މާލެ އާއި ވިލިމާލޭގެ މަގު ހެދުމުގެ މަޝްރޫއުގެ އެލްއޯއީގައި ޗައިނާއާއެކު ސޮއިކޮށްފި

މާލެ އާއި ވިލިމާލޭގެ މަގުތައް ހެދުމުގެ މަޝްރޫއުއަށް ޗައިނާއާ އެކު ލެޓާ އޮފް އެކްސްޗޭންޖް (އެލްއޯއީ) ގައި ރާއްޖެއިން މިއަދު ސޮއިކޮށްފި އެވެ.

މި އެލްއޯއީގައި ރާއްޖެއިން ސޮއި ކުރެއްވީ ޗައިނާގެ ފޮރިން މިނިސްޓަރު ވަންގް ޔީގެ ދައުވަތަކަށް ހަތަރު ވަޒީރަކު ޗައިނާއަށް ކުރައްވާ ދަތުރުފުޅުގެ ތެރެއިން، އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބެވެ.

އިންފްރާސްޓްރަކްޗާ މިނިސްޓްރީން ބުނީ ބެއިޖިންގައި ބޭއްވި ރަސްމިއްޔާތެއްގައި އެލްއޯއީގައި ޗައިނާގެ ފަރާތުން ސޮއިކުރެއްވީ ޗައިނާ އިންޓަނޭޝަނަލް ޑިވޮލޮޕްމެންޓް ކޯޕަރޭޝަންގެ ޗެއާމަން ޒަހޯހުއި ކަމަށެވެ.

މިނިސްޓްރީން ބުނީ އެލްއޯއީގައި ސޮއި ކުރެވުމާއެކު، ފީޒިބިލިޓީ ސްޓަޑީޒްގެ މަސައްކަތް ފެށިގެން ދާނެ ކަމަށާއި އެ މަޝްރޫއުގެ އަމަލީ މަސައްކަތް ވެސް ލަސްތަކެއް ނުވެ ފެށިގެންދާނެ ކަމަށް ބުނެފައިވެ އެވެ.

މާލެއާއި ވިލިމާލޭގެ މަގުތައް ހެދުމަށް ނިންމާފައިވަނީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި އެ ގައުމާއެކު ސޮއިކުރި އެއްބަސްވުންތަކުގެ ދަށުން ފޯރުކޮށްދޭން ނިންމާފައިވަނީ 130 މިލިއަން ޑޮލަރުގެ ހިލޭ އެހީގެ ތެރެއިންނެވެ.