ކުށްވެރިންގެ ރައްކާތެރިކަމާއި ހައްގުތައް މާފުޅާވެއްޖެ، ބަދަލުކުރާނަން: މިނިސްޓަރު

ރާއްޖޭގެ ގާނޫނުތައް ހަދާފައިހުރީ ކުށްވެރިން ރައްކާތެރިކުރާ ގޮތަށް ކަމަށާއި ކުށްވެރިންނަށް އަދަބުދީ، ކުށްތައް ހުއްޓުވަން ފުލުހުންނަށް އުނދަގޫތައް އެބަހުރި ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ހިޔާ ފްލެޓެއްގައި ރަހީނުކުރި މީހެއް ސަލާމަތްކުރަން ފުލުހުން ހިންގި އޮޕަރޭޝަން ބައްލަވާލެއްވުމަށް އެ ސަރަހައްދަށް ވަޑައިގެން ނޫސްވެރިންނާ ވާހަކަ ދައްކަވަމުން މިނިސްޓަރު ވިދާޅުވީ ގާނޫނުތައް ހެދިގެން އައި އިރު ހުރީ ކުށްކުރާ ފަރާތްތަކަށް ރައްކާތެރިކަން ލިބޭ ގޮތަށް ކަމަށެވެ.

"ކުށް ކުރާ ފަރާތްތައް ސަލާމަތް ކުރުމަށްޓަކައި ހެދެން އޮތް ހުރިހާ ގާނޫނެއް ހަދައިގެން މި ތިބީ. އެހެން ނަމަވެސް ކުށް ހުއްޓުވަން އުޅޭ ފަރާތްތަކުން އަދި ކުށުގެ ވެށިން މީހުން ސަލާމަތް ކުރަން އުޅޭ ފަރާތްތައް ދުރުކުރުމަށްޓަކައި ކުށަށް ނުދާނެ ގޮތަށް ގާނޫނުތައް ބައްޓަން ކުރުމުގެ އެހާ ބޮޑު ވިސްނުމެއް އޮތް ކަމަކަށް ނުފެނޭ،" މިނިސްޓަރު ވިދާޅުވި އެވެ.

އެކަން ބަދަލު ކުރަން މި ސަރުކާރުން ގާނޫނުތަކަށް ބަދަލު ގެންނާނެ ކަމަށާއި އެއީ މިހާރު ރާއްޖޭގައި އޮތް ކުށުގެ ވެށި ނައްތާލުމަށް އެޅޭނެ އެންމެ ބޮޑު ފިޔަވަޅު ކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ ކުށްވެރިންނާ ކުރިމަތިލައި، ކުށް ހުއްޓުވަން މިހާރު ވެސް ފުލުހުންގެ އަތުގައި އެވަރުގެ ވަސީލަތްތައް އެބަހުރި ކަމަށާއި ނަމަވެސް، ހުރަކަށް އޮތީ ހަމައެކަނި ގާނޫނުތައް ކަމަށެވެ.

"ގާނޫނުތައް ހެދިފައި ހުރި ގޮތުން ތަކުރާރުކޮށް ކުށް ކުރާ މީހާ ފަސޭހަކަމާ އެކު އަޅުގަނޑުމެންގެ އަތް ދަށުން ދޫވެގެން މި ދަނީ. މިކަމަށް ހައްލެއް ލިބޭނެ މި ގާނޫނުތަކަށް ގެންނަން ޖެހޭ އިސްލާހުތައް ގެނައީމަ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ މައުސޫމް މީހަކަށް ކުށެއްގެ އަދަބު ދެވިދާނެތީ، އެ އޮންނަ ރައްކާތެރިކަމާއި ހައްގުތަކަކީ ކޮންމެވެސް އޮންނަން ޖެހޭ ކަމެއް ކަމަށާއި ނަމަވެސް، އެކަން ރާއްޖޭގައި މިހާރު އޮތީ މާބޮޑަށް ފުޅާވެފައި ކަމަށެވެ.

މި ސަރުކާރުން ވެރިކަމާ ހަވާލުވިއިރު ގޭންގްތަކާއި ޑްރަގު ވިއްކާ ފަރާތްތަކުގެ މައްސަލަތައް އޮތީ އާދަޔާ ހިލާފަށް ބޮޑުވެފައި ކަމަށާއި އެކަން މި ފަސް އަހަރު ތެރޭ ހައްލު ކުރުމަކީ ރައީސް ޑރ. މުހައްމަދު މުއިއްޒުގެ ވައުދެއް ކަމަށް މިނިސްޓަރު ވިދާޅުވި އެވެ. ގޭންގްތަކާ ދެކޮޅަށް ކުރާ މަސައްކަތުގައި ފުލުހުންގެ ތެރޭގައި ހާއްސަ ޔުނިޓެއް ވެސް ގާއިމްކޮށްފައިވާ ކަން މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ ރާއްޖޭގައި ކުށްކުރާ މީހުންނަށް އެންމެ ހަރުކަށި ފިޔަވަޅުތައް ފުލުހުން އަޅާނެ ކަމަށާއި ރައްޔިތުންގެ ސަލާމަތާއި ރައްކާތެރިކަމަކީ ސަރުކާރަށް އެންމެ މުހިންމު ކަންތައް ކަމަށެވެ.