އެމެރިކާގައި މި ވޯޓު ލަނީ ރިޔާސީ ކެންޑިޑޭޓަކަށް ނޫން

އެމެރިކާގެ ރިޔާސީ އިންތިހާބުގެ ވޯޓުލާން ފަށާ ވަގުތު އައިސް ޖެހުނީ އެވެ. މި މަހުގެ ފަސް ވަނަ ދުވަސް އެމެރިކާއަށް ފެށުމާ އެކު ވޯޓުލުމުގެ ކަންކަން ފަށާއިރު މިއީ ފަހުގެ ތާރީހެއްގައި އެމެރިކާގައި އެންމެ ވާދަވެރި ރިޔާސީ ރޭހަށް ވަނީ ވެފަ އެވެ. އަދި މި އިންތިހާބުގެ ވޯޓުލުން ނިމި އެތައް ދުވަހެއް ވަންދެން ނަތީޖާ ކަށަވަރު ނުކުރެވި އޮވެދާނެ ކަމުގެ އިންޒާރު ވެސް ވަނީ ދީފަ އެވެ.

އެމެރިކާގައި ވޯޓުލުމުގެ ނިޒާމު އޮންނަ ގޮތުން ރައްޔިތުން ވޯޓު ލަނީ ސީދާ ކެންޑިޑޭޓަކަށް ނޫނެވެ. އިންތިހާބުގައި މި ހޮވަނީ 538 މެންބަރުންގެ މައްޗަށް އެކުލެވޭ އިލެކްޓޮރަލް ކޮލެޖެވެ. ރައީސާއި ނައިބު ރައީސް އިންތިހާބުކުރަނީ މި އިލެކްޓޮރަލް ކޮލެޖުންނެވެ.

ކޮންމެ ސްޓޭޓަކުން ވެސް އިލެކްޓޯރަލް ކޮލެޖުގެ ވޯޓު ދެނީ އެ ސްޓޭޓެއްގެ ޕޮޕިއުލާ ވޯޓް ނުވަތަ އަޣުލަބިއްޔަތު ހޯދި ކެންޑިޑޭޓަށެވެ. އެމެރިކާގެ ކޮންގްރެސްގައި ގިނަ މަންދޫބުން ހިމެނޭ ބޮޑެތި ސްޓޭޓްތަކަށް އިލެކްޓޯރަލް ކޮލެޖުގެ 538 ވޯޓުގެ ބޮޑު ބައެއް ލިބެ އެވެ.

ޑިމޮކްރެޓިކް ޕާޓީގެ ކެންޑިޑޭޓް ނައިބު ރައީސް ކަމަލާ ހެރިސް އާއި ރިޕަބްލިކަން ޕާޓީގެ ކެންޑިޑޭޓް ކުރީގެ ރައީސް ޑޮނަލްޑް ޓްރަމްޕް މަސައްކަތްކުރައްވަން ޖެހޭނީ ރައީސްކަން ކާމިޔާބުކުރުމަށް އެންމެ މަދުން ބޭނުންވާ 270 ވޯޓު އިލެކްޓޮރަލް ކޮލެޖުން ހޯދުމަށެވެ.

ނަމަވެސް މިއަހަރުގެ ރިޔާސީ ރޭހުގައި ވާދަވެރިކަން ބޮޑުވުމާއި ތާއީދުގެ ތަފާތު ކުޑަކަމުން ތަޖުރިބާކާރުން ލަފާކުރައްވަނީ ވޯޓު ގުނުމާ ގުޅޭ ޝަކުވާތަކާއި ގާނޫނީ ގޮންޖެހުންތައް ގިނަވެ ލަސްވެދާނެ އެތައް ކަމެއް ހިނގާނެ ކަމަށެވެ.

ވޯޓުލާން ތާވަލްކޮށްފައިވާ އަންގާރަ ދުވަހުގެ ކުރިން ގާތްގަނޑަކަށް 81 މިލިއަން މީހުން ވޯޓުލާފައިވާއިރު، މިއީ 2020 ވަނަ އަހަރުގެ ވޯޓުލީ މީހުންގެ ދެބައިކުޅަ އެއްބައެވެ.

ވޯޓު ގުނަނީ ކިހިނެއް؟

އިންތިޚާބު ވޯޓުލުން އީސްޓަން ޓައިމް އިން ހަވީރު 6:00 (ޖީއެމްޓީ ގަޑިން ރޭގަނޑު 11:00) ގައި ނިމޭނެ އެވެ. ނަމަވެސް ނަތީޖާ ކަނޑައަޅަން އުނދަގޫވާ ކައިރިން ވޯޓުގެ ފަރަގު ހުރި ނަމަ ކާމިޔާބު ހޯއްދެވި ކެންޑިޑޭޓެއް ކަށަވަރުނުވެ ދުވަސްތަކެއް ވެސް ނަގައިފާނެ އެވެ.

އެމެރިކާގައި 2020 ވަނަ އަހަރު މީޑިއާތަކުން ވަނީ ޑިމޮކްރެޓިކް ކެންޑިޑޭޓް ޖޯ ބައިޑަން ކާމިޔާބު ކުރެއްވިކަން ނޮވެމްބަރު މަހުގެ 7 ވީ ހޮނިހިރު ދުވަހު އިއުލާންކޮށްފަ އެވެ. އެފަހަރު ވޯޓުލުން ނިމުނީ އަންގާރަ ދުވަހު އެވެ. އެކަމަކު 2016 އާއި 2012 ގައި ވޯޓުގެ ނަތީޖާއަށް ކުރަން ޖެހުނު އިންތިޒާރު ކުރެވެ.

ވޯޓުލާ ނިމުމާ އެކު، އިންތިހާބުކޮށްފައިވާ ނުވަތަ އައްޔަންކޮށްފައިވާ ލޯކަލް އިލެކްޝަން އޮފިޝަލުން ވޯޓު ޕްރޮސެސްކޮށް، ގުނަ އެވެ. ވޯޓު ގުނުމުގައި ގެންގުޅޭ އުސޫލުތައް ކޮންމެ ސްޓޭޓެއްގައި އެއްގޮތެއް ނުވާނެ އެވެ.

އިންތިހާބު އޮންނަ ދުވަހުގެ ކުރިން ދެވޭ މެއިލް-އިން ނުވަތަ އޯވަސީސް ވޯޓު އިންތިހާބުގެ ދުވަހުގެ ކުރިން ގުނޭ ގޮތަށް ވަރަށް ގިނަ ސްޓޭޓްތަކުގައި ވަނީ އިންތިހާބުތަކޭ ބެހޭ ގާނޫނަށް ބަދަލު ގެނެސްފަ އެވެ. އެކަމަކު ޕެންސިލްވޭނިއާ އާއި ވިސްކޮންސިން އިން އެފަދަ ބަދަލެއް ގެނެސްފައެއް ނުވެ އެވެ. މިއީ ކޮންމެ ކެންޑިޑޭޓެއްގެ ކޮޅަށް ވެސް ނަތީޖާ އެނބުރިދާނެ ދެ ސްޓޭޓެވެ. އެހެންވެ މެއިލް-އިން ވޯޓު ޕްރޮސެސް ކުރުމުގެ ހުއްދަ މި މަހުގެ ފަސް ވަނަ ދުވަހާ ހަމައަށް މި ދެ ސްޓޭޓްގައި ނުލިބޭނެތީ މިއީ ވެސް ނަތީޖާ ބުރަވާ ކެންޑިޑޭޓެއް ކަށަވަރުކުރުން ލަސްވާނެ ސަބަބަކަށް ވާނެ އެވެ.

ނަތީޖާ އިއުލާނުކުރާނީ ކާކު؟

އެމެރިކާގައި ރަސްމީ އިދާރާތަކުން ވޯޓުގެ ނަތީޖާ އިއުލާނުކުރުމަށް ވުރެ ބޮޑަށް އިސްކަން ދެނީ މީޑިއާތަކުން ކުރާ ދިރާސާތަކާއި އެއްކުރާ މައުލޫމާތަށް ބެލުމެވެ. މިއީ ރަސްމީކޮށް ނަތީޖާ އިއުލާނުކުރުމެއް ނޫނެވެ. ކޮންމެ ސްޓޭޓަކުން ވެސް ކޮންމެ ވޯޓެއް ވަކިން ގުނައި ރަސްމީ ނަތީޖާ ވެސް އިއުލާނުކުރާނެ އެވެ.

ސްޓޭޓްތަކުގެ ނަތީޖާ އިއުލާނުކުރުމުގެ ސުންގަޑިއަކީ އަންނަ މަހުގެ 11 ވަނަ ދުވަހެވެ. ކޮންމެ ސްޓޭޓަކުން ވެސް ކަނޑައަޅާފައިވާ އިލެކްޓަރުން ދެން ވޯޓު ލާނީ އެ ސްޓޭޓެއްގެ ޕޮޕިއުލާ ވޯޓުން މޮޅުވި ކެންޑިޑޭޓަށެވެ.

ޑިސެމްބަރު މަހުގެ 25 ވަނަ ދުވަހުގެ ކުރިން ކޮންމެ ސްޓޭޓެއްގެ އިންތިހާބީ ރަސްމީ ނަތީޖާ ސެނެޓްގެ ރައީސަށް ލިބެން ޖެހޭނެ އެވެ. އެއީ މިހާރު ނައިބު ރައީސް ކަމަލާ އެވެ.

އޭގެ ފަހުން ޖެނުއަރީ މަހުގެ ހަ ވަނަ ދުވަހު ކޮންގްރެސް އިން ވޯޓު ގުނައި އަދި ޖެނުއަރީ މަހުގެ 20 ވަނަ ދުވަހު އާ ރައީސް ހުވާކުރައްވާނެ އެވެ.