްބާރުލުން ދިނުމަށް މި ސަރުކާރުން ވެސް ފައިސާ ދޫކުރި ނަމަވެސް މަސައްކަތް ކުރިއަށް ނުދާ ކަމަށް އޭނާ ވިދާޅުވި އެވެ.

ކުރީ ސަރުކާރުގެ ޕްރޮޖެކްޓްތައް ހިންގާފައި ހުރީ އެކަމާ ބެހޭ މިނިސްޓްރިއަކާ ނުވެސް ގުޅޭ ގޮތަށް ކަމަށް ވިދާޅުވެ މުއްތަލިބު ނުރުހުން ފާޅު ކުރެއްވި އެވެ. އަދި އެއީ ރަނގަޅު ނިޔަތެއްގައި ކުރި ކަމެއްގެ ގޮތުގައި ނުބެލެވޭ ކަމަށް ވިދާޅުވި އެވެ.