ގުޅީފަޅު އެއްބަސްވުން އޮތީ ގެއްލުންވާ ގޮތަށް، ރާއްޖެއަށް ހެޔޮއެދޭ ބަޔަކު އެގޮތަށް ނުހަދާނެ: މިނިސްޓަރު

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ގުޅިފަޅު ހިއްކުމުގެ މަސައްކަތް ހަވާލުކޮށްފައި އޮތީ ރާއްޖެއަށް ގެއްލުންވާ ގޮތަށް ކަމަށާއި އެއީ ރާއްޖެއަށް ހެޔޮ އެދޭ ބަޔަކު ހަދާނެ ފަދަ އެގްރީމެންޓެއް ނޫން ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ގުޅިފަޅު ހިއްކުމުގެ މަސައްކަތް ކުރިއަށް ގެންދަނީ ތިމާވެށްޓަށް ގެއްލުންވާ ގޮތަށް ކަމަށް ބުނެ މީހަކު މިދިޔަ އަހަރު ހުށަހެޅި މައްސަލައަކާ ގުޅިގެން ހައި ކޯޓުން އިއްޔެ އަމުރު ނެރުނީ އެ މައްސަލަ ނިމެންދެން ގުޅިފަޅު ހިއްކުމުގެ މަސައްކަތް މަޑުޖައްސާލުމަށެވެ.

އެ އަމުރު ދައުލަތުން ސުޕްރީމް ކޯޓުގައި އިސްތިއުނާފް ކުރުމަށް ފަހު، ހައި ކޯޓުގެ އަމުރަށް އަމަލުކުރުން ފަސްކުރުމުގެ ވަގުތީ އަމުރަކަށް އެދުނެވެ.

ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން މިއަދު ނެރުނު އަމުރުގައި ވަނީ ހައި ކޯޓުގެ އަމުރު ތަންފީޒުވެއްޖެ ނަމަ ދައުލަތަށް ބޮޑެތި ގެއްލުންތަކެއް ލިބިދާނެ ކަމަށް ބެލެވޭތީ ހައި ކޯޓުގެ އަމުރު ތަންފީޒު ކުރުމުގެ ގޮތުން އެއްވެސް ފިޔަވަޅެއް ނާޅަން އަންގާ ކަމަށެވެ.

އެކަމާ ގުޅިގެން "އެކްސް"ގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ހައި ކޯޓުން މަސައްކަތް ހުއްޓާލަން އަމުރު ނެރުނީ ސަރުކާރުން ބޭނުން ވެގެން ކަމަށް ބުނެ ރައްޔިތުންނަށް އޮޅުވާލަން މަސައްކަތް ކުރީ ދައުލަތަށް ގެއްލުންވާ ގޮތަށް އެގްރީމަންޓް ހެދި ފަރާތްތައް ކަމަށެވެ.

"ގުޅީފަޅު ހިއްކުމަށް ހެދި އެގްރީމަންޓަކީ ރާއްޖެއަށް ހެޔޮއެދޭ ބަޔަކު ކުރާނެ ކަހަލަ އެގްރިމަންޓެއް ނޫން،" އޭނާ ވިދާޅުވި އެވެ.

ގުޅީފަޅު ހިއްކުން ހުއްޓުވީ ސަރުކާރުގެ ނުފޫޒުން ކަމަށް ތުހުމަތުކޮށްފައިވަނީ މިދިޔަ ސަރުކާރުގައި ހައުސިން މިނިސްޓްރީގެ ސްޓޭޓު މިނިސްޓަރަކަށް ހުންނެވި އަކްރަމް ކަމާލުއްދީން އެވެ.

އޭނާ ވިދާޅުވީ ކޯޓަށް ނުފޫޒު ފޯރުވައިގެން އެ އަމުރު ނެރުނީ ފުށިދިއްގަރުފަޅު ހިއްކައިގެން ތަރައްގީކުރާ "ރަސްމާލެ" މަޝްރޫއުގެ ކާމިޔާބުކަން ސާބިތުކޮށްދިނުމަށް ކަމަށެވެ.

ސަރުކާރުގެ މައްސަލައަކުން އެ މަސައްކަތް މަޑުޖެހިއްޖެ ނަމަ ނުވަތަ ހުއްޓިއްޖެ ނަމަ، އެ މަސައްކަތް ހުއްޓިފައިވާ ކޮންމެ ދުވަހަކަށް ދައުލަތުން ބޮސްކާލިސް ކުންފުންޏަށް ތިން ލައްކައެއްހާ ޑޮލަރު ދައްކަންޖެހޭނެ ކަމަށް ވެސް އޭނާ ވިދާޅުވި އެވެ.

"[ސަރުކާރުގެ] ނާގާބިލް ކަމުން މިކަން މިހެން ވެފައި މި އޮތީ. ސަރުކާރަށް ގެއްލުންވާ ކަމަށް ވަންޏާ އެ އެއް ނުހުއްޓުވޭނެ. އެކަމަކު ސަރުކާރަށް ގެއްލުންވާކަން ޕްރޫވް ކޮށްދޭން ޖެހޭނެ. ދެ ބައި މީހުން އެއްބަސްވާން ޖެހޭނެ. ހުރެލާފައި އޯވަނައިޓަކުން ހުއްޓައެއް ނުލެވޭނެ،" އަކްރަމް ވިދާޅުވި އެވެ.

އެ މަސައްކަތް ނެދަލެންޑްސްގެ ބޮސްކާލިސް ކުންފުންޏާ ހަވާލުކުރީ އޮކްޓޯބަރު 17، 2019 ގަ އެވެ. އެއީ ދެ ބިލިއަން ރުފިޔާ އަށް 65 ހެކްޓަރު ހިއްކާށެވެ. ނަމަވެސް މިހާރުގެ ރައީސް ޑރ. މުހައްމަދު މުއިއްޒު ވަނީ ގުޅީފަޅަށް އިތުރު 85 ހެކްޓަރު އިތުރުކޮށް، ދެ ވަނަ ފިޔަވަހިން 150 ހެކްޓަރު ހިއްކަން ނިންމަވައިފަ އެވެ. އެ ތަން ހިއްކުމުގެ މަސައްކަތް ވެސް އަންނަނީ ކުރަމުންނެވެ.