Roadha Mihaaru
ސެކިއުރީޓި ފީޗާ ހިމެނޭ ޑޮމެއިން ވިއްކާ އުސޫލް ނެރެފި

ސެކިއުރިޓީ ފީޗާ ހިމެނޭ ޑޮމެއިން ނަމްބަރު ވިއްކާ އުސޫލު އާންމުކޮށްފި

11 ނޮވެމްބަރ 2024

ސެކިއުރިޓީ ފީޗާ ހިމެނޭ ގޮތަށް ޑޮމެއިން ނަމްބަރު ވިއްކާ އުސޫލު ޓްރާންސްޕޯޓް މިނިސްޓްރީން އާއްމުކޮށްފި އެވެ.

ފާތިމަތު އަޖްފާން ފާތިމަތު އަޖްފާން

ސެކިއުރިޓީ ފީޗާ ހިމެނޭ ގޮތަށް ޑޮމެއިން ނަމްބަރު ވިއްކާ އުސޫލު ޓްރާންސްޕޯޓް މިނިސްޓްރީން އާއްމުކޮށްފި އެވެ.

ބޮޑު އަގުގައި އަދި ނީލަމުގެ އުސޫލުން ވިއްކަމުން ދިޔަ ޑޮމެއިން ނަމްބަރުތައް ވިއްކުން ހުއްޓާލީ ކުރީގެ ސަރުކާރުގައި އޮގަސްޓް، 2023 ގަ އެވެ.

މިނިސްޓްރީގެ ރެކޯޑުތަކުން ދައްކާ ގޮތުގައި މުޅި ރާއްޖޭގައި 1،400 ޑޮމެއިން ނަމްބަރު ބޭނުން ކުރަމުން އަންނައިރު އޭގެ ތެރެއިން ސައްހައީ 50 ޕަސެންޓެވެ. ބާކީ 50 ޕަސެންޓް ޑޮމެއިންއަކީ ރަނގަޅު ނޫން ޑޮމެއިން ނަމްބަރުތައް ކަމަށްވާތީ ގާނޫނީ ނިޒާމުގެ ތެރެއަށް ފެއްތުމުގެ މަސައްކަތް މި ސަރުކާރުން ފެށި އެވެ.

އެ މަސައްކަތުގެ ތެރެއިން އިއްޔެ ވަނީ، އެއްގަމު އުޅަނދުގައި ޑޮމެއިން ބޭނުންކުރާ އުސޫލު އިސްލާހުކޮށް، އާންމު ކޮށްފަ އެވެ.

އެ އުސޫލަށް ގެނެސްފައިވާ އިސްލާހުގައި ބުނެފައިވާ ގޮތުގައި، މިހާރު ދޫކޮށްފައިވާ ޑޮމެއިން ނަމްބަރުތައް އަލުން ރަޖިސްޓްރީކޮށް ފައިސާ ދައްކަން ދެ މަސް ދުވަސް ލިބޭނެ އެވެ.

އަމިއްލަ ބޭނުމަށް ދޫކުރާ ޑޮމެއިން ނަމްބަރުގެ ރަޖިސްޓްރީ އާއި ޑޮމެއިން ހުއްދަ

އަމިއްލަ ބޭނުމަށް ދޫކުރާ ޑޮމެއިން ނަމްބަރުގެ ރަޖިސްޓްރީ އާއި ޑޮމެއިން ހުއްދަ

އަދި ޑޮމެއިންގެ ރަޖިސްޓްރީ ލިޔުމާއި ޑޮމެއިން ބޭނުން ކުރުމުގެ ހުއްދަތައް ސެކިއުރިޓީ ފީޗާ ހިމެނޭ ޑޮމެއިންނަށް ބަދަލުކުރަން ވަނީ ތިން މަސް ދުވަހުގެ މުއްދަތެއް ދީފަ އެވެ. އޭގެ ފަހުން ބޭނުންކުރާ ޑޮމެއިން ރަޖިސްޓްރީ އާއި ހުއްދަތައް ބަލައި ނުގަންނަނާނެ ކަމަށް ވެސް މިނިސްޓްރީގެ އުސޫލުގައިވެ އެވެ.

އުސޫލުގައި ހިމެނޭ ބައެއް ކަންކަން.

- ޑޮމެއިން ނަމްބަރަށް އެދި ހުށަހަޅާ ފޯމާއެކު ހުށަހަޅަން ޖެހޭ ލިޔެކިޔުންތައް

- އުޅަނދު ދުއްވާ މީހާ އަތުގައި ފަސޭހައިން ފެންނަން ގޮތަށް ޑޮމެއިން ބޭނުން ކުރުމުގެ ހުއްދަ އޮންނަން ޖެހޭ

- ރަޖިސްޓްރީ ނުކުރާ ނަމްބަރު ބޭނުން ކުރާ ނަމަ ޖޫރިމަނާ ކުރުން

ޑޮމެއިން ނަމްބަރެއްގެ މައްސަލަ ހައްލު ކުރުމަށް އެކުލަވާލާފައިވާ ކޮމެޓީގައި މީގެ ކުރިން ތިބެނީ ތިން މެމްބަރުންނެވެ. ނަމަވެސް މިހާރު ވަނީ އެ ކޮމެޓީގައި ތިބޭނީ ހަތް މެމްބަރުން ކަމަށާއި މައްސަލަ ނިންމޭނީ އޭގެ ތެރެއިން ހަތަރު މެމްބަރުން އެއް ގޮތަކަށް އިންތިފާގުވެގެން ކަމަށް ވެސް އުސޫލަށް ގެނައި އިސްލާހުގެ ތެރޭގައި ހިމެނެ އެވެ.

ކުންފުނީގެ ބޭނުމަށް ދޫކުރާ ޑޮމެއިން ނަމްބަރުގެ ރަޖިސްޓްރީ އާއި ޑޮމެއިން ހުއްދަ

ކުންފުނީގެ ބޭނުމަށް ދޫކުރާ ޑޮމެއިން ނަމްބަރުގެ ރަޖިސްޓްރީ އާއި ޑޮމެއިން ހުއްދަ

އެ ކޮމެޓީއަށް ލިބިގެންވާ ބާރުގެ ތެރޭގައި ޑޮމެއިން ނަމްބަރަކީ ސައްހަ ނަމްބަރެއްތޯ ނުވަތަ ބާތިލް ނަމްބަރެއްތޯ ނިންމުމުގެ ބާރު ހިމެނެ އެވެ. އެ ދެ ހާލަތަށް ނުފެތޭ މައްސަލައެއް ކޮމެޓީން ބަލާ ނަމަ އެކަމަކާ ގުޅޭ ލިޔުންތަކާއި ހެއްކަށް ބަލައި މަދަނީ ގޮތެއްގައި މައްސަލަ ނިންމޭނެ ކަމަށް ވެސް އޭގައިވެ އެވެ.

ޑޮމެއިން ބޭނުން ކުރުމުގެ ހުއްދަ ދުއްވާ މީހާ އަތުގައި އޮންނަން ޖެހެ އެވެ. އެއީ މިނިސްޓްރީން ދޫކުރާ ލިޔެކިޔުންތައް ނުވަތަ ކިޔުއާރްކޯޑު ސްކޭން ކުރެވޭނެ ފަދަ ކޮޕީއެއް ނުވަތަ ނުވަތަ ރަސްމީ ޕޯޓަލެއްގެ ތެރެއިން ފެންނަން އޮތުމެވެ.

ޑޮމެއިން ނަމްބަރެއް ރަޖިސްޓްރީ ކޮށްދެނީ ކުރިން ވެސް އޮންނަ އުސޫލުން 500ރ. އަށެވެ. ގާނޫނުގައި ކަނޑައަޅާފައިވާ ގޮތުން، ނީލަމުގެ އުސޫލުން ޑޮމެއިނެއްގެ އަގަކީ 50،000-100،000 ރުފިޔާއާ ދެމެދެވެ.

ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެފައިވާ ގޮތުގައި، މީގެ ކުރިން ދޫކުރި ލިޔުމުގައި ސެކިއުރިޓީ ފީޗާތައް ފޯޖުކުރުމުގެ ފުރުސަތު އޮވެ އެވެ. އަދި އޭގައި ސީރިއަލް ނަމްބަރާއި ރިކޯޑުތައް ވެސް ފެންނަން ވެސް ނުހުންނަ ކަމަށް މިނިސްޓަރު ވަނީ ވިދާޅުވެފަ އެވެ.

ސީރިއަލް ނަމްބަރާ އެކު ޑޮމެއިން އަލުން ދޫކުރަން ފަށާއިރު، ފުރަތަމަ ދޫކުރާނީ ތިން ނަމްބަރާއި ހަތަރު ނަމްބަރުގެ ޑޮމެއިންތައް ކަމަށް މިނިސްޓަރު ވަނީ ވިދާޅުވެފަ އެވެ. އަދި ދެ ނަމްބަރާއި އެއް ނަމްބަރުގެ ޑޮމެއިންތަކާއި އަލްފާ ނިއުމަރިކް ޑޮމެއިން ތައާރަފްކޮށް ވިއްކަން ފަށާނެ ކަމަށާއި ކޮންމެ ތިން މަހަކުން ޑޮމެއިން ވިއްކާނެ ކަމަށް ވެސް މިނިސްޓަރު ވަނީ ވިދާޅުވެފަ އެވެ.