ސަބްސިޑީ: އެންމެ ފަގީރު 20 ޕަސެންޓަށް މަހަކު 2،450ރ. ޖަމާކޮށްދެނީ

އަންނަ އަހަރު ސަބްސިޑީގެ ގޮތުގައި އެންމެ ފަގީރު އާބާދީގެ 20 ޕަސެންޓަށް މަހަކު 2،450ރ. ޖަމާކޮށްދޭން ކަނޑައަޅައިފި އެވެ.

ފިނޭންސް މިނިސްޓްރީން އާންމު ކުރި ބަޖެޓުގެ ތަފްސީލީ ރިޕޯޓުގައިވާ ގޮތުން ސަބްސިޑީ ދޭ އާ ސިޔާސަތު އެކުލަވާލާނީ އެންމެ ފަގީރު އާބާދީއަށް އެކަމުގެ ފައިދާ ލިބޭ ގޮތަށް ކަމަށެވެ. އަދި ސަބްސިޑީ ޓާގެޓުކޮށް، އެންމެ ބޭނުން ޖެހިފައިވާ މީހުންނަށް ދޭން އަންނަ އަހަރުގެ ބަޖެޓުގައި ވަނީ 900 މިލިއަން ރުފިޔާ ކަނޑައަޅައިފަ އެވެ.

އެންމެންނަށް އެއް ހަމައެއްގައި މިހާރު ސަބްސިޑީ ދެމުން އަންނާތީ އެކަމުގެ އެންމެ ބޮޑު ފައިިދާއެއް ކުރަނީ އެންމެ މުއްސަނދި ގޭބީސީތަކަށެވެ. ހިސާބުތަކުން ދައްކާ ގޮތުން ސަބްސިޑީގެ 43 ޕަސެންޓު ބެހިފައިވަނީ އެންމެ މުއްސަނދި އާބާދީގެ 40 ޕަސެންޓަށެވެ.

އެންމެ ފަގީރު އާބާދީގެ 20 ޕަސެންޓު ބޭނުން ކުރަނީ ދައުލަތުން ދޭ ސަބްސިޑީގެ އެންމެ 17 ޕަސެންޓެވެ.

ސަބްސިޑީއަށް ގެންނަ ބަދަލުތަކަށް އަމަލު ކުރަން ފަށާނީ، އަންނަ އަހަރުގެ އޭޕްރީލް މަހުން ފެށިގެންނެވެ.

ފިނޭންސް މިނިސްޓްރީން ބުނީ، ސަބްސިޑީއަށް ގެންނަ ރިފޯމުތަކާ އެކު ރާއްޖޭގެ އާބާދީގެ އެންމެ ފަގީރު 20 ޕަސެންޓް ގޭބީސީތަކުގެ މަހެއްގެ ހަރަދަށް 1،770ރ. އިތުރުވާނެ ކަމަށް ލަފާ ކުރެވޭ ކަމަށެވެ. އަދި މިހާރު ރާވާފައިވާ ގޮތުން އެ އަދަދަށް ވުރެ އިތުރަށް ޓާގެޓު ސަބްސިޑީގެ ގޮތުގައި އެ ގޭބީސީތަކަށް ސަރުކާރުން ފައިސާ ޖަމާކުރާނެ ކަމަށް އެ މިނިސްޓްރީން ބުންޏެވެ.

އެންމެ ފަގީރު ގޭބީސީތަކަށް 2،450ރ. މަހަކު ޖަމާކޮށްދޭ އިރު އާބާދީގެ ގާތްގަނޑަކަށް 60 ޕަސެންޓަށް ސަބްސިޑީގެ އެހީ ލިބޭނެ އެވެ. ވަކި ވަކި ގޭބީސީތަކަށް ޖަމާކުރާ ސަބްސިޑީގެ އަދަދު ކަނޑައަޅަނީ، އެ ގޭބީސީއެއްގެ އާމްދަނީ އިވެލުއޭޓް ކުރުމަށް ފަހު އެވެ.

އާ ސަބްސިޑީގެ ނިޒާމުން، އެންމެ ބޭނުން ޖެހިފައިވާ މީހުންނަށް ވަރަށް ބޮޑަށް އިސްކަން ދޭނެ ކަމަށާއި އެ ފަރާތްތަކަށް ސީދާ ގޮތުން މަންފާ ލިބޭނެ ކަމަށް ފިނޭންސް މިނިސްޓްރީން ބުންޏެވެ.

ސަރުކާރުން ސަބްސިޑީ ދިނުމުގެ އުސޫލު ޑައިރެކްޓް ޓްރާންސްފާ ނިޒާމަކަށް ބަދަލު ކުރާ އިރު، އެކަން އެންމެ ފުރަތަަމަ ފަށަނީ ހަތަރު ސަބްސިޑީއަކުންނެވެ.

ޑައިރެކްޓް ޓްރާންސްފާ ކުރަނީ:

- ކާޑު

- ތެޔޮ

- ކަރަންޓު

- ނަރުދަމާ

އާ ނިޒާމުގެ ތެރެއިން ސަބްސިޑީ އަށް އެދި ހުށަހަޅަން ޖެހޭނީ އަމިއްލައަށެވެ. އެ ކަންކަން ކުރާނީ، ކައުންސިލްތަކާއި ގުޅިގެން ފަސޭހަ ނިޒާމެއްގެ ތެރެއިން ކަމަށް ވެސް ފިނޭންސް މިނިސްޓްރީން ބުންޏެވެ.